1, 2. (a) Lumbununeni chithimo cha Yesu cha vavenya lihya lya vinyu. (b) Echi chithimo chimwetha vati mukwafwila kwana na kutetela kwakama?

LITANGWA limo mutondo, munu umo wakele na lihya lya vinyu waile ku maliketi na kutonda vanu vakupange mu lihya lyendi. Vanu vakawanene vatavele theteko ya vimbongo vyavakulahethele, cho vashangumukile kupanga. Oloni welukilile ku maliketi lwalwingi na kukatonda vaka-kupanga vakwavo mwafwa watondele vavangi, cho wakulahethele kwana vaka-kupanga voshe vimbongo vya kulumbunuka, hamo lika na vaje vashangumukile kupanga mangwethzi. Omwo vamanethele kupanga, wavakungulwile mangana avafwete vimbongo vyavo, cho wanene theteko ya vimbongo ya kulifwa kuli vaje vapangele litangwa lya mutunu na vaje vapangele lika ola imo. Oloni vaje valivangele, vashangumukile kuyayavala. Cho vavenya lihya wavehwile ngwendi: ‘Kutwalithzivathanene laja ndando ndi? Kuma kunjethi na ndthzili ya kwana vanu vaje vananjipangela theteko ya vimbongo injishaka ndi? Mwavihilila omwo ya kwana kwange ndi?’—Mateo 20:1-15.

² Chithimo cha Yesu chitwanukitha chifwa chimo cha Yehova chije chivanatumbula lwalwingi mu Mbimbiliya cha “mema ku mbunge.” ^[1] (Tandeni 2 Kolinte 6:1.) Vaje vaka-kupanga  vapangele lika ola imo kuvapandele kutambula vimbongo vyavingi, oloni vavenya lihya wavamwethele kutetela kwakama. Ñulungu umo wendekele kukundama ku “kutetela” kwakama kuje kuvanendeka mu viMbimbiliya vyavingi ngwavo “ngothzi” ngwendi: “Eli lijwi lilumbununa kwana munu vwana vuje kuvwamupandele nambe vuje vutuvakana theteko ya chipangi chanalingi.”

3, 4. Mwafwa vika Yehova namwetha kutetela kwakama ku vanu, cho nalingi ngocho mu ngila muka?

³ Mbimbiliya ituleka vya “vwana vwa Njambi vwakama” vwa kutetela kwendi. (Efeso 3:7) Mwafwa vika Yehova akatwana ovu vwana, cho akatwanavo mu ngila muka? Ngwe twatha kwononoka mashiko a Yehova oshe mu kushula, ngwe kutetela kwendi kunatupande. Oloni tukonwa kulinga ngocho. Mukemwo Mwene Solomoni wa mana wendekele ngwendi: “Kukwethi umo hano hathi muka-kulinga vya vuthunga thimbu yoshe uje kethi kulinga vuvi.” (Kwambu. 7:20) Kapositolo Paulu nendi wendekele ngwendi: “Voshe vanalingi vuvi, cho vanangunuka ku kwamena kwa Njambi.” Wendekele lalo ngwendi: “Fweto ya vuvi inapu kuthsa.” (Loma 3:23; 6:23a) Kuthsa kukekwo kunatupande.

⁴ Oloni Yehova wamwethele chithzemo chendi kuli vanu vavavi ha kuvamwetha kutetela kwakama kwa kulitila. Watumine “Munendi umo lika” hano hathi kwa kututhsila. (Yowa. 3:16) Paulu wendekele hali Yesu ngwendi vamupwithile “kathimbu kakandondo lika mwithi ya tungelo, ngechi vene, mu kutetela kwa Njambi napande kuthsila vanu voshe.” (Heve. 2:9) Chili vene, “vwana vwa Njambi vunapu mwonyo wa myaka yoshe muli Kilisitu Yesu Mwene yetu.”—Loma 6:23b.

5, 6. Vika vyatha kwijamo nga (b) vuvi vutushwana? (b) kutetela kwa Njambi kwakama kutwendetha?

