CINANGULO CA MU MBIMBILIYA: “Matumbe a munu uje apanga na nzili amunenela byuma byabingi, oloni baje bazambula kubiwana bapwa lika tuhutu.”—Visimo 21:5.

BICILUMBUNUNA CINANGULO: Singanyekeni mwakupangesela bwino bimbongo byeni. Simbu kanda mulande, anguleni bije bitondeka manene. Anukeni ngweni kumwasa kulanda byuma byoshe bimushaka. Ngeci, pangeseni mwamubwa bimbongo byeni.

BIMWASA KULINGA:

• Landeni lika byuma bimunangula kulanda. Sonekeni byuma bimushaka kulanda na kumwesa bimbongo bya cuma cimo na cimo. Nga kuli cuma cimo citondeka manene bimbongo, co ambateni bimbongo bya cuma cije kucitondeka manene mangana mubwezeleleko. Cakumwenako, nga muwana ngweni bunga bunatulu, co ambateni bimbongo bimunesi kulandele byuma bije kubitondeka manene, hamo mambisiketi, na kubibwezelela ku bimbongo bya bunga.

• Keti mulikobelese mu mikuli. Nga citaba, keti mukongole bimbongo bya munu. Tulikeni bimbongo kamandondo kamandondo kweta noho habipwisilamo kulanda cuma cimushaka. Nga mupangesa kadi mu kukongola byuma, co kushongo ya ngonde munapande kufweta bimbongo byoshe kutewa bamifwetesa soso. Nga muli na mukuli, co pangeleniho mangana muufwete.

   Muzimbu umo ngwawo banu bakapangesa bimbongo byabingi nga balanda byuma kupangesa kadi. Nga muli na kupangesa kadi, co ipangeseni mwamubwa.

CINANGULO CA MU MBIMBILIYA: “Mulwa uje kalimi mahya endi ha simbu ya kulima, kakateje nacimo cahi.”—Visimo 20:4.

BICILUMBUNUNA CINANGULO: Bulwa bukanene buhutu. Ngeci, pangeni na nzili, co pangeseni mwamubwa bimbongo mangana kulutwe mukonwe kukala mu bujene.

BIMWASA KULINGA:

• Pangeni na nzili. Nga mupanga na nzili, babenya cipangi bamikulahela na kushaka kumitumbika ha cipangi.

• Kaleni na busunga. Keti mwibile baje banamikobelesa ha cipangi. Nga banu bananguka ngwabo mwapwa mu bezi, batewa kumikobelesa bipangi.

• Keti mukale na nuna. Nga mushungwiya manene kukala na bimbongo, mwasa kubiisa busamba bweni na bakweni, nameme bene kuminenela mishongo. Anukeni ngweni bimbongo keti bikebyo bya seho manene mu buyoye.

KETI MUBIISILE SIMBU YENI NA BIMBONGO KU BYUMA BYABIBI.

‘Baka-kupenda na baka-kutsa ha kulya, bakapwa tuhutu. Nga ulya na kulala lika tulo, co ukazala bisanyu-sanyu.’—VISIMO 23:21.

KETI MULISHOSHOMWENE MANENE HA BIMBONGO.

“Keti mulishoshomwene ha kuyoya kweni, ngweni tukalya bika, nambe ngweni tukanwa bika, nambe bya mibila yeni ngweni, tukazala bika.”—MATEO 6:25.

KETI MUKALE NA CIPULULU.

“Baka-muuka [nameme baka-cipululu] bashaka bwasi kufuka, kubazibuka buhutu mubukabezila.”—VISIMO 28:22.