Lyakeleni Bilengo Bije Byana Ishamatanga Bumpau

“NGA muka-kujabula kazibuka mwamubwa hanapande kukatutikila, co nasa kungumuka lika na lihunzi.” Munalume umo wa Kaloma wa mu cita ca myaka cakulibanga ikeye wendekele awa majwi. Walumbunwine ngwendi kulyakela bilengo mu kuyoya kukwasa munu ajeneke kungumuka.

Mu Mbimbiliya muli myanja ya banu baje bazibukile mwamubwa seho ya kulyakela bilengo. Nowa wapangele na nzili ha myaka 50 kushonga “bwato mangana obole naanga yendi.” Kapolofweto Mosesa “watalele shwii ha cikandelela cakatambula kulutwe.” (Vahevelu 11:7, 26) Njambi wanene Yoshuwa uje wengile Mosesa cipangi ca kufungulula lifuti lya Kanana.—Kwituluka mu Mashiko 3: 21, 22, 28; Yoshuwa 12: 7- 24.

Mu simbu ya baka-Klistu bakulibanga, kapositolo Paulu walyakelele cilengo ca kulinga cipangi capolofwetele Yesu ngwendi cikalingiwa. Yesu wendekele ngwendi: “Ou muzimbu waubwa wa Bumwene bakawambulula hasi hoshe.” (Mateu 24:14) Majwi a Yesu na cimona camwesele hamo lika na cipangi cibanene Paulu ca ‘kwambulula lizina lya [Yesu] ku baka-mafuti byakwasele Paulu akanyamese bikungulukilo bya mu mitambela yoshe ya Asia Minor na mu Europe.—Vilinga 9: 15; Kolose 1: 23.

Kushwa kunima kweta na lelo lino bangamba ba Yehova banalyakela bilengo na kubishulisilila mu kwana Yehova bumpau. Twasa kulyakela bati bilengo bya ku sipilitu ano matangwa? Bilengo muka bitunapande kulyakela, co bika bitunapande kulinga mangana tubishulisilile?

Munapande Kukala na Biyongola Byabibwa

Twasa kulyakela bilengo bya kulisezaseza mu kuyoya kwetu, co banu babangi mu kaye nabo bashaka kulyakela bilengo. Oloni bilengo bya ku sipilitu binaliseze na bilengo bibakalyakela baka-kaye. Banu babangi mu kaye bakalyakela bilengo mu kushaka kufuka, kutsimana na kukala na nzili ya kulyatelela bakwabo. Ngeci ipwa kusebuka nga tulyakela cilengo mukushaka lika kukala na moko na kutsimana! Tunapande kulyakela bilengo bije byana Yehova bumpau mwafwa ya kushaka kumulemesa na kutwameka bya Bumwene kulutwe. (Mateu 6:33) Bilengo bya cifweci tukalyakelabyo mwafwa ya kuzema Njambi na banu hamo lika na kulyangwila kupangela Njambi.—Mateu 22:37-39; 1 Timateo 4:7.

Biyongola byetu binapande kupwa byabibwa omwo tulyakela bilengo bya ku sipilitu, ipwe mu bipangi bya mu munga nambe bya kukola ku sipilitu. Nameme tuli na biyongola byabibwa, bisimbu bimo bilengo bitukalyakela kubyesi kulishulisilila. Twasa kulyakela bati bilengo na kukala na lishungu lya kubishulisilila?

Tunapande Kukala na Lishungu lya Kushulisilila Bilengo

Acisinganyekeni byalingiwile Yehova mwatangele lilu na kaye. Majwi akwendeka ngwawo “cingwezi lyatokele, co mutondo lyakile” amwesa ngwawo Yehova wabitepele mu bisimbu bya kuliseza ha simbu ya bitangele. (Kushangumuka 1:5, 8, 13, 19, 23, 31) Mwashangumukile kutanga byuma wazibukile cilengo cakele naco. Co Njambi watwaleleleho na biyongola byendi bya kutanga byuma byoshe. (Kujombolola 4:11) Cibenzi Yombi wendekele ngwendi: ‘[Yehova] ashaka kulinga byuma bimo, co abilinga’. (Yombi 23:13) Yehova walizibile mwamubwa mwamwene “byuma byoshe bije byatangele,” co wendekele ngwendi “binabwaha manene”!—Kushangumuka 1:31.