⁵ Twatambwile vati vuvi vuje vukatunenela kuthsa tuvavoshe? Mbimbiliya ngwayo: “Ha vuvi vwa munu umolika [Andama] kuthsa kwashwanene” kuli vana va Andama voshe. (Loma 5:12, 14, 17) Oloni twatha kwangula kulinga vyavivwa na kuvyana vuvi vutwendethe. Nga tukulahela ndando ya kupatula ya Kilisitu, cho Yehova atumwetha kutetela kwendi kwakama. Mu ngila muka? “Kuje vuvi vwatumine, kutetela kwa Njambi kwatumine manene. Ngechi vene ngwe omwo vuvi vwashwanene ha kuthsa, ngechi lalo kutetela kwa Njambi kuli na kushwana ha vuthunga, na kututwamenena ku mwonyo wa myaka yoshe hali Yesu Kilisitu Mwene yetu.”—Loma 5:20, 21.

⁶ Nameme twathemuka na vuvi, kutwapandele kutavetha vuvi vutwendethe. Ngechi nga tulinga vuvi, tulombeni Yehova atuthambethe. Paulu wanangwile vaka-Kilisitu ngwendi: “Vuvi kuvwapandele kumishwana embwe, omwo kuyoya ku lishiko embwe, oloni mu kutetela kwa Njambi.” (Loma 6:14) Ngechi kutetela kwa Njambi kwakama kutwendetha. Cho tunganyala vati? Kapositolo Paulu wendekele ngwendi: “Njambi nasholola kutetela kwendi . . . [kuje] kuli na kutulongetha kuvyana yoyethi ya kujeneka kulemetha Njambi na mashungu amavi, na kuyoya yoyethi ya kulemetha Njambi hano ha kaye mu kulinyunga na mu kuthungama.”—Tito 2:11, 12.

7, 8. Kwendeka ngwetu Yehova namwetha kutetela kwendi kwakama mu vingila vya “kulithethzathethza” kulumbununa vika? (Kengeni vikupulo ha liputa 21)

⁷ Kapositolo Petulu wathonekele ngwendi: “Umo na umo, ngwe muka-kupangetha  mwamuvwa vwana vwa Njambi vwa kulithethzathethza, napande kupangetha vwana vwendi vwanatambula kuli Njambi mu kukwatha vakwavo veka.” (1 Petu. 4:10) Echi chilumbununa vika? Chilumbununa ngwavo Yehova atha kutukwatha tukanyame mu vukalu vwoshe vwoshe vutuliwana navwo mu kuyoya. Thimbu yoshe atumwetha kutetela kwendi kwakama nga tuliwana na chetheko.

⁸ Chili vene, Yehova akamwetha kutetela kwendi kwakama mu vingila vya kulithethzathethza. Kapositolo Yowano wathonekele ngwendi: “Ha kushula na kutetela kwendi watuvethzikithile tuvoshe, watwanene vivethzikitho kuvwethzelela ha vivethzikitho vikwavo.” (Yowa. 1:16) Tukatambula vivethzikitho vyavingi mwafwa Yehova akatumwetha kutetela kwendi mu vingila vyavingi. Vivethzikitho muka vimo vitunatambula?

9. Kutetela kwa Yehova kutukwatha vati, cho twatha kumwetha vati kukandelela?

⁹ Natuthambetha ku vivi vyetu. Kutetela kwa Yehova kwakama kukamulingitha atuthambethe vivi vyetu, tunapande lika kutenguluka na kupanga na ndthzili mu kulwitha mashungu etu amavi. (Tandeni 1 Yowano 1:8, 9.) Tupande kukandelela manene ku ngothzi ya Njambi na kumushangathzala. Paulu wathonekelele vaka-Kilisitu vakwavo va kuvwavetha ngwendi: “[Yehova] natwamena ku ndthzili ya lithuthulungu na kutunena mu vumwene vwa Munendi uje yathzema, muli ikeye vanatupatula, kukekwo kuthambetha kwa vivi vyetu.” (Kolo. 1:13, 14) Kuli vivethzikitho vikwavo vyavingi vitwatha kutambula mwafwa ya kututhambetha vivi vyetu.

