Kaangu—Neni Muli Nako Ndi?
Kaangu kapwa ngwe mushongo. Baje bali na kaangu banapu lika ngwe bali na kubinja, co bali mu bukalu, oloni bakebo kubazibuka ngoco.
Banu kubesi kumwesa lika kaangu ku banu ba ku lifuti lyeka, muyati weka, cisemwa ceka nambe ndaka yeka, oloni bakamwesa kaangu na ku banu ba bulombelo bweka, ba bushwamwa bweka nambe baje kubesi na byuma byabingi. Bamo bakasompo bakwabo mwamubi mwafwa ya myaka ibali nayo, kujeneka kulilongesa, buyanga nambe sholwesi yabo. Oloni bakalizibi ngwabo kubesi na kaangu.
Neni mwasa kukala na kaangu ndi? Bwingi bwetu, tukamono kaangu ku bakwetu. Oloni kunasa kupwa kwakukalu kuzibuka ngwetu netu tuli nako. Tunapande kuzibuka ngwetu bisimbu bimo, tubaboshe tukakala na kaangu. David Williams muka-kulilongesa bya yoyesi ya banu wendekele ngwendi nga munu wamona banu bamo mu ngila yaibi, co aliwana na umo wabo, “nasa kumulinga mwamubi, oloni kananguka ngwendi nalingi ngoco.”
Cakumwenako, mu lifuti lya Balkan muje mwakala Jovica, mwakala muyati umo ubazinda banu babangi. Jovica ngwendi: “Njakele na kusinganyeka ngwange banu ba muyati uje kubapwile banu bababwa. Oloni kunjanangukile ngwange njakele na kaangu mwafwa njasinganyekele ngwange byuma binjazibukile hali bakebo byapwile bya busunga.”
Bifulumende byabingi binatungu mashiko aje abindika banu kukala na kaangu. Oloni kaangu anga kacili na kutwalelelaho. Mwafwa bika? Mwafwa aje mashiko asa lika kubindika banu kulinga byuma bimo, oloni kuwasa kubabindika kusinganyeka byuma bibashaka. Co tuzibuka ngwetu kaangu kakashangumukila mu mbunge ya munu. Kuma oku kulumbununa ngwabo kaangu kukakahu ndi? Bika byasa kumanesa kaangu?
Mu biñanda binatako tusimutwiya ha binangulo bitanu bije binakwasa banu babangi batundise kaangu mu bimbunge byabo.