Netu nga tushaka kushulisilila bilengo byetu, co tunapande kukala na lishungu lya kubishulisilila. Bika bitukwasa tukale neli lishungu lya kushulisilila bilengo? Simbu kanda atange kaye, Yehova wamwenenene halutwe mukakasholokela kaye oku kali mu bukambwila na kumulingisa bamwane bumpau na kasingimiko. Mu ngila imolika, netu nga tusinganyekesesa ha bubwa butunda mu kulinga byuma bitushaka kulinga, co kutukwasa tushulisilile cilengo cetu. Ebi bikebyo byalingiwile kuli Tony wa myaka 19. Kebalele byakamwene mwaile lwakulibanga ha ofisi ya munango ya Bakaleho ba Yehova mu Europe. Kutunda bene haje, Tony walihwile mu mbunge yendi ngwendi: ‘Kukazibika bati kuyoya na kupangela ha mutambela wa cifweci?’ Tony watwaleleleleho kusinganyekesesa ha cilengo capandele kulyake na kucishulisilila. Munima ya myaka wabwahelelele manene mubamutambwile kukapangela ha munango.

Kulikwatasana na bakwetu baje banashulisilila cilengo cabo kutukwasa netu tukale na lishungu lya kucishulisilila. Jayson, wa myaka 30, kakele na kulikuwa cipangi ca kwambulula mwapwile wamundondo. Oloni munima ya kumanesa sikola ya sekondali washangumukile cipangi ca bupainiya, co washangumukile cipangi ca simbu yoshe ha kupwa muka-kwambulula muzimbu. Bika byakwasele Jayson akale na lishungu lya kupwa painiya? Wendekele ngwendi: “Kusimutwiya na bakwetu baje bapwa bapainiya na kupanga hamolika nabo mu lihya kwanjishongangeyeye njipwe njipainiya.”

Kusoneka Bilengo Byetu Kutukwasa

Nga kuli cuma cimo citunayongola kulinga, tulinga mwamubwa kwendeka oco cuma mangana tumwese ngwetu tucilinga. Solomoni wanangukile ngwendi majwi amabwa ali na nzili ngwe biti bya kushongomoka, co asa kututwamenena mu buyoye. (Muka-kwambulula 12:11) Nga tusoneka awa majwi, co akala mu bisinganyeka na mu mbunge yetu. Mwafwa bika Yehova washikile bimyene ba Isalele ngwendi balisonekele kopi ya Lishiko? (Kwituluka mu Mashiko 17:18) Ngeci tulinga mwamubwa kusoneka bilengo byetu na kusoneka bingila mutubishulisililamo na kusoneka bukalu butuliwana nabwo nomwo mutunapande kubuhyanena. Tulinga lalo mwamubwa kunanguka mizimbu itunapande kuzibuka mwamubwa na cashu citunapande kukala naco na banu baje basa kutukwasa na kukundwiya biyongola byetu.

Kulyakela bilengo bya ku sipilitu kwakwasele Geoffrey, uje napu painiya wa kulitila ha myaka yaingi uje akapangela ku mutambela wa kulako mu lifuti lya Asia. Waliwanene na bukalu bwa kutsisa munakazi wendi mu kukasumuna. Mu kwita kwa simbu, Geoffrey walyakelele bilengo bya kupanga na nzili mu cipangi ca kwambulula. Munima ya kusoneka matumbe endi ha lipapelo, walombelele kuli Njambi amukwase kuwana banu batatu ba kulilongesa nabo Mbimbiliya ku mamaneselelo a ngonde . Ha litangwa na litangwa wakele na kwituluka mu bipangi byanalingi, co munima ya matangwa 10 wakele na kumona mwanapangelamo. Washulisilile cilengo cendi ndi? Eyo, mwafwa ha lipoti lya mu lihya wamweseleho bilongesa bya Mbimbiliya biwana!

Shangumukeni Kulyakela Bilengo Byabindondo

Bilengo bimo binasa kusholoka ngwe kutwasa kubishulisilila. Tony, itunabanga kwendeka wamwene ngwe kukapangela ha ofisi ya munango ya Bakaleho ba Yehova byapwile lika ngwe bilota. Walizibile ngoco mwafwa yoyesi yendi kuyakele mwamubwa, co te kanda alikundike kuli Njambi. Oloni Tony washangumukile kuyoya mu kulitombola na mashiko a Yehova, co walyakelele cilengo ca kumumbwitika. Munima ya kushulisilila eci cilengo walyakelele lalo cilengo ca kushangumuka bupainiya bwa kukwasa nobu bwa simbu yoshe, co wasonekele ha kalenda yendi matangwa anapande kushangumuka. Munima ya kulinga bupainiya wamwene ngwendi kuma kwasiwa kulyakela cilengo ca kukapangela ha munango.

