Kulishoshomwena manene ha bukalu kwasa kunenela banu bishoti na kubazeyesa. Co bwingi bwa banu kubesi kukala na lilabelelo. Bika bibakalingi?

• Bamo kubesi kushaka kusinganyeka bya kulutwe.

• Bamoco bakasinganyeka ngwabo nga banwa bwala nambe kupangesa mambanda a kupendesa, co batepulula ku bishoti.

• Bakwaboco bakasinganyeka ngwabo kutsa kuli kulutwe kutubakana kuyoya. Ngwabo na seho ya kuyoya bene yahi.

• Bukalu bumo bumuli na kuliwana nabwo bunapu bwa simbu yaindondo lika, byuma binasa kutenguluka simbu yoshe-yoshe.

• Nameme bukalu bweni kubuhu, kuli bimo bimwasa kulinga bije byasa kumikwasa.

• Mbimbiliya itukwasa kukala na lilabelelo. Inamwesa ngwayo bukalu bwoshe butuli na kuliwana nabwo bukahwa.

Mbimbiliya ngwayo: ‘Kesi mulishoshomwene bya litangwa lya imene, omwo litangwa lya imene likalimwena likelyo babenya. Litangwa na litangwa lili na bukalu bwalyo.’—Mateo 6:34.

Taleni bya litangwa na litangwa ha litangwa lyabyo. Keti mulishoshomwene manene bya kulutwe na kwonowa kulinga bimunapande kulinga litangwolyo.

Kulishoshomwena manene byuma binasa kulingiwa kulutwe kwasa kubwezelela ku bishoti bimuli nabyo na kumyonowesa kukala na lilabelelo.

Muka-kwimba umo walombelele kuli Njambi ngwendi: “Lijwi lyobe likelyo ndeya ku myanja yange, na ceke mu ngila yange.” (Myaso 119:105) Tumoneni omwo Mbimbiliya inalifwila na ndeya na ceke.

Nga kuli lisusulungu, ndeya yasa kutukwasa kumona hatulyata. Mu ngila imolika, Mbimbiliya nayo yasa kutukwasa kwangula mwamubwa byakulinga bije binasa kutukaluwila.

Ceke casa kututetekela mu ngila na kutukwasa kumona bili na kwija kulutwe. Mu ngila imolika, Mbimbiliya itukwasa kuzibuka ngwetu byuma bikakala mwamubwa kulutwe.