Nga mukemwo, co hamo twasa kutepulula ku tuyando.

Byuma muka bibali na kulinga banu bije bili na kunena bukalu bunatako?

• Kuyandesa Banike na Banakazi.

  Munga Itala bya Bukangule mu Kaye (World Health Organization) inamwesa ngwayo, mukulunu umo hakati ka bakulunu bawana banamuyandesaho laja ku bwanike. Co lalo ngwayo, munakazi umo hakati ka banakazi batatu banamuyandesaho nambe kumupika. Nambe kumuyandesa na kumupika ha simbu imo.

• Kutsisa.

  Muzimbu wa 2018, wa Munga Itala bya Bukangule mu Kaye (World Health Organization) ngwawo; “Mu 2016 banu ba kweta ku 477,000 mu kaye koshe babatsiile.” Co lalo, mu mwaka uje bene kwatsile banu ba kweta ku 180,000 mwafwa ya lwozi na binzita.

• Kujeneka Kulikangula Mwamubwa.

  Mu muzimbu wa mu magazini ya baka-National Geographic, Fran Smith wasonekele ngwendi, banu ba kutubakana 1 bilyoni bakasipi. Makaya nao akanene mishongo inatako ije ili na kutsiya manene banu. Eyi mishongo inapu, mushongo wa mbunge, kalepa, mishongo ya mu nulo, kansa ya ku mashapala na mishongo ikwabo ya ku mashapala.

• Kuliseza kwa Yoyesi.

  Jay Watts muka-kutala bya bwongo ngwendi: “Buhutu, kaangu ka miyati, kuyengula banu ba bushwama bweka, kujalwisa banu mu mwela mubakele na kukala na mpunzi ya kulihyana bili na kulingisa banu bashote manene bimbunge.”

  LILONGESENI BYABINGI

  Kengeni vidio ya Bika Njambi Watangelele Kaye? ije ili ha jw.org/mck.

Banu bakebo bali na kunena manene tuyando tutuli na kuliwana natwo.

Bifulumende byabibi bije bikalishasha ngwabyo bikwasa banu bikebyo bili na kunena bwingi bwa tuyando tubali na kuliwana natwo banu.

“Banu bamo . . . bali na nzili, co bamo bali na kuyanda mwisi yabo.”—MUKA-KWAMBULULA 8:9.

Kuyanda kwasa kutepuluka.

Binangulo bya mu Mbimbiliya bikwasa banu bapweko ba kulikangula na kuyoya mu kwoloka na bakwabo.

“Mbunge ya kwoloka inena bukangule mu mubila, oloni cipululu capwa ngwe mbandu ya mukongo.”—VISIMO 14:30.

“Umbileni kuti nkulundundu, matoto, butenu, kukangoka, kwendeka na likamba na byuma byabibi byoshe.”—EFESO 4:31, NWT.