VAKA-KULYAMBATA
3: Kathingimiko
KALUMBUNUNA VIKA?
Vaka-kulyambata vaje vakala na kathingimiko kuli mukwavo, vakaka mbunge ku vyuma vyatonda mukwavo nameme kuvalitombwele ha vyuma vimo. Livulu lya Ten Lessons to Transform Your Marriage ngwalyo: “Vaka-kulyambata vamo kuvethi kulichokotetha manene, mamanethelelo vajeneke kulithzivathana. Oloni vakathimutwiya ha vukalu vuvaliwana navwo. Vakatolilila mwamuvwa kuli muka-limbo lyavo nga athimutwiya, cho oku kukavalingitha valithzivathane.”
CHINANGULO CHA MU MBIMBILIYA: “Chithzemo . . . kuchethi kulitondela vyacho chikecho vavenya.”—1 Kolinte 13:4, 5.
Micah ngwendi: “Njikathingimika munakathzi wange na kumumona kupwa wa theho, cho kunjethi kulinga vyuma vije vyatha kunena vukalu mu vulo vwetu.”
VIKWAPWILA KWA THEHO
Nga vaje vali mu vulo kuvalyana kathingimiko, cho vanatha kulyendekela lika vyoshe vivashaka, nameme kwendeka vyuma vije vivanawana vaka-kutondethetha ngwavo vyatha kuthsiya vulo.
Brian ngwendi: “Kulinga lyepe lya kutuvakanetha na muka-limbo lyeni nambe kwendeka majwi amavi kunatha kumuthzeyetha na kujeneka kulithzivithana mu vulo vweni.”
VIMWATHA KULINGA
LIHULENI NGWENI
Mu chalumingo chimo akeleni mana ku vyuma vimwendeka na ku vilinga vyeni, cho lihuleni ngweni:
-
‘Lungai njinendeka nambe kulinga muka-limbo lyange mwamuvi, cho njinamuthzumbangeya lungai?
-
Mu vingila muka munjinamwetha ngwange njathingimika muka-limbo lyange?
THIMUTWIYENI NA MUKA-LIMBO LYENI
-
Majwi na vilinga muka vije vimikwatha mulithzive ngweni muvavoshe mwalithingimika?
-
Majwi na vilinga muka vije vyatha kumilingitha mulithzive ngweni kumwethi na kulithingimika?
LINGENI EVI
-
Thonekeni vingila vitatu vimushaka kumithingimikilamo. Na muka-limbo lyeni napande kulinga ngocho. Aneni lipapelo lyeni kuli muka-limbo lyeni, cho ambateni lyendi.
-
Thonekeni vyuma vikamithzivitha kuvwaha hali muka-limbo lyeni. Cho mulekeni ngweni vyamithzivitha kuvwaha.
Megan ngwendi: “Vilinga vyange vikamwetha ngwavyo njathingimika na kumona munalume wange kupwa wa theho, cho njishaka ngwange apwe wa kuvwahelela. Oku kukulumbununa ngwavo kuvanga njimulingile vyuma vyakama, oloni nameme vyuma vyavindondo vyatha kumwetha ngwavo njamuthingimika.”
Mamanethelelo, muka-limbo lyeni ikeye amileka ngwendi munamuthingimika, kethi yeni mwendeka ngweni muli na kumuthingimika.
VINANGULO VYA MU MBIMBILIYA: ‘Munapande kukala na chithzemo na mema ku mbunge na ngothzi na kulilumbilitha na vuvwa na likakateya.’—Kolose 3:12.
