1, 2. Paulu wamwethele vati ngwendi nakandelela ku kutetela kwakama kwa Njambi?

KAPOSITOLO Paulu wendekele vuthunga ngwendi: “Kutetela kuje wanjanene [Njambi] kuchapwile changocho.” (Tandeni 1 Kolinte 15:9, 10.) Paulu wathzivukile ngwendi ngothzi ya Njambi te kuyamupandele, mwafwa wakele na kuyandetha vaka-Kilisitu.

² Omwo thimbu yendi ya kuthsa yashwenyene muyehi, Paulu wathonekelele Timateo ngwendi: “Njakandelela kuli Kilisitu Yesu Mwene yetu, uje nanjitakametha mu vipangi vyange. Njimukandelela omwo kunjiyongwela ngechi njinapandemo na kunjimika kumupangela.” (1 Tima. 1:12-14) Chipangi muka vamwanene? Paulu walekele vakulunu va mu chikungulukilo cha Efeso ngwendi: “Oloni njinayongola ngwange mwonyo wange kuwethi na theho kuli yange, njishaka lika kumanetha vipangi vyange na kumanetha vipangi vije vyanjanene Mwene Yesu ngechi njivilinge, vikevyo kwambulula  viñanda vyavivwa vya kutetela kwa Njambi.”—Vili. 20:24.

3. Chipangi muka cha kulitila chivanene Paulu? (Kengeni chikupulo ha liputa 25 )

³ “Viñanda vyavivwa” vyambulwile Paulu vyapwile vya kufwa vati, cho vyakwathele vati vanu vamone kutetela kwakama kwa Yehova? Paulu walekele vaka-Kilisitu va ku Efeso ngwendi: “Yeni mwathziva ngechi Njambi mu kutetela kwendi nanjana vipangi evi ngechi njimikwathe.” (Efeso 3:1, 2) Paulu vamwanene chipangi cha kwambulula muthzimbu wauvwa kuli vaje kuvapwile vaYunda ngwendi navo vanavathana vakayule na Kilisutu mu fulumende ya Vumwene vwa vumesiya. (Tandeni Efeso 3:5-8.) Omwo Paulu wambulwile na ntwima, nakela vaka-Kilisitu va matangwa ano mwanja wauvwa na kumwetha ngwendi kutetela kwakama kwa Njambi kukwapwile ‘kwangocho’ kuli ikeye.

4, 5. Vika twendekela ngwetu “Viñanda vyavivwa vya Vumwene” anga vikevyo vene “viñanda vyavivwa vya kutetela kwa Njambi”?

⁴ Muno mu matangwa a kukotoka, vanu va Yehova vanavana chipangi cha kwambulula “viñanda vyavivwa vya Vumwene . . . mu kaye mwoshe ngwe kupwa vukaleho ku miyati yoshe.” (Mateo 24:14) Viñanda vitukambulula anga vikevyo “viñanda vyavivwa vya kutetela kwa Njambi” mwafwa Yehova akatuvethzikitha mu Vumwene vwendi mwafwa ya kutetela kwendi kuje kwanatumwetha muli Kilisitu. (Efe. 1:3) Tukatembwinina Paulu mu kwambulula na ntwima managana tumwethe kukandelela kuli Yehova ha kutetela kwendi kwakama ndi?—Tandeni Loma 1:14-16.

⁵ Mu chilongetha chinahu, vatulekele omwo mukwatukwathela kutetela kwakama kwa Yehova ha kupwa vaka-vuvi. Ovu vukwathi vutunawana, vunapande kutushongangeya tukwathe vakwetu vathzivuke chithzemo cha Njambi chije kuchethi kutenguluka nomwo chatha kuvakwathela. Tunapande kuleka vanu ngwetu Njambi namwetha kutetela kwendi kwakama mu vingila muka?

6, 7. Kulumbunwina vanu vya ndando ya kupatula, kunapu vati kwambulula viñanda vyavivwa vya kutetela kwakama kwa Njambi?

