“Mukemwo lalo banalume banapande kuzema banakazi babo ngwe mubakazeme mibila yabo babenya. Munalume uje azema munakazi wendi alizema ikeye babenya. Naumo wahi wazinda mubila wendi babenya. Oloni aulisa na kuulela.”—EFESO 5:28, 29.

Munalume ikeye mutwe wa naanga. (Efeso 5:23) Oloni munalume wamubwa kakele na butenu, co lalo kesi kutonda lika byendi. Wazema munakazi wendi, co akamunyungu mwamubwa. Akalingi mwoshe mwasela mangana amuzibise kubwaha, co lalo kesi kulinga mwatala temo. (Filipu 2:4) Akasimutwiya mwamubwa na munakazi wendi na kumutolilila. Kesi kulubalela munakazi wendi, kumwendeka mwamubi nambe kumupupa.—Kolose 3:19.

“Munakazi woshe napande kusingimika munalume wendi.”—EFESO 5:33.

Nga munakazi asingimika munalume wendi na kulikwatasana nendi mu byuma byanayongola kulinga, co naanga ikala mu kwoloka. Nga munalume nasebuka, munakazi wamubwa kamufwefulula, oloni anga amusingimika. (1 Petulu 3:4) Nga kuli bimo kubyamuzibisile bwino, awana simbu yaibwa ya kuleka munalume wendi, co alinga ngoco mu kasingimiko.—Muka-kwambulula 3:7.

‘Munalume akalipandakana na munakazi wendi, co bakapwa mubila umolika.’—KUSHANGUMUKA 2:24.

Munalume na munakazi mubakalyambata, bakapu naanga imo. Ngeci, baje banalyambata banapande kusimutwiya simbu yoshe kutundilila kwisi ya mbunge na kulinga byuma byabibwa kuli umo na mukwabo. Umo na umo napande kupwa wa kulongwa kuli mukwabo, co wahi napande kukala na lipangala. Munu uje kapu wa kulongwa mu bulo, azibisa muka-limbo lyendi kubabala ku mbunge. Kujeneka kupwa wa kulongwa kukalingisa banu bajeneke kulikulahela, co lalo kukashandola binaanga.—Vahevelu 13:4.

“Longesa mwanike ngila ije mwanapande kwendela, co omwo nakolo kakatundumo.”—VISIMO 22:6.

Njambi nana bisemi cipangi ca kulongesa bana babo. Banapande kubalongesa mwakukela na futisi yaibwa. Co lalo banapande kubamwesa mwanja waubwa. (Kwituluka mu Mashiko 6: 6, 7) Nga mwanike nabiisa, cisemi wamubwa kalubala mu kutubakanesa. ‘Azambula kuziba, co eshwala kukumbulula na kwishwala kulubala.’ (Yakomba 1:19) Nga amona ngwendi napande kunangula munendi, co alinga ngoco mu ngila yaibwa, keti na matoto.

‘Eni banike, ononokeni bisemi beni. “Singimikeni baishweni na banyokweni.”’—EFESO 6:1, 2.

Bana banapande kwononoka bisemi babo na kubasingimika. Nga bana basingimika bisemi babo, bisemi bapwa ba kubwahelela, co naanga ilikwatasana na kukala mu kwoloka. Bana baje banakolo basingimika bisemi babo nga babanyunga mwamubwa. Oku kunambateselela kubwahesa habakala na kubanako byuma bya kulikwasesa.—1 Timateo 5:3, 4.