Vithemi vamo vakalingi vyuma vivakalongetha vana vavo. Chakumwenako, mwana katha kwendeka vuthunga nga vithemi vendi vamulekele ngwavo aleke munu uje kuvashakele kwendeka nendi ngwavo: “Valeke ngwove njiwayiho ha njuvo.”

David ngwendi: “Vanu vavangi vakendeka ngwavo ‘linga vije vinjendeka kethi vije vinjilinga,’ oloni vanike kuvethi kwaka mbunge kuvyendeka vya chifwa echi. Vapwa ngwe chiponchi, mwafwa vakajamwa vyuma vyoshe vitukendeka na kulinga, cho vakatuleke nga tulinga vyuma vije vyalithethze nevi vitukavalongetha.”

CHINANGULO CHA MU MBIMBILIYA: “Ukakumbulula ngwove ‘Kethi mwive,’ oloni yove ukai na kwiva ndi?”—Loma 2:21.

Vanike vakakavangeya manene vyuma vivakalingi vithemi vavo kutuvakana vivakamono ku vakwavo. Oku kulumbununa ngwavo vithemi vakevo vanapande kutwamenena vana vavo mu ngila yaivwa, na kulinga vyuma vivalongetha vana vavo.

Nicole ngwendi: “Twatha kwilukilailukila kulongetha vanike na kuthinganyeka ngwetu hamo kuvathzivithithile, oloni litangwa litukevala kulinga vyuma vitukavalongetha vakevo vakatwanukitha. Vanike vakaka manene mbunge ku vyuma vyoshe vitukalingi nameme tumona ngwetu kuvethi kwakelako mbunge.”

CHINANGULO CHA MU MBIMBILIYA: ‘Mana a kutunda mwilu . . . kuakele na chivembulu.’—Yakomba 3:17.

Iluleni vilinga vyeni. Vyuma muka vimwashaka kuyongola? Mwayoya vati na vaka-limbo lyeni na vana veni? Vavuthamba va kufwa vati vamwakala navo? Mukaka vakweni mbunge ndi? Mushaka ngweni vana veni vakafwe ngwe yeni ndi?

Christine ngwendi: “Yange na vaka-limbo lyange kutwethi kuleka vana vetu valinge vyuma vije kutwethi kulinga.”

Lombeni likonekelo nga munaviyitha. Vana veni navo vathzivuka ngwavo kumwapwile va kulumbununa. Kuleka vaka-limbo lyeni na vana veni ngweni “Njikonekeleniko,” nga munaviyitha kukwatha voshe vapwe va kulikehetha.

Robin ngwendi: “Vana vetu vashaka kututhziva tulomba likonekelo nga tunaviyitha. Oloni nga kutulombo likonekelo, cho navo vashweka milonga yavo.”