⁶ Ano matangwa vanu vavangi muvakalingi vuvi kuvethi kumona ngwavo vanavulumuna, cho na theho ya ndando ya kupatula kuvethi kuimona. Oloni lalo vanu vavangi vanananguka ngwavo vilinga vyavo kuvyethi na kuvanenela kuvwahelela. Vanu vavangi vakananguka vikulumbununa kuviyitha na vukalu vukatundumo novyo vitukwatha tupatuke mu vundungo vwa vuvi nga valilongetha na Vakaleho va Yehova. Vanu va vimbunge vyavivwa vanathzivuka ngwavo Yehova watumine Munendi hano hathi mangana atupatule ku vuvi na ku kuthsa mwafwa ya chithzemo chendi na kutetela kwendi kwakama.—1 Yowa. 4:9, 10.

⁷ Paulu wendekele hali Muna Yehova yathzema ngwendi: “Omwo tunapatuka ha maninga a Kilisitu, ngechi na vuvi vwetu vanavuthambetha, kutetela kwa Njambi kunapu kwakama.” (Efeso 1:7) Ñombelo ya Kilisitu ije yatupatula imwetha ngwavo Njambi watuthzema manene, cho lalo wapwa muka-kutetela. Twavethzika ha kuthzivuka ngwetu nga tumwetha likulahelo mu ñombelo ya Yesu, vuvi vwetu vakavuthambetha, cho lalo tukala na chitaku-taku cha kujela.  (Heve. 9:14) Ou unapu muthzimbu wauvwa utunapande kulekako vakwetu.

8. Mwafwa vika vaka-vuvi vanapande kwiluka kuli Njambi?

⁸ Tuli na chipangi cha kuleka vanu ngwetu vatha kulikuta vuthamba na Ishamatanga wavo. Vanu vaje kanda vamwethe likulahelo mu ñombelo ya Yesu, Njambi akavamono ngwe vitothzi. Kapositolo Yowano wathonekele ngwendi: “Woshe akulahela kuli Mwana ali na mwonyo wa myaka yoshe, woshe avyana Mwana kakala na mwonyo, oloni vukalu vwa Njambi vukala hali ikeye.” (Yowa. 3:36) Tukandeleleni kuli Kilisitu uje natulingitha twathe kulikuta vuthamba na Njambi. Paulu wendekele ngwendi: “Yeni mwakele kulyala na Njambi, cho mwapwile vitothzi vendi omwo vyuma vyavivi vije mwalingile na kuyongola. Oloni ololo, ha kuthsa kwa Munendi, Njambi namipwitha mu vathamba vendi.”—Kolo. 1:21, 22.

9, 10. (a) Kilisitu wanene vandolome vendi va kuvwavetha chipangi muka? (b) “Vimanga veka” vakakwatha vati va kuvwavetha?

⁹ Kilisitu nana vandolome vendi va kuvwavetha vaje vanathala hano hathi “vipangi vya kutengulwitha.” Paulu wavalekele ngwendi: “Vyoshe evi vyatundu kuli Njambi, uje natwimwitha hali Kilisitu kutunda ku vutothzi na kutupwitha vathamba vendi, cho natwana vipangi vya kutengulwitha veka lalo ngechi valyambe nendi. Majwi etu akewo apwa ngechi Njambi wambethele vanu voshe hali Kilisitu. Njambi katha kuvalavela lalo vuvi vwavo, cho ikeye atwana majwi aje atuleka vati navambethela.”—2 Koli. 5:18-20.

¹⁰ “Vimanga veka” vakalithzivi kuvethzika ha kuvatavetha vakwathe vakuvwavetha mu chipangi echi. (Yowa. 10:16) Ha kupwa miluwa nambe ngwetu tunganda twa Kilisitu, “vimanga veka” vali na kufwitangana vyavingi mu chipangi cha kulongetha vanu vuthunga na kuvakwatha valikute vuthamba na Yehova. Echi chipangi cha kwambulula viñanda vyavivwa vya kutetela kwakama kwa Njambi chinapu cha theho.

11, 12. Mwafwa vika kuleka vanu ngwetu vatha kuthimutwiya na Yehova mu lilombelo, unapu muthzimbu wauvwa kuli vakevo?

