“Nameme baka-bubi bakola ngwe mwila, na boshe baka-kulinga byabibi bakala na bufuko bwabungi, bakabanyongesa ku myaka yoshe.”—MYASO 92:7.

Ngwe mutunasimutwiya mu ñanda inahu, bubi buli na kulibwezelela. Oloni kutwapandele kukasama. Mbimbiliya yendekele laja ku mukanda wa 2 Timateo 3:1-5, ngwayo mu “matangwa a kukotoka,” banu bakakala na futisi yaibi. Matangwa a kukotoka kwa bika? Matangwa a kukotoka kwa kaye nambe ngwetu banu baje kubononoka Njambi. Ololo Njambi anyongesa banu baje bali na kulinga byuma byabibi, co lalo kubashaka kutenguluka. Co kukasala lika banu baje bononoka Njambi. ‘Baka-busunga bakakala mu lifuti, co bakayoyamo myaka yoshe.’—Myaso 37:29.

‘Njambi, nsina yetu ya kwoloka, ololo atsena Satana.’—LOMA 16:20.

Satana na bandemone bendi hamolika na banu boshe bababi mubakabanyongesa, mu kaye mwoshe mukakala kwoloka. Ishamatanga natukulahesa ngwendi: ‘Naumo wahi akamizibisa lyoba.’—Mika 4:4.

‘Mbalaka ya Njambi ili hamo na banu! Akasikumuna misozi ku mesho abo, co kukukakala kutsa nambe busiwa nambe kulila nambe kukemanga.’—KUJOMBOLOLA 21:3, 4.

Mishongo hamolika na tuyando twoshe tukahwa mwafwa Njambi akamanesa byuma byoshe byabibi byananene Satana, Adama na Eva, na kujeneka kulumbunuka kwetu. Ngeci, “kukukakala kutsa.” Baje bazema Njambi na kumwononoka, bakayoya myaka yoshe. Bakayoya kuli?

“Mambo na lifuti lya kuma bikajolela, na bishani bikashamwina mu mambo.”—ISAYA 35:1.

Njambi mwakanyongesa baka-bubi, lifuti-libu likabwaha, co lalo kukakala byakulya byabingi. (Myaso 72:16) Tulunga-ndonga, mashali na bindonga bikajela, co bikashula na byuma bya kuyoya. Banu bakebala na kwibala ngwabo lifuti-libu lyabihile. Banu bakalitungila binjibo na kukalamo. Co kukukakala kahutu nambe munu wa kujeneka njibo nambe byakulya.—Isaya 65:21, 22.

‘Banu bakasanguka ku batsi.’—VILINGA 24:15.

Kuma mushaka kukamona lalo babusamba na babushoko bweni baje banatsi ndi? Njambi muka-nzili yoshe akabasangula, co bakayoya hano hasi mu paradaisi. Mukabazibuka, co nabo bakamizibuka. Acisinganyekeni oco kubwaha! Bika bitulingisa tukulahele ngwetu batsi bakasanguka? Mu Mbimbiliya muli biñanda bije bimwesa banu babasangwile kusañulu. Co baje basangukile balikwatasanene lalo na binaanga byabo. Bwingi bwa banu basangwile Yesu, wabasangwile oku banu banatalelela.—Luka 8:49-56; Yowano 11:11-14, 38-44.