Muzimbu wa Baka-kwambulula Bya Bumwene

Wazibukile oni Byakele na Kuyoyela

YESU wendekele ngwendi azibuka bimanga bendi. (Yowano 10:14) Nga munu wakala na mbunge yaibwa, co lalo wazema kwoloka na busunga, co nasa kulikwatasana na baka-kukabangeya Yesu. Awana byali na kuyoyela ngwe mwalingilile munakazi umo mu Belgium. Ou ukewo muzimbu wendi:

“Bakaleho ba Yehova mubakutotele ha cikolo ca njibo yange, te njazeye, co njakele na kusinganyeka bya kulitsiya. Njashakele bibendekele Bakaleho ha byuma byasa kumanesa bukalu bwoshe bubali na kuliwana nabwo banu mu kaye. Oloni kunjashakele bibanjilekele omwo bendekele ngwabo kuli bimo byalinga Njambi. Te kuneti myaka 8 kutunda hanjecelelele kuya ku ceci. Cibembulu cinjakele na kumonako cikeco canjilingisile njilikele kuyako. Oloni njanangukile ngwange bibakele na kwendeka Bakaleho byapwile bya busunga, co lalo njamwene ngwange kuliyoyela kwa kujeneka Njambi kwakukalu.

“Oloni munima ya kunjendela ha simbu yaindondo, njecelele kulimona nabo lalo. Njalizibile kubindama. Njakele na kusipa tupaketi tubali twa makaya ha litangwa na litangwa, co njashangumukile kupangesa mambanda a kupendesa. Kutundaho, njalikobelesele mu manseno mu kushaka kusimutwiya na bakuku ba banalume. Njakele na kuziba manene lyoba bandemone mubakele na kushaka kunjilinga mwamubi butsiki munjakele na kukala likalyange. Ebi byambatele bingonde.

“Litangwa limo njayongwele kuya na kupashala. Njetile ngila ije kunjakele na kwita, co njawanene mutungo umo ngacije wakama kuje kwakele mbunga ya banu baje bakele na kutunga. Njakasamene olyo litangwa. Munjashwenyene muyehi, njanangukile ngwange Bakaleho ba Yehova bakebo bakele na kutunga Njibo ya Bumwene. Njanukile na Bakaleho baje bakele na kunjendela, co njalyendekesele ngwange cinesi kubwaha manene ngwe banu boshe mu kaye bapwa ngwe Bakaleho.

“Njatondele ngwange ngwe kukala lalo Bakaleho banjendela ha njibo, co njasimutwiiye na bamo banjawanene oku batunga oyo Njibo ya Bumwene. Njalombelele kuli Njambi, co mukwetile matangwa 10, munalume wabangele kusimutwiya nange wezile ku njibo. Wanjilekele ngwendi twasa kutwalelelaho na cilongesa ca Mbimbiliya, co njatabele. Oho bene wanjilanyele kukakunguluka ku Njibo ya Bumwene. Njatambwile oco cilanyo. Binjakamwene byanjikomokesele manene! Njashakele manene kukala mukati ka banu baje balizema umo na mukwabo, co lalo banabwahelela. Co ha simbu oyo njabawanene!

“Kutundoho, njashangumukile kuya ku biwano byoshe. Mukwetile byalumingo bya kweta ku bitatu, njecelele kusipa. Njombilile kuti mabulu a manseno anjakele nawo hamolika na myaso ya bundemone. Co njalizibile ngwange bandemone becelele kukala na nzili hali yange. Njashangumukile kuyoya mu kulitombola na binangulo bya mu Mbimbiliya, co munima ya bingonde bitatu njashangumukile kwambulula muzimbu waubwa. Munima ya bingonde 6, banjimbwitikile. Co munima ya matangwa abali kutunda habanjimbwitikilile, njashangumukile bupainiya bwa kukwasa.

“Njikakandelela kuli Yehova ha byuma byoshe byabibwa byananjilingila. Njili na kumononi binjili na kuyoyela. Lizina lya Yehova lyapwa cimpaka, co lyanjinyungililile omwo njabandelemo. (Visimo 18:10) Njili na kuliziba ngwe mwalizibilile muka-kwimba uje wendekele ku mukanda wa Myaso 84:10 ngwendi ‘litangwa limo lya kukala mu Njubo yobe lyalibwa kutubakana matangwa 1,000 a kukala kweka. Mwamubwa kuli yange kupwa muka-kunyunga ku cikolo ca njubo ya Njambi yange, kutubakana kukala mu membo a baka-bubi.’”

Ou munakazi wa mbunge yaibwa wawanene byakele na kuyoyela. Co mukemwo mwanasa kulingila munu woshe-woshe wa mbunge yaibwa uje ashakezeka Yehova.