¹¹ Vanu vavangi vakalombela mwafwa kulinga ngocho kukavathzivitha kuvwaha, oloni kuvakulahelele ngwavo Njambi akatolilila ku malombelo avo. Vanapande kuthzivuka ngwavo Njambi ‘akakumbulula malombelo.’ Ndaviti muka-kwimba wathonekele ngwendi: “Omwo yove ukakumbulula malombelo, vanu voshe vakaija kuli yove. Milonga ya vuvi vwetu inatuhyana, oloni yove watuthambetheleyo.”—Myatho 65:2, 3.

¹² Yesu walekele vandongethi vendi ngwendi: “Nga mulomba chuma chimo mu lithzina lyange, njikachilinga.” (Yowa. 14:14) “Chuma chimo” chilumbununa chuma choshechoshe chitwatha kulomba mwaya chithzango cha Yehova. Yowano wathonekele ngwendi: “Tunathimpi ku mesho a Njambi, omwo tunathzivuka ngwetu ikeye atuthziva nga tumulomba chuma chimo ngwe ku chithzango chendi.” (1 Yowa. 5:14 ) Kunapu kwakuvwa kukwatha vanu vathzivuke ngwavo kulombela kethi chuma chakuthzivitha lika kuvwaha, oloni yapwa ngila itukailamo ku ‘litanda lya [Yehova] Njambi muka-kutetela’ wakama. (Heve. 4:16) Nga tulongetha vanu kulomba vyuma vyavivwa mu ngila yaivwa  kuli Yehova lika, tuvakwatha vapwe vavuthamba vendi, cho avathzembeleka nga vakovela mu vukalu.—Myatho 4:1; 145:18.

13, 14. (a) Vivethzikitho muka vyavivwa vivakalikuwa va kuvwavetha? (b) Va kuvwavetha vakalingila vanu vyuma muka vyavivwa?

¹³ Kutetela kwakama kwa Yehova kutwalelelaho na mu kaye kakaha. Paulu walumbunwine kuvethzika kuje Njambi nana va 144,000 vaje vakayula na Yesu mwathonekele ngwendi: “Njambi wapwa muka-mema ku mbunge, cho na chithzemo chendi kuli yetu chapwa chakama manene ngechi nambe omwo twathsile ku mundthzindthzime a kujeneka kwononoka kwetu, watuyoyethele hamo na Kilisitu. Ha kutetela kwa Njambi ngechi munovoka. Ha kukala kwetu muli Kilisitu Yesu watuthangwile hamo nendi ngechi tukashwane hamo nendi mu lifuti lya mwilu. Walingile evi kupwa chimwetho ku vithimbu vyoshe vije vikaija ha kumwetha vukama vwa kutetela kwendi kuje kutwatha kutheteka mu chithzemo chije chatumwethele muli Kilisitu Yesu.”—Efeso 2:4-7.

¹⁴ Kutwatha kuthzivuka mwamuvwa vyuma vyavivwa vyakana Yehova kuli vaka-Kilisitu va kuvwavetha omwo vakayula na Kilisitu mwilu. (Luka 22:28-30; Fili. 3:20, 21; 1 Yowa. 3:2) Yehova akavamwetha manene “vukama vwa kutetela kwendi kuje kutwatha kutheteka.” Vakevo vakapwa “Yelusalema yaiha” nambe ngwetu shombolwa ya Kilisitu. (Kujo. 3:12; 17:14; 21:2, 9, 10) Vakapangela hamo na Yesu mu “kukangwitha miyati ya vanu” na kukwatha vanu vapatuke ku vundungo vwa vuvi na kuthsa na kuvakwatha vapwe va kuthungama.—Tandeni Kujombolola 22:1, 2, 17.

15, 16. Yehova akamwetha vati kutetela kwendi kwakama kuli “vimanga veka”?

