BIKA KWAPWILA KWA SEHO KULISINGIMIKA MU NAANGA?

• Libulu lya Seven Principles for Making Marriage Work ngwalyo nga baka-kulyambata balisingimika umo na mukwabo, co oku kubakwasa balimwesa cizemo “mu byuma byabindondo na byakama.”

• Baka-kutondesesa banawana ngwabo banike baje bakasingimika bakwabo kubesi kuliziba kupwa bangoco, co bakakala na busamba bwabubwa na bisemi babo, co lalo kubesi kubabala manene mishongo ya ku bwongo nambe kwombwa.

 BIMWASA KULINGA

Ha kupwa naanga, liyongoleni ha byuma bimunapande kulinga. Cakulibanga, moneni ngweni mubaboshe mu naanga muzibuka bikulumbununa “kumwesa kasingimiko.” Camucibali, sonekeni byuma bije bimushaka ngweni naanga yeni ilinge na byuma bije kumushaka ngweni ilinge. Camucitatu, simutwiyeni ha byuma bimunasoneka mangana woshe mu naanga azibuke bikulumbununa kumwesa kasingimiko.

Pweni bakulibanga mu kumwesa kasingimiko. Kuma mukasompo ba mu naanga yeni mwafwa ya buzeye babwo nambe kubashendumuna nga bendeka biyongola byabo indi kujeneka kubakumbulula nambe kubabatwila nga bali na kwendeka neni ndi?

Lingeni Ebi: Mweseni kasingimiko ku munu imunalyambata nendi na bana beni nameme ngwabo hamo muliziba ngweni kumwapandele kulinga ngoco.

Singimikeni bakweni nameme nga kumulitombola na biyongola byabo. Omwo muleka bakweni mumuli na kulizibila keti mwendeke majwi a kufwa ngwe, “yeni simbu yoshe” nambe “kumwesi kulinga.” Endekesi ya cifwa eci yasa kulubalesa munu wa mu naanga yeni nambe kulingisa bukalu bwabundondo bupwe bwakama.