CINANGULO CA MU MBIMBILIYA: “Muka-kujeneka kulubala-lubala ali mwamubwa manene kutubakana muka-nzili.”—Visimo 16:32.

BICILUMBUNUNA CINANGULO: Nga kutuzambwila kutenuka, co tumona bubwa bwa kulinga ngoco. Bisimbu bimo, tunasa kutenuka nga byuma kubyesi bwino, oloni nga kututulisa matoto etu, tunasa kulikobelesa mu bukalu. Baka-kutondesesa banawana ngwabo nga munu nalubala, asa kulinga nambe kwendeka byuma bije bimulingisa alibeye ha mamaneselelo.

BIMWASA KULINGA: Lilongeseni kukwata mbunge simbu kanda mulubale na kulinga byabibi. Bamo bakasinganyeka ngwabo nga munu alubala manene, co ali na nzili. Oloni embwe, muka-kulubala manene wapwa munu wa kuzeya. Mbimbiliya ngwayo: “Munu uje alubala-lubala simbu yoshe, napu ngwe nganda ya kujeneka cibumbe.” (Visimo 25:28) Simbu kanda mwendeke nambe kulinga bimo, munapande tai kunanguka ñanda yoshe. Oku kumikwasa mujeneke kulubala. “Nga u muka-mana usimpa mu kulubala kwobe.” (Visimo 19:11) Tunapande kunanguka nsina na shongo ya ñanda yoshe. Oku kutwana mana, co mana atukwasa tukwate mbunge.

CINANGULO CA MU MBIMBILIYA: “Kandeleleni.”—Kolose 3:15.

BICILUMBUNUNA CINANGULO: Munu uje amwesa kukandelela kwendi, akapu wa kubwahelela. Nameme baje banatsisa munu ibazema, nambe kuzimbalesa bufuko bwabo banataba ngwabo kukandelela kukanene kubwahelela. Babangi banendeka  ngwabo kukandelela ha byuma bibali nabyo kwabakwasele bonwe kupokoka manene mbunge.

BIMWASA KULINGA: Ha litangwa na litangwa, sonekeni byuma bije bimilingisa mukandelele. Ebi byuma kubyapandele kupwa byakama embwe. Binasa kupwa kukandelela ku bimbuto bimunateje, kulyako tubyuma twa kutobala, nambe kwinduka ku litangwa lya mukwabo. Nga musinganyeka hali ebi byuma na kumwesa kukandelela, oku kumilingisa mupwe ba kubwahela.

Kusinganyekesesa lalo ha naanga yeni na hali babusamba beni kumikwasa manene. Nga munanguka bubwa bwabo, munapande kubalekabwo, nambe kubasonekela mukanda, nambe majwi ha foni. Oku kukanyamesa busamba bweni na kumizibisa kubwaha mwafwa munalingila byuma byabibwa.—Vilinga 20:35.

SEZENI MUNU UJE ALINGA BIMATA.

“Kushangumuka lwozi kunapu ngwe kushokolola mema abanaziki. Simbu kanda bicokocoko bishangumuke, katuka uye.”—VISIMO 17:14, NWT.

KETI MULISHOSHOMWENE BYA KULUTWE.

“Keti mulishoshomwene ku litangwa lya imene, omwo litangwa lya imene likalimwena likelyo babenya. Kucitaba kubwezelelako ku tuyando tuje tuli na kwija ha litangwa na litangwa.”—MATEO 6:34.

KETI MULINGE BYUMA MU MATOTO, OLONI BANGENI KUSINGANYEKA.

“Kuzibuka kwobe na kuzibisisa kwobe bikunyunga.”—VISIMO 2:11.