Makina Asa Kunena Bukalu Muka mu Bulo Bweni?
Makina asa kukwasa munalume na munakazi bali mu bulo bakanyamese bulo bwabo nga baapangesa mwamubwa. Cakumwenako, asa kubakwasa basimutwiye simbu yoshe-yoshe.
Oloni nga kubaapangesa mwamubwa . . .
-
asa kubonowesa kuwana simbu yaibwa ya kukala hamo.
-
asa kubalingisa bakupangele cipangi ca ku bipangi ku njibo.
-
asa kubalingisa bajeneke kulikulahela na kujeneka kupwa ba kulongwa kuli umo na mukwabo.
BIMUNAPANDE KUZIBUKA
SIMBU YA KUKALA HAMO
Munalume umo wa lizina lya Michael ngwendi: “Simbu imo munjikakala na mwebwange tukalingi ngwe ou ali kweka, ou ali kweka, okuni tuli hamo. Mwebwange akazezama na foni, co akendeka ngwendi, ‘Hano bene asina njiwaneko simbu ya kutala-tala ha foni.’ Munu na muka-limbo lyendi banasa kumoneka ngwe bali hamo, kumani ou bisinganyeka byendi bili kweka, ou bili kweka.”
BYAKUSINGANYEKESESA: Kuma baka-kutuma mafoni na tumizimbu bakamyonowesa kuwana simbu yaibwa ya kukala hamo na muka-limbo lyeni ndi?—EFESO 5:33.
BIPANGI
Banu bamo, bipangi byabo bikabalingisa base kubasana simbu yoshe-yoshe. Oloni bamo nameme munima ya bipangi bacikatwalelelaho kupanga nameme bipangi byabo kubitondeka mu bwasi-bwasi. Munalume umo wa lizina lya Lee ngwendi, “Ha simbu injinabwahesa kukala hamo na mwebwange, kukanjikaluwila kujeneka kukumbulula banu banjitumina mafoni nambe mizimbu ya bipangi.” Munakazi umo wa lizina lya Joy ngwendi, “Njikapangela ku njibo. Ngeci, nga kunjinoneka mwamubwa byuma, co linjikela lya bipangi lika.”
BYAKUSINGANYEKESESA: Kuma mukatolilila mwamubwa nga muka-limbo lyeni amyendekesa, indi kukakala byuma bikamitanganesa?—LUKA 8:18.
KULONGWA
Banu babangi baje banalyambata bakendeka ngwabo kakangi byuma byakaka umo ha intaneti bikebyo bikakatula lwozi nambe kujeneka kulizibasana mu bulo. Bamo balitabelele ngwabo bakele byuma bimo ha intaneti bije kubashakele ngwabo baka-limbo lyabo babizibuke.
Mukemwo intaneti banayendeka ngwabo yasa kulingisa baje banalyambata bakale na mapangala. Maloya bamo baje bakatala bya kulikondola bakendeka ngwabo malo amangi ali na kutsa mwafwa ya kupangesa mwamubi intaneti.
BYAKUSINGANYEKESESA: Kuma mukashwekela baka-limbo lyeni bimukasimutwiya na banu ba bushwamwa bweka ndi?—VISIMO 4:23.
BIMUNASA KULINGA
NONEKENI MWAMUBWA BYUMA
Nga munu kali mwamubwa, co kalikangula bwino ku mubila. Mu ngila imolika, nga munu kawana simbu ya kukala na muka-limbo lyendi, co bulo bwabo kubukala mwamubwa.—Efeso 5:28, 29.
CINANGULO CA MU MBIMBILIYA: ‘Nangukeni byuma bije binapu bya seho manene.’—FILIPU 1:10.
Simutwiyeni na muka-limbo lyeni ha byuma bili mwisi haje hamushaka kupangela nambe kusoneka byuma bimumona ngweni byasa kumikwasa, mangana makina keti amibiisile bulo bweni.
-
Kuwanako simbu ya kulya hamo nambe lumolika ha litangwa
-
Kuwanako simbu ya kukala kwa kujeneka makina
-
Kubwahesako simbu imulishubulwisa mu babali
-
Kuzima makina butsiki na kuaka kweka
-
Kuwanako minutu 15 ya kusimutwiya na muka-limbo lyeni tangwa na tangwa kwa kujeneka makina
-
Kulyakela simbu imupangesa-pangesa intaneti