Netu tulinga mwamubwa kushangumuka kulyakela tahi bilengo byabindondo simbu kanda tucilyakele bilengo byakama. Bilengo bya simbu yaindondo bitulyakela bikebyo bitukwasa mangana tushulisilile bilengo bya simbu yakama. Kumona mutuli na kushulisililamo bilengo bya simbu yaindondo kutukwasa twake lalo mbunge ku bilengo bikwabo bitushaka kushulisilila. Kulomba kuli Yehova simbu yoshe kutukwasa mangana keti twibale bilengo bitunalyakela. Kapositolo Paulu atunangula ngwendi “Lombeleni simbu yoshe”.—1 Tesalonika 5:17.

Kutondeka Kulifwita na Kutwalelelaho

Nameme tuli na cinoneko ca bilengo bitunayongola kulinga na lishungu lya kushaka kulinga ngoco, oloni tunapande kwanuka ngwetu bilengo bimo kutwasa kubishulisilila. Ndongesi Yowano Mako kashulisilile cilengo cendi ca bumishinali omwo kapositolo Paulu wabyanene kuya nendi mu bungenzi bwendi bwamucibali bwa bu mishinali! (Vilinga 15:37-40) Mako walilongeseleko bimo ku cilengo conowele kushulishilila, co walyakelele cilengo ca kupangako bipangi byeka. Walingile bene ngoco. Mu kwita kwa simbu, Paulu wendekele byabibwa hali Mako na kulikuwa kulikwatasana na Kapositolo Petulu mu Mbambilone. (2 Timateo 4:11; 1 Petulu 5:13) Hamo ha simbu ei wabezikile kusoneka muzimbu wa kuhwiminina wa buyoye bwa Yesu na cipangi calingile ca kwambulula.

Netu hamo kunasa kutukaluwila kushulisilila bilengo bimo bitunalyakela. Kutwapandele kulikela embwe, oloni twasa kwituluka mu bilengo byetu na kumona hatunapande kupangela na kutengululako. Nga kunasholoka bukalu buje bushaka kutwonowesa, co tunapande kulifwita keti twilukile munima embwe. Mwene Solomoni wa mana wendekele ngwendi: “Kundika matumbe obe kuli Shukulu Kalunga, co ukabezika mu kuya kulutwe.”—Visimo 16:3.

Bisimbu bimo kunasa kulingiwa byuma bije bitwonowesa kushulisilila bilengo byetu bimo. Cakumwenako, kubinja na bipangi bya mu naanga binasa kutulingisa keti tushulisilile bilengo bimo. Tunapande kwanuka ngwetu fweto yakama inapu kuyoya myaka yoshe mwilu nambe mu Paladaisi hano hasi. (Luka 23:43; Filipi 3:13, 14) Twasa kuwana bati ei fweto? Kapositolo Yowano wasonekele ngwendi: “Oloni uje alinga cizango ca Njambi akalako myaka yoshe.” (1 Yowano 2:17) Nga cifwa citulimo kucitutabesa kushulisilila cilengo cimo, co twasa kutwalelelaho ‘kusingimika Njambi, na kwononoka mashiko endi.’ (Muka-kwambulula 12:13) Bilengo bya ku sipilitu bitukwasa mangana tutwaleleho kupangela Njambi. Ngeci, tupangeseni bilengo byetu mu kwana Ishamatanga bumpau.

[Cipalo]

Bilengo bya ku Sipilitu Bitwasa Kulyakela

○ Kutanda Mbimbiliya ha litangwa na litangwa

○ Kutanda magazini a ngonde na ngonde a Kaposhi ka Kukengela na Toneni!

○ Kupangela ha malombelo etu mangana apwe amabwa

○ Kumwesa bifwa bya bushuka bwa sipilitu

○ Kupangako cipangi cimo ca mu munga

○ Kubwezelela ku butongwe bwa kwambulula na kulongesa

○ Kubwezelela ku cashu ca kwambulula kupangesa foni, mu kutulukwa na kwambulwila ku mitambela ya mbunga