10. Kutetela kwakama kwa Njambi kutulingitha tulikuwe vika?

¹⁰ Twalikutu vuthamba vwavuvwa na Njambi. Kushwa lika ha kuthemuka kwetu, twapwile vitothzi va Njambi mwafwa ya kujeneka kuthungama. Paulu wendekele ngwendi: “Omwo twapwile tu vitothzi va Njambi, oloni natupwitha vathamba vendi ha kuthsa kwa Munendi.” (Loma 5:10) Kwiluka kuli Njambi kunatulingitha tukale nendi mu kwoloka. Paulu walumbunwine oku kuvethzika omwo walekele vavuthamba vendi mukwafwa kutetela kwa Yehova ngwendi: “Omwo [yetu vaka-Kilisitu va kuvwavetha] natupwitha vaka-vuthunga ku mesho a Njambi ha kukulahela, cho tuli mu kwoloka na Njambi hali Mwene yetu Yesu Kilisitu. Hali ikeye natulingitha ngechi tuthzivuke kutetela kwa Njambi, kuje tuli na kuyoyela ololo.” (Loma 5:1, 2) Oku kunapu kuvethzika kwakama.

11. Vaka-Kilisitu va kuvwavetha vali na kukwatha vati “vimanga veka” kupwa vavavwa ku mesho a Njambi?

¹¹ Tunapu vanu vavavwa. Tuvavoshe twathemuka na vuvi vwetu. Oloni kapolofweto Ndanyele wendekele ngwendi mu thimbu ya kukotoka, “vantwama va mana” nambe ngwetu vaka-Kilisitu va kuvwavetha, vakalongetha “vavangi kulinga vya vuthunga.” (Tandeni Ndanyele 12:3.) Vanakwatha “vimanga veka” kupwa vavavwa ku mesho a Yehova, kwitila mu chipangi chavo cha kwambulula na kulongetha. (Yowa. 10:16) Oloni vanatha kulinga ngocho mwafwa ya kutetela kwakama kwa Yehova. Paulu walumbunwine ngwendi: “Vanavapwitha vaka-vuthunga kuli Njambi ha vwana vwa kutetela kwa Njambi hali Yesu Kilisitu, uje navapatula.”—Loma 3:23, 24.

12. Kulombela kwalitombola vati na kutetela kwa Njambi kwakama?

¹² Twatha kushwenya ku litanda lya Njambi kwitila mu kulombela. Yehova natutavetha kushwenya ku litanda lyendi kwitila mu kulombela mwafwa ya kutetela kwendi kwakama. Paulu watumbwile litanda lya Yehova ngwendi lyapwa “litanda lya Njambi” lya kutetela kwakama, cho wendekele ngwendi ‘tupwe va kuthimpa’ omwo tushwenyako. (Heve. 4:16a) Yehova natwana ovu vwana  kwitila muli Munendi, cho “ha kukulahela kwetu muli ikeye, twatha kuya ku mesho a Njambi na kuthimpa kwoshe.” (Efeso 3:12) Vwana vwa kulombela kuli Yehova inapu ngila imo yanamwethelamo kutetela kwendi kwakama.

13. Kutetela kwa Njambi kwakama kwatha kutukwatha vati nga “tunajeneka”?

¹³ Twatha kuwana vukwathi ha thimbu inapande. Paulu watushongangeyeye kulombela kuli Yehova mu kushuvuluka mangana “tukatambule mema ku mbunge na kutetela kuje akatukwatha omwo tunajeneka.” (Heve. 4:16b) Thimbu yoshe ituliwana na vukalu mu kuyoya kwetu, twatha kulomba vukwathi kuli Yehova muka-ngothzi. Nameme vene te kapandele kututolilila, oloni akakumbulula malombelo etu kupangetha vakwetu vaka-Kilisitu mangana tupwe “vaka-kuthimpa na kwendeka ngwetu, ‘Shukulu Kalunga ikeye mukwathi wange, cho kunjithzivi lyova. Munu atha kunjilinga vikajo?’”—Heve. 13:6.

14. Kutetela kwakama kwa Njambi kukatukwatha vati?

¹⁴ Atha kututhzembeleka nga tunathzeye. Kutetela kwakama kwa Yehova kunatunenela kuvethzika kwa kututhzembeleka mu thimbu ya vukalu. (Myatho 51:17) Paulu wathonekele vaka-Kilisitu va ku Tesalonika vaje vakele mu mapaketho ngwendi: “Mwene yetu Yesu Kilisitu vavenya, na Njambi Tate yetu, uje watuthzemene na mu kutetela kwendi watwanene kutakama kuje kukwethi kutenguluka na chinyangavili cha kukola, amitakamethe na kumikoletha.” (2 Tesa. 2:16, 17) Kuthzivuka ngwetu Yehova ikeye ali na kutulela cho watuthzema, kukatuthzembeleka manene.

15. Kutetela kwa Njambi kwakama kwanenetha tukale na lilavelelo muka?

¹⁵ Tuli na lilavelelo lya kukayoya myaka yoshe. Ha kupwa tu vaka-vuvi, kutakele na lilavelelo. (Tandeni Myatho 49:7, 8.) Oloni Yehova natukulahetha vyuma vyavivwa. Yesu wakulahethele vaka-kumukavangeya ngwendi: “Echi chikecho chithzango cha Tate ngechi voshe vaje vamona Mwana na  kukulahela kuli ikeye vakale na mwonyo wa myaka yoshe.” (Yowa. 6:40) Lilavelelo lya kukayoya myaka yoshe inapu vwana, cho inapu ngila ikwavo ije inamwetha kutetela kwa Njambi kwakama. Paulu uje wamwethele kukandelela wendekele ngwendi: “Omwo Njambi nasholola kutetela kwendi mu kwamena vanu voshe.”—Tito 2:11.

16. Vaka-Kilisitu vamo va kulivanga vakele na vithinganyeka muka vya kuhenga ha kutetela kwakama kwa Njambi?

¹⁶ Nameme kutetela kwakama kwa Yehova kwatunenela vivethzikitho vyavingi, oloni kutwapandele kulilingila vuvi mutushakela. Kuli vaka-Kilisitu vamo va kulivanga vapwile “vaka-kutengulula lijwi ha kutetela kwa Njambi ngechi valithambethe . . . mu mashungu avo amavi.” (Yunda 4) Ava vaka-Kilisitu va kujeneka kulongwa vathinganyekele ngwavo nameme vatwalelelaho kulinga vuvi, Yehova anga avathambetha. Maneneni vethekele kungumuna na vandolome vavo vamo. Na matangwa ano, woshe alinga ngocho “ashaula mundthzindthzime wa mema ku mbunge.”—Heve. 10:29.

17. Kunangula muka kwa ndthzili kwanangwile Petulu?

¹⁷ Satana nalingitha vaka-Kilisitu vamo vathinganyeke ngwavo vatha kulinga vuvi, cho Yehova avathambetha nambe kuvamulombo. Nameme ngwavo Yehova washaka kuthambetha vanu vaje vatenguluka ku vuvi vwavo, oloni ashaka ngwendi tulwithe mashungu etu amavi. Wahwiminine Petulu athoneke ngwendi: “Oloni yeni, vathamba vange, mwavithzivuka laja evi. Ngechi vene, nyanyameni kutewa muthevuka, cho vanu va kujeneka mashiko vakamyungumuna, cho mukawa ku kukoletha kweni. Oloni kakateyeni na kukola mu kutetela na mu mana vya Mwene yetu na Muyoyethi wetu Yesu Kilisitu.”—2 Petu 3:17, 18.

18. Omwo Yehova natumwetha kutetela kwendi kwakama, tunapande kulinga vika?

¹⁸ Tunapande kumwetha kukandelela ku kutetela kwakama kwa Yehova, ha kupangetha vwana vwetu mu kushangathzala Njambi na kukwatha vakwetu. Mu vingila muka? Paulu wendekele ngwendi: “Ngechi vene, tunapande kupangetha vwana vwetu vwa kulyangunuka ngwe ku mema ku mbunge a Njambi aje anatumwetha. . . Nga vwa kupangela, cho tunapande kupanga vene, nga vwa kulongetha tulongetheni vene, nga vwa kutakametha vakwetu, cho tunapande kulinga ngachije vene . . . woshe amwetha ngothzi kuli vakwavo napande kuchilinga na mbwathe.” (Loma 12:6-8) Ngechi, omwo Yehova natumwetha kutetela kwendi kwakama, netu tunapande kupanga na ndthzili mu kwambulula muthzimbu na kulongetha vakwetu Mbimbiliya na kutakametha vandolome na vandokathzi vetu na kuthambetha vaje vatuviyithila.

19. Chipangi muka chivanatwana chitukathimutwiya mu chilongetha chinatako?

¹⁹ Tunapande kumwetha kukandelela ku kutetela kwakama kwanatumwetha Yehova ha kupanga na ndthzili chipangi cha “kwambulula viñanda vyavivwa vya kutetela kwa Njambi.” (Vili. 20:24) Tukathimutwiya ha chipangi echi mu chilongetha chinatako.