Kulikuta Busamba na Njambi
Mu ñanda ya kulibanga, tunendekele ngwetu banu babangi bamona Mbimbiliya kupwa libulu lya kujela. Bazibuka ngwabo nga baitanda na kupangesa byuma biinendeka, busamba bwabo na Njambi bukanyama, co lalo bazibuka bibali na kuyoyela.
Kwesekesa na Mbimbiliya, ‘munu wa ku sipilitu,’ akaka biyongola bya Njambi kulutwe na kukabangeya mashiko endi. Oloni munu wa ku situ, akalikulahela babenya na kukaba mashungu endi.—Yunda 18, 19; Efeso 5:1.
LILABELELO
CINANGULO CA MU MBIMBILIYA: “Nga uzeya ha simbu ya bukalu, co nzili yobe ipwa yaindondo.”—Visimo 24:10.
BICILUMBUNUNA CINANGULO: Kuzeya kwasa kumanesa nzili yetu ya kulifwita na bukalu bwa mu kuyoya. Oloni lilabelelo litwana nzili ya kulifwita na bukalu. Nga tukala na lilabelelo, tusimpa ngwetu bukalu butuliwana nabwo bunapu bwa simbu yaindondo lika. Tuyanda lika mu kasimbu kakandondo, co hanima, kwija byuma byabibwa.
BIMWASA KULINGA: Singanyekeseseni ha byuma byabibwa bikaija kulutwe. Keti mulishoshomwene ha bukalu buje kanda bwije, nambe kulinyenga ngweni muyoye mwamubwa. Pangeni lika byuma bimunalikumiya kulinga. Anukeni ngweni ‘lubinda lukaija ku munu woshe woshe.’ (Muka-kwambulula 9:11) Bisimbu bimo, byuma byasa kutwendela mwamubwa, mu ngila ije kutwasinganyekele. Mbimbiliya inapangesa cakumwenako ca ndimi mu kumwesa eyi simpi. Inendeka ngwayo: “Kuna mbuto yobe mutondo, co twalaho na kupanga noho cingwezi. Iyajo azibuka? Hamo bipangi byobe bikapwa bya kubezika, na bimbuto byobe bikamena na kwima byakulya.”—Muka-kwambulula 11:6.
KUMUWANA BIKUMBULULO KU BIHULA BYAKAMA BYA MU BUYOYE
CINANGULO CA MU MBIMBILIYA: “Njane mana a kuzibisisa . . . Majwi obe oshe apwa busunga.”—Myaso 119:144, 160.
BICILUMBUNUNA CINANGULO: Mbimbiliya ili na kukumbulula bihula byoshe bibali na kwihula banu. Cakumwenako, ili na kukumbulula bihula bya kufwa ngwe
-
Iya watutangele?
-
Bika bituli na kuyoyela?
-
Bika bikalingiwa ku munu nga natsi?
-
Obu bukebwo lika buyoye buliko ndi?
Banu babangi mu kaye banashubuluka mu buyoye mwafwa banazibuka muinakumbulwila Mbimbiliya ebi bihula.
BIMWASA KULINGA: Neni tondeseseni byuma biilongesa Mbimbiliya. Lekeni umo wa Bakaleho ba Yehova akumikwase kuzibisisa Mbimbiliya nambe yeni ha webusaiti ya jw.org, nambe kubiwano byetu. Kumufwete bimbongo nambe bimo.
BINANGULO BIKWABO BYA MU MBIMBILIYA
Taleni vidio ya Bika Unapande Kulilongesela Mbimbiliya? ha jw.org. Ili mu bindaka bya kutubakana 880?
ZIBUKENI NJAMBI NA KUKABANGEYA MASHIKO ENDI.
“Babwahelela baje banazibuka ngwabo bali mu bujene bwa byuma bya ku sipilitu.”—MATEO 5:3, NWT.
LILONGESENI BYABINGI HALI NJAMBI.
‘Shakezekeni Njambi na kumuwana. Kakele kulako netu embwe.’—VILINGA 17:27.
TANDENI NA KUSINGANYEKESESA HA BYUMA BIMUTANDA.
“Ikeye abwahelela mu kwononoka lishiko lya Shukulu Kalunga. . . . Munu wa cifwa eci abezika mu byoshe byakalingi.”—MYASO 1:2, 3.
Hamo Mushaka Lalo Ebi
KAPOSHI KA KUKENGELA
Mbimbiliya Yatha Kutengulula Vati Kuyoya Kwange?
Eli livulu lya laja linashulu na vinangulo.
