CINANGULO CA MU MBIMBILIYA: “Simbu yoshe shakezekeni bije byasa kubwahelelesa bakweni beka lalo, keti mulibwahelelese yeni babenya.”—Filipu 2:4.

BICILUMBUNUNA CINANGULO: Tutumbama mwamubwa na bakwetu nga tubalingila byabibwa, keti kushaka lika ngwetu batulingile byabibwa embwe. Nga mushaka lika ngweni bakweni bamilingile byabibwa, kulingisa mutsiye busamba bweni. Cakumwenako, nga munalume nambe munakazi mu bulo alishaka manene, litangwa limo kumulingisa akalinge bukoi. Banu kubashakele lalo kulikuta busamba na munu uje akalishasha simbu yoshe ha byuma byendi, nameme ha byuma byazibuka. Libulu limo ngwalyo: “Banu baje balishaka babenya na kujeneka kwaka bakwabo mbunge, bakaliwana na bukalu bwabungi.” (The Road to Character)

BIMWASA KULINGA:

• Kwaseni bakweni. Babusamba bababwa balikulahela na kulikwasa simbu yoshe. Muzimbu umo wamwesa ngwawo banu baje bakakwasa bakwabo kubesi kwombwa manene, oloni bakapu ba kubwahelela.

• Zibileni bakweni mema ku mbunge. Lijwi lya mema ku mbunge, lilumbununa kuliziba mwali na kulizibila mukwetu ha bukalu bwendi na kulimona ngwe yetu tuli mu cifwa cendi. Nga muzibila bakweni mema ku mbunge, kumwasa kwendeka nabo majwi amabi aje abazibisa kubihya.

  Kuzibila bakweni mema ku mbunge, kumilingisa mwecelele tupenga twabo. Kumikwasa lalo mujeneke kukala na kaangu na kumilingisa  mulikute busamba na banu ba bisemwa bya kulisezaseza.

• Sikameni na bakweni. Kusikama manene na bakweni, kumilingisa mubazibuke mwamubwa. Munapande kusimutwiya ha byuma byabibwa bibashaka bakweni mangana mulikute nabo busamba. Co batolilileni mwamubwa. Mweseni ngweni muli na kusinganyeka ha bukalu bwabo. Baka-kulilongesa banawana ngwabo “kusimutwiya mwamubwa na banu kubalingisa babwahelele.”

CINANGULO CA MU MBIMBILIYA: “Bwilanyo bwabubi bubiisa bilinga byabibwa.”—1 Kolinte 15:33.

BICILUMBUNUNA CINANGULO: Banu bamulikwatasana nabo bali na nzili ya kumishongangeya kulinga byabibwa nameme byabibi. Baka-kulilongesa futisi ya banu banawana ngwabo babusamba ba munu basa kwendesa buyoye bwendi. Cakumwenako, banawana ngwabo nga munu alikwatasana na baka-kusipa makaya, nambe baje bali na kutsiya malo abo, nendi litangwa limo akashangumuka kusipa makaya nameme kutsiya bulo bwendi.

BIMWASA KULINGA: Likuteni busamba na banu ba bilinga na bifwa byabibwa, bije bimushaka kutembwinina. Cakumwenako, likwatasaneni na banu ba mana, ba kasingimiko, baka-kwana, co lalo ba nzanzu.

KETI MWENDEKE MAJWI AMABI.

“Kwendeka majwi a lishamena abinjisa ku mbunge ngwe munu batibi moko ya mukwale.”—VISIMO 12:18.

PWENI BAKA-KWANA.

“Pwa muka-kwana, co nobe bakakukwasa.”—VISIMO 11:25.

LINGILENI BAKWENI BYUMA BIMUSHAKA NGWENI NENI BAMILINGILEBYO.

“Byuma byoshe bimushaka ngeci bakweni bamilingilebyo, . . . neni lalo balingilenibyo.”—MATEO 7:12.