Mbimbiliya Ikatengulula Buyoye Bwa Banu

“Njecelele Kukala na Kaangu.”—HAFENI NGHAMA

MYAKA: 34

LIFUTI MWANASEMUKILA: ZAMBIA

YOYESI YENDI YA LAJA: RASTA

BUYOYE BWANGE BWA KUNIMA: Njasemukilile mu Zambia mu cilombo ca baka-kwija. Banana batewele mu Namibia ha simbu ikwakele nzita, co bakalikwatasanene na munga ya South West Africa People’s Organization (SWAPO). Ei munga yakele na kulwisa fulumende ya baka-South Africa ije yakele na kuyula lifuti lya Namibia ha simbu ije.

Kutunda hanjasemukilile kwakweta ha simbu injakele na myaka 15, njayoyele mu bilombo bya baka-kwija bya kuliseza-seza. Banike baje bakele mu bilombo bya baka-kwija bya BAKA-SWAPO babalongesele mwakupwila baka-kutwamenena omu mu munga ije yapandele kubapatula. Batulongesele kuzinda bupolitiki na kuzinda bindele.

Munjakele na myaka 11, njashakele kupwa muka-Kilistu mu ceci ije yakele mu cilombo cetu. Omu mu ceci mwakele baka-Roman Catholic, baka-Lutheran, baka-Anglican na bakwabo beka. Ba pasta banjasimutwiiye nabo banjibindikile kulinga ngoco. Kutunda haje bene, njecelele kukulahela byuma bya bulombelo. Munjakele na myaka 15, njashangumukile kulikwatasana na marasta mwafwa njazemene manene myaso ya rege, co lalo njashakele kumanesa kayando kabakele na kuliwana nako banu ba kuzibala. Njashangumukile kukala na rasta, kusipa lyamba, njalikelele kulya situ, co lalo njakele na kukundwiya kupatuka kwa banu ba kuzibala. Co lalo kunjecelele bilinga byange byabibi na kuyongola mafilimu a lwozi. Co njatwaleleleleho kupangesa majwi amabi.

MBIMBILIYA MUYATENGULWILILE BUYOYE BWANGE: Mu 1995, munjakele na myaka 20, njashangumukile kusinganyekesesa ha byuma binjashakele kulinga mu kuyoya kwange. Njakele na kutanda mabulu oshe a