¹⁵ Ku Efeso 2:7 tukatanda ngwavo Njambi akamwetha kutetela kwendi kwakama mu “vithimbu vyoshe vije vikaijako.” Mu kaye kakaha ka Yehova, vanu voshe hathi vakalimwena “vukama vwa kutetela kwendi kuje kutwatha kutheteka.” (Luka 18:29, 30) Ngila ikwavo yakamwethelamo Yehova kutetela kwendi kwakama, ikapwa kuthangula vathsi mu “vimbumbo.” (Yombi 14:13-15; Yowa. 5:28, 29) Vanu va kulongwa vaje vathsile thimbu kanda Yesu athse na “vimanga” veka va mu matangwa a kukotoka vaje vanatwalelelaho kupwa va kulongwa kuli Yehova kutwala na ku kutha, voshe vakathanguka mangana vakatwaleleleho kupangela Yehova.

¹⁶ Vanu vavangi vaje vathsile oku kanda vathzivuke Njambi navo vakathanguka. Navo vakavana thimbu ya kulyangwila chiyulo cha Yehova. Yowano wathonekele ngwendi: “Njamwene vathsi, vakama na ava vavandondo, vemanene kulutwe lwa litanda. Vafukwile mavulu, cho lalo vafukwile livulu likwavo, likelyo livulu lya mwonyo. Cho vathsi vavathompele ngwe ku vilinga vyavo vije vivalingile, ngwe muvavithonekele mu mavulu. Cho mema a kalunga atuwithile vathsi vaje vakelemo. Kuthsa na lifuti lya vathsi lalo vechelele vaje vakelemo. Cho voshe vavathompele ngwe ku vilinga vyavo vije vivalingile.” (Kujo. 20:12, 13) Vaje vakathanguka vakakala na thimbu ya kulilongetha mwakupangethela vinangulo vya mu Mbimbiliya. Kutundoho lalo, vanapande kukakavangeya mashiko amaha aje akakala mu “mavulu” a kuthzenga aje akamwetha vyuma vyashaka Yehova ngwendi vakalinge vaje vakakala mu kaye kakaha. Owo mashiko a mu mavulu  nawo akamwetha kutetela kwakama kwa Yehova.

17. Vika vitunapande kwanuka omwo tulinga chipangi cha kwambulula?

¹⁷ Tunapande kwambulula manene muthzimbu wauvwa wa Vumwene ano matangwa kutuvakana laja, mwafwa kukotoka kuli muyehi. (Mako 13:10) Muthzimbu wauvwa umwetha kutetela kwa Yehova kwakama. Tunapande kwanuka ngocho omwo twambulula. Tukambulula mwafwa tushaka kushangathzala Yehova. Twatha kulinga ngocho nga tuleka vanu ngwetu vyuma vyavivwa vyoshe vivanatukulahetha kukalikuwa mu kaye kakaha vimwetha ngothzi yakama ya Yehova.

18, 19. Vika vitunapande kulinga vije vilingitha kutetela kwakama kwa Njambi kuthsimane?

¹⁸ Omwo twambulula, twatha kuleka vanu ngwetu Vumwene vwa Kilisitu muvukayula, ndando ya kupatula ikashangumuka kukwatha vanu kamandondo kamandondo kweta noho vakapwa va kuthungama. Mbimbiliya ngwayo: “Vyakutanga ku litangwa limo vikapatuke ku vundungo vwa kuthsa, cho vikakale na vumpau vwa kupatuka kwa vana va Njambi.” (Loma 8:21) Kutetela kwakama kwa Yehova kukekwo kukathiwitha evi vyoshe.

¹⁹ Tuli na chipangi cha kuleka vanu vaje vashaka chikulahetho chachivwa chije chili ku Kujombolola 21:4, 5. Vatukulahetha ngwavo: “[Njambi] akathikumuna mithothzi yoshe ku mesho avo. Cho kukukakala kuthsa nambe vuthiwa nambe kulila nambe kukemanga. Omwo vyuma vyalaja vineti.” Yehova uje ali ha litanda nendeka ngwendi: “Ololo njikalinga vyuma vyoshe vipwe vyaviha.” Wendekele lalo ngwendi: “Thoneka evi, omwo majwi awa anapu a vuthunga, vatha kuwakulahela.” Omwo twambulula ou muthzimbu wauvwa na ntwima, cho kutetela kwakama kwa Yehova kuthsimana.