“Lisambeseni umo na mukwabo nga umo weni ali na kulinyenga hali mukwabo.”—KOLOSE 3:13.

Tubaboshe tukasebuka. Tunasa kubiisila bakwetu nambe bakebo banasa kutubiisila. Ngeci, tubaboshe tutonda ngwetu bakwetu batukonekele, co netu lalo tunapande kukonekela bakwetu. Nga tukonekela mukwetu uje natubiisila, co kutukala na nkulundundu. Kutwapandele ‘kwilwisila munu bubi’ nambe kumwanukisa byuma byabibi byatulingile kunima. (Loma 12:17) Oloni batico nga byuma byabibi byatulingile mukwetu anga bicituzibisa manene kubabala ku mbunge? Nga mukemwo, co tunapande kuwana simbu yaibwa ya kusimutwiya nendi kwa likalyetu. Cuma citushaka cinapu kukala mu kwoloka, keti kumwesa ngwetu iya nabiisa.—Loma 12:18.

“Likeheseni ku mesho a umo na umo, simbu yoshe yongoleni bakweni ngwe banapu bababwa kumihyana.”—FILIPU 2:3.

Nga tupwa ba kulikehesa na kukala na kasingimiko, co banu bashaka kulikuta netu busamba.  Bazibuka ngwabo tukala nabo mwamubwa, co lalo kutulingila shakelo byuma bije bibazibisa kubabala ku mbunge. Oloni nga simbu yoshe yetu twalimona kupwa tu bakama, co lalo twashaka ngwetu byuma byoshe bilingiwe mutushakela, co tulyonowa na bakwetu. Banu kubalikwatasana netu, co kutukala na babusamba.

‘Njambi kesi na kaangu, oloni woshe amuzibila lyoba na kulinga byabibwa bakamutambula kuli ikeye.’—VILINGA 10:34, 35.

Ishamatanga yetu kesi kutala lifuti kwatunda munu, ndaka yendi, byuma byali nabyo mu kuyoya nambe mubala wa cikonde cendi. “Watangele miyati yoshe kutunda kuli munalume umo.” (Vilinga 17:26) Ngeci, tubaboshe twapwa lika bandolome na bandokazi. Nga tusingimika bakwetu na kubalinga mwamubwa, co tupwa ba kubwahelela, nabo bapwa ba kubwahelela, co tuzibisa na Njambi kubwaha.

‘Zaleni kuwa mbunge.’—KOLOSE 3:12.

Nga tuwa mbunge, co tushubulwisa bakwetu. Bazituka kusimutwiya netu, co basa kutunangula mwafwa bazibuka ngwabo kutulubala. Co lalo nga tukumbulula mwamubwa mukwetu uje natulubalela, co asa kutula matoto endi. Mukanda wa Visimo 15:1 ngwawo: “Kukumbulula kwakubwa kwolwesa bukalu, oloni lijwi lya kubabalesa mbunge, lishangumuna bukalu.”

‘Muli kubwahelela kwakama mu kwana kutubakana mu kutambula.’—VILINGA 20:35.

Banu babangi ano matangwa bali na nuna, co bashaka lika byabo. Kubwahelela kwa busunga kwatunda mu kwana. (Luka 6:38) Baka-kwana bapwa ba kubwahelela mwafwa bazema bakwabo kutubakana byuma bya ku mubila. Co lalo, cizemo cikabalingisa bakandelele nga munu nabalingilako cuma cacibwa. (Kolose 3:15) Lihuleni ngweni, ‘Iya injishaka ngwange apwe kabusamba kange, munu wa litsita uje kesi kukandelela, indi uje akanako bakwabo, co lalo akakandelela? Ngeci, lingeni bimushaka ngweni bakweni balinge.—Mateo 7:12.