HA BISIMBU byabingi, Yesu walongesele bya kulombela. Ha simbu yakele hano hasi, bantwama ba bulombelo bwa Bayunda bakele na kulombelela ha “masambwa-ngila” a bingila byakama. Bika bibakele na kulingila ngoco? Bashakele ngwabo “banu boshe babamone.” Bashakele ngwabo banu bakasame omwo bamona mubali na kukabangeyelamo bulombelo bwabo. Co bwingi bwabo bakele na kulombela malombelo amalaha-laha a kwilukila-ilukila. Bakele na kumwesa ngwe Njambi kuziba malombelo a banu kubanga batumise majwi mu malombelo abo. (Mateo 6:5-8) Yesu wamwesele ngwendi bilinga bya cifwoco byapwile ngwe kusheka lihunzi. Co wakwasele banu ba kwononoka bananguke byuma bije kubapandele kulinga omwo balombela. Oloni Yesu kendekele lika byuma bije kutwapandele kulinga omwo tulombela.

Yesu wendekele ngwendi malombelo etu anapande kumwesa ngwawo tushaka ngwetu lizina lya Njambi balijelese, Bumwene bwendi bwije, co cizango cendi cilingiwe. Wamwesele lalo ngwendi kulomba Njambi ngwetu atukwase mu byuma bimo mu kuyoya kukwabihile. (Mateo 6:9-13; Luka 11:2-4) Wapangesele byakumwenako mu kumwesa ngwendi kutwapandele kujuka kulombela, co lalo tunapande kukala na likulahelo na kupwa ba kulikehesa nga tutonda ngwetu Yehova azibe malombelo etu. (Luka 11:5-13; 18:1-14) Co byuma byalingile mu kuyoya kwendi nabyo byamwesele ngoco.—Mateo 14:23; Mako 1:35.

Byuma byendekele byakwasele bandongesi bendi bazibuke byuma bibapandele kulinga nebi kubapandele kulinga omwo balombela. Nameme ngoco, Yesu wabandamenene kweta na ha butsiki bwendi bwa mamaneselelo asina aleke bandongesi bendi cilongesa ca seho manene ha lilombelo.

Yesu wapangesele bwingi bwa simbu yendi butsiki bwendi bwa mamaneselelo mu kutakamesa tupositolo bendi ba kulongwa. Yapwile simbu yaibwa ya kubaleka byuma bimo byabiha. Wendekele ngwendi: ‘Yange ngila, na busunga, na mwonyo. Naumo wahi aija kuli Tate kubanga etile muli yange.’ Wabalekele lalo majwi amo azembeleka. Wendekele ngwendi: ‘Co njikalinga cuma coshe-coshe cimukalomba mu lizina lyange, ngeci bumpau bwa Tate bukasholoke kwitila muli Mwana. Nga mulomba cuma cimo mu lizina lyange, njikacilinga.’ Omwo wakele na kushwenya ku mamaneselelo a byanakala na kwendeka wendekele ngwendi: “Tunde haje na kweta ku lelo kanda mulombe cuma cimo mu lizina lyange. Lombeni, co mukatambula, ngeci kubwahelela kweni kukapwemo.”—Yowano 14:6, 13, 14; 16:24.

Awa majwi apwile a seho manene. Libulu limo likalumbununa majwi a mu Mbimbiliya ngwalyo ei yapwile “simbu ya kutenguluka kwa byuma kutalesa ku lilombelo.” Kuma aha Yesu walumbunwine ngwendi banu banapande kulombeloni kuli ikeye keti kuli Njambi ndi? Embwe. Aha Yesu washokolwele ngila ibasa kushwenyenamo banu kuli Yehova Njambi.

Tuzibuka ngwetu Njambi natwalelelaho kutolilila ku malombelo a bangamba bendi ba kulongwa. (1 Samwele 1:9-19; Myaso 65:2) Ha simbu yalingile cikumiiyo na Baisalele, baje batondele kulombela kuli ikeye bapandele kunanguka ngwabo Baisalele bapwile banu bangwile. Co mu simbu ya Solomoni, banu bapandele kumona tembele kupwa mwela wangwile Njambi wa kumwanena milambu. (Kwituluka mu Mashiko 9:29; 2 Mizimbu 6:32, 33) Oloni ebi byoshe byapwile bya simbu yaindondo lika. Mukemwo kapositolo Paulu wasonekele ngwendi Lishiko lyanene Njambi Baisalele hamolika na milambu ibakele na kwana ku tembele byapwile ‘munzinzime wa byuma byabibwa bije bili na kwija.’ (Vahevelu 10:1, 2) Co mukwakele byuma mpundu, uje munzinzime kuwapandele kukalako. (Kolose 2:17) Ngeci, kushwa mu 33 C.E., kushwenya kuli Yehova nambe kulikuta busamba nendi kukwemanene ha mashiko a Mosesa. Kunemana ha kwononoka Kilistu Yesu uje iwemanenene mashiko a Mosesa.—Yowano 15:14-16; Ngalatiya 3:24, 25.

