Awa akewo majwi abendekele baka-kutondesesa ba mu kaye koshe kutalesa ku kushaluka manene nambe kutonola manene. Nga mwakulahela Ishamatanga uje waka mbunge banu, co majwi abendekele baka-sayansi aje atunabanga kwendeka amyanukisa ngila yaibwa yanatangelamo lifuti-libu, ije ililingisa litwaleleleho kukalako.

Banu banabiisa manene lifuti-libu. Ngeci, Njambi lika ikeye asa kulyobola. Bika bitulingisa tukulahele ngwetu Njambi kecelela lifuti-libu linyonge?

Nangukeni bisoneka bitulingisa tukulahele ngwetu lifuti-libu kulikanyongo oloni likabwaha.

• Njambi ikeye watangele lifuti-libu. “Hakulibanga, Njambi watangele lilu na kaye.”—Kushangumuka 1:1, MBB.

• Njambi ikeye babenya lifuti-libu. “Kaye na byoshe bije bilimo byapwa bya [Yehova] a.”—Myaso 24:1, MBB.

• Njambi watangele lifuti-libu mangana likaleko myaka yoshe. “Yobe wajalele lubula lwa kaye ngeci kaye keti kashengenye.”—Myaso 104:5, MBB.

• Njambi nakulahesa ngwendi lifuti-libu likabwaha manene kulutwe, co lalo likakalako myaka yoshe. “Shukulu Kalunga ikeye watangele melu, . . . Ikeye wamungile na kutanga kaye, wakolesele kaye mbe, na kukala ku myaka yoshe. Katangele kaye ngeci kapwe ngwe mambo embwe, oloni hapwe ha kuyoyela banu.”—Isaya 45:18, MBB.

• Njambi nakulahesa ngwendi banu bakayoya myaka yoshe ha lifuti-libu. “Baka-busunga bakakala mu lifuti, co bakayoyelamo ku myaka yoshe.”—Myaso 37:29, MBB.

Njambi watangele lifuti-libu mu ngila ilingisa banu balikuwe kuyoyaho kwa kujeneka kulibiisa. Mbimbiliya yakulahesa ngwayo Yehova Njambi akatundisako byuma bije bili na kubiisa lifuti-libu ha simbu yananoneka.—Kujombolola 11:18

Kutundaho, Mbimbiliya inakulahesa ngwayo Njambi akatengulula lifuti-libu na kulipwisa paradaisi yaibwa manene, co akashokolola liboko lyendi “na kukutisa boshe na byakulya.”—Myaso 145:16, MBB.