Bika Bili na Kutulingisa Tuyande, Tukulubale na Kutsa?
Ishamatanga watumona ngwendi twapwa tu bana bendi. Ngeci, kashaka ngwendi tuyande. Oloni mu kaye munashulu tuyando. Mwafwa bika?
Bisemi Betu ba Kulibanga Bakebo Banatukokela Tuyando
“Bubi bwezile hano ha kaye hali munu umolika, co bubi bwendi bunanene kutsa. Co kutsa kunete ku miyati yoshe ya banu.”—LOMA 5:12.
Njambi mwatangele bisemi betu ba kulibanga, Adama na Eva, wabatangele na mibila na bisinganyeka bya kulumbunuka. Wabakele mu citungu cacibwa ca Edeni. Wabatabesele kulya ku muti woshe-woshe wakele muje mu citungu, kutundisako lika umo. Oloni Adama na Eva balyangwilile kulya ku bushuka bwa muti ubababindikile, co kulinga ngoco kwapwile kulinga bubi. (Kushangumuka 2:15-17; 3:1-19) Ngeci, Njambi wabatundisile muje mu citungu mwafwa kubamwononokele, co buyoye bwashangumukile kubakaluwila. Mu kwita kwa simbu, bakitile bana. Co bana babo nabo baliwanene na tuyando. Boshe bakulubalele na kutsa. (Kushangumuka 3:23; 5:5) Netu tuli na kubinja, kukulubala na kutsa mwafwa twatunda kuli Adama na Eva.
Satana na Bandemone Bendi Nabo Bali na Kutunenela Tuyando
‘Kaye koshe kali mu nzili ya Liyabolo.’—1 YOWANO 5:19.
Satana Liyabolo wapwa kangelo uje watengulukilile Njambi. (Yowano 8:44; Kujombolola 12:9) Mu kwita kwa simbu, tungelo bamo nabo balikwatasanene na Satana. Aba tungelo bakebo bandemone. Aba tungelo bababi bakakwisi banu mangana keti bononoke Njambi. Bakakokweya banu mangana balinge byuma byabibi. (Myaso 106:35-38; 1 Timateo 4:1) Satana na bandemone bakazibi bwino mubakayandesa banu.
Bisimbu Bimo Yetu Babenya Tukalinenela Tuyando
“Munu ateja bije byanakubile.”—NGALATIYA 6:7.
Tubaboshe tukaliwana na tuyando mwafwa ya bubi butunatambula ku bisemi betu ba kulibanga na byuma byabibi bili na kulingiwa mu kaye ka Satana. Oloni bisimbu bimo, yetu babenya tukalinenela tuyando. Mu ngila muka? Nga tulinga byuma byabibi nambe nga kutwangula mwamubwa bya kulinga, co twasa kukobela mu bukalu. Oloni nga tulinga byuma byabibwa, co tuteja byuma byabibwa. Cakumwenako, nga cisemi wa munalume apwa wa kulongwa, apanga na nzili na kuzema naanga yendi, co naanga yendi ipwa ya kubwahelela. Oloni nga akala na linyanyamena, nambe nga anwa manene bwala nambe kupwa mulwa, co naanga yendi yasa kukala mu buhutu. Ngeci, tulinga mwamubwa nga twononoka Ishamatanga. Ashaka ngwendi tukale mwamubwa ‘mu kwoloka.’—Myaso 119:165.
Tuli mu “Matangwa a Kukotoka”
‘Mu matangwa a kukotoka, banu bakapwa baka-kulizema bakebo babenya, baka-kuzema bimbongo, baka-kujeneka kwononoka bisemi babo, baka-kujeneka kukwata mbunge, bakapwa ba kukenyuka, na baka-kuzinda byabibwa.’—2 TIMATEO 3:1-5.
Ano matangwa, tuli na kulimwena banu babangi ba cifweci. Bilinga byabo bili na kumwesa ngwabyo tuli na kuyoya mu “matangwa a kukotoka” kwa kano kaye. Co lalo Mbimbiliya yendekele ngwayo mu matangwa a kukotoka kukakala binzita, njala, mandunduma akama na mishongo. (Mateo 24:3, 7, 8; Luka 21:10, 11) Ebi byuma bili na kutunenela tuyando na kutsa.