Yesu watumwesele ngila itwasa kushwenyenamo kuli Yehova. Wamwesele ngwendi wapwa kabusamba wamubwa uje asa kulingisa Njambi akumbulule malombelo etu. Bika binalingisa Yesu ase kulinga ngoco?

Tubaboshe twasemukila mu bubi. Ngeci, kukwesi bitwasa kulinga nambe milambu itwasa kwana ije yasa kutundisa obu bubi nambe kutulingisa tushwenye kuli Yehova Njambi uje wapwa wa kujela. (Loma 3:20, 24; Vahevelu 1:3, 4) Yesu wanene mwonyo wendi wa kulumbunuka na kwana ndando ya kupatula banu ba kwononoka. (Loma 5:12, 18, 19) Co banu boshe basa kupwa ba kujela “ku mesho a Njambi.” Oloni boshe banapande kukulahela mu ndando ya kupatula ya Yesu na kulombela mu lizina lyendi.—Efeso 3:11, 12.

Nga tulombela mu lizina lya Yesu, tumwesa ngwetu tuli na likulahelo mu byuma bya kweta ku bitatu byanashulisilila mu kulinga cizango ca Njambi: (1) Ikeye “Muna Manga wa Njambi,” co mulambu wendi unalingisa banu base kubakonekela bubi bwabo. (2) Yehova wamusangwile, co napu ‘kapilistu wakama’ uje ali na kumwesa bubwa butunda mu ndando yendi ya kupatula. (3) Ikeye lika napu “ngila” ibasa kushwenyenamo banu kuli Yehova mu lilombelo.—Yowano 1:29; 14:6; Vahevelu 4:14, 15.

Kulombela mu lizina lya Yesu kumwesa kasingimiko kuli Yesu. Co aka kasingimiko kanapande mwafwa cizango ca Yehova. Mbimbiliya ngwayo “byuma byoshe bili mwilu, nebi bili hano hasi, nebi bili mwisi ya kaye bikatsikama ha mabuli, mu kwana kalemeso lizina lya Yesu, co boshe bakambulula ngwabo Yesu Kilistu ikeye Mwene, ku bumpau bwa Njambi Tatetu.” (Filipu 2:10, 11) Kutundaho, tunapande kulombela mu lizina lya Yesu mwafwa kulinga ngoco kwana Yehova bumpau. Co eci cikeco cuma ca seho manene cinapande kutulingisa ngoco.—Yowano 3:16.

Mu Mbimbiliya, Yesu banamutumbula mu bingila bya kuliseza-seza bije bitukwasa kuzibisisa mwamubwa cipangi cendi. Yesu banamwana ‘lizina lya kuhyana mazina oshe.’ * Banamwana moko yoshe ya mwilu nei ya hano hasi.—Filipu 2:9; Mateo 28:18.

Tuzibuka ngwetu tunapande kulombela “mu lizina lya Yesu” nga tutonda ngwetu Yehova azibe malombelo etu. (Yowano 14:13, 14) Oloni kulinga ngoco kukwapandele kupwa ngwe kalingolingo lika. Mwafwa bika?

Acisinganyekeni ha cakumwenako eci: Nga munu natambula mukanda utunda kuli mukwabo muka-mingoso, owo mukanda unasa kuhwa na majwi endeka ngwawo “yange weni.” Kuma awa majwi amwesa bene mwalizibila owo munu ndi? Indi nakaba lika mubakasonekela mikanda ya cifwoco? Ngeci, kupangesa lizina lya Yesu omwo tulombela kukwapandele kupwa lika ngwe mubakalingila banu ku mamaneselelo a mikanda imo. Co nameme tunapande ‘kulombela simbu yoshe,’ tunapande kulinga ngoco ‘na mbunge yetu yoshe.’ Tunapande kulinga ngoco kutundilila kwisi ya mbunge.—1 Tesalonika 5:17; Myaso 119:145.

Bika bimilingisa mujeneke kupangesa endekesi ya “mu lizina lya Yesu” kupwa ngwe endekesi lika? Cuma cimo cimilingisa ngoco cinapu kusinganyekesesa ha bifwa byabibwa byakala nabyo Yesu. Singanyekeseseni ha byuma byanamilingila, nebi byanayongola kumilingila. Omwo mulombela kuli Yehova, kandeleleni kuli ikeye mwafwa ya mwanapangesela Munendi. Nga mulinga ngoco, co mulimwena bubwa bwa majwi a Yesu uje wendekele ngwendi: ‘Nga mulomba cuma coshe kuli Tate mu lizina lyange amyanaco.’—Yowano 16:23.