Mwafwa Bika Banu Kubesi na Kusingimika Kuyoya?
MWAFWA BIKA TUNAPANDE KUSINGIMIKA KUYOYA?
Kulinga byuma bije byaka buyoye bweni na bwa bakweni mu bushonde, kumwesa ngwabo kumwesi na kusingimika kuyoya.
-
Kusipa kukwesi kunena lika mushongo wa kansa, oloni kukalingisa mubila wonowe kukala na nzili ya kulwisa ou mushongo. Banu babangi banatsi ku mushongo wa kansa ya ku mashapala mwafwa ya kusipa manene nambe kukala hamo na baka-kusipa.
-
Mwaka na mwaka, banu babangi bali na kutsa mwafwa ya kubalohya, ngeci oku kukalingisa banu balishoshomwene manene. Baka-yuniveziti ya Stanford banawana ngwabo “Nameme banu bamo bakoboka ku mata abakalohyo ku masikola kwa kujeneka kubetwa, bakalishoshomwena manene na kubinja mishongo ya ku bwongo ha myaka yaingi.
-
Banu baje bakendesa bimota oku banapende bwala nambe mambanda, bakaka kuyoya kwa bakwabo mu bushonde. Nga banu kubasingimika kuyoya, basa kwaka bakwabo mu bushonde.
MWASA KUSINGIMIKA BATI KUYOYA?
Nyungilileni bukangule bweni. Mwasa kwecela kulinga byuma byabibi byakufwa ngwe, kusipa, kunwa manene bwala na kupangesa mambanda a kupendesa. Ebi byuma byasa kwaka kuyoya kweni mu bushonde, co bimwesa ngwabo kumwasingimikile kuyoya kwa banu bamwatunga nabo hamolika na babushoko bweni.
Linyungilileni na kunyungilila bakweni. Nyungeni mwamubwa njibo yeni na byuma bimukapangesa mangana keti kukale bimonde. Endeseni mwamubwa mota yeni na kumona ngweni byuma byoshe biliko bili na kupanga mwamubwa. Keti mutabese bakweni bamilingise byuma bije byaka kuyoya kweni mu bushonde.
Zibileni bakweni ngozi. Kusingimika kuyoya kulumbununa kuzibila ngozi banu boshe ipwe ba ku lifuti lyeka, cisemwa ceka, bakufuka nambe tuhutu, bakulilongesa nambe baje kubalilongesele. Mwafwa kangu na bizindo bikebyo bili na kunena manene bukenya na binzita mu kaye.
BITULI NA KULINGA
Bakaleho ba Yehova bakalongesa bakwabo mwakukela na bukangule bwabubwa. Kulilongesa na banu Mbimbiliya kunabakwasa balikele kulinga byuma byaka kuyoya kwabo mu bushonde.
Tukakabangeya mwamubwa mashiko a mwakulinyungilila nga tuli na kupanga mu cipangi ca kutunga. Baje bakalyana kukwasa kutunga mitungo ya kulemesela na mitungo ikwabo ije ikakwasa mu cipangi cetu ca kulongesa Mbimbiliya, bakabalongesa mubasa kulinyungilila mangana keti kukale bimonde. Mukukabangeya mashiko a mwakulinyungilila, mitungo yetu ya kulemesela bakailula kushwa kumo mangana bamone indi ili mwamubwa.
Tukakwasa banu baje banaliwana na bukalu. Mu mwaka wa 2022, mu kaye koshe munakala bukalu bwakama buje bunakele kuyoya kwa bandolome mu bushonde. Co tunapangesele bimbongo bya kweta ku 12 milyoni US dola bije bibanalambwile mu kukwasa baje banaliwana na bukalu.
Mu mwaka wa 2014, mushongo wa Ebola unanyongesele banu babangi ku west Africa. Co mu 2018 mushongo wakulifwa unanyongesele banu babangi mu Democratic Republic of Congo, co twakwasele banu bazibuke mwakulinyungilila kuli ou mushongo waubi. Kutundaho, twatumine baka-kutwimanenako mangana bakasimutwiye na bibunga ha ñanda ya, “Kwononoka Kwobola Myonyo.” Co twatumine byuma byakulikwasesa kukutana ku maboko mangana babipangese ku myela yetu ya kulemesela, co lalo twabalekele seho ya kutana ku maboko na byuma bibapandele kulinga mangana uje mushongo keti ujalakane.
Mu Sierra Leone, banene mutambi ha cisanzi wa kushangala Bakaleho ba Yehova ha kukwasa bakaleho na baje kubapwile bakaleho bazibuke mwakulinyungilila ku mushongo wa Ebola.
Kwakutanena ku maboko ku njibo ya bumwene ku Liberia, ha simbu ya mushongo wa Ebola mu 2014.
a Kusañulu, banu baku Middle East mubakele na kwononoka eli lishiko, bamwesele ngwabo munu wakele mbunge kukulinyungilila ikeye babenya na baka-naanga yendi hamolika na bakwabo.
