Vanu vaje vakapanga na ndthzili, kuvethi kuthethzela vipangi hakati. Oloni vakalikuwu kupanga na kuwana vya kulikwatha navyo na kukwatha vakwavo nameme chipangi chivakapanga, kuvachithzemene vanu.

Vanu voshe vanapande kupanga na ndthzili. Nameme ano matangwa vanu vavangi vathzinda kupanga na ndthzili, oloni kulinga ngocho kwapwa kwakuvwa.—Muka-kwambulula 3:13.

Reyon ngwendi: “Kupanga na ndthzili kukalingitha munu apwe wa kuvwahelela. Kulithziva ngocho kunanjikwatha njithzeme vipangi. Kuthzema vipangi kumikwatha mukale na lithzina lyalivwa.”

CHINANGULO CHA MU MBIMBILIYA: “Kuundangana manene uwanaho vimo.”—Vithimo 14:23.

Evi vingila vinatako vimikwatha mumone vipangi vyeni kupwa vya theho.

Lilongetheni kupanga vipangi vyeni mwamuvwa. Nga muli na kupanga vipangi vya ha njuvo nameme kuthoneka vya ku sikola nambe vipangi vyoshe vyoshe, vipangeni na mbunge yeni yoshe. Cho lifwiteni kuvwethzelela ku vutongwe vweni mangana mupange vwathi vipangi vyeni. Nga mupanga mwamuvwa vipangi vyeni, mulikuwa vipangi.

CHINANGULO CHA MU MBIMBILIYA: “Nga upanga vipangi vyove mwamuvwa, cho ukapangela vimyene, kuukapangela vanu vangocho embwe.”—Vithimo 22:29.

Pangeleni hamo na vakweni. Nga tupanga mwamuvwa vipangi vyetu vyoshe, cho tukwatha vakwetu. Chakumwenako, nga mupanga na ndthzili vipangi vyeni, cho vipangi vikeha mu nanga yeni.

CHINANGULO CHA MU MBIMBILIYA: “Muli kujolela kwakama manene mu kwana kutuvakana mu kutambula.”—Vilinga 20:35.

Pangeni manene. Kutuvakana kulinga lika vyuma vivanamileke, lyaneni kupanga vyavingi. Nga mulyana kupanga, cho mupwa va kushuvuluka mu vipangi vyeni.—Mateo 5:41.

CHINANGULO CHA MU MBIMBILIYA: “Njishaka yove uchilinge na chithzango cha mbunge yove. Ngechi vene, kunjatha kulinga chuma chimo kuvanga yove unatava.”—Filimoni 14.

Lyakeleni theteko ya kupanga. Vaka-kupanga na ndthzili kuvakele na vulwa, cho lalo kuvethi kutuvakenetha kupanga. Vakalyakela theteko ya kupanga na kuwana lalo thimbu ya kuhwima.

CHINANGULO CHA MU MBIMBILIYA: “Mwamuvwa kukala lika na vyavindondo mu kwoloka kutuvakana kuungama vithimbu vyoshe na kupanga na mavoko avali mu kusheka lihundthzi.”—Muka-kwambulula 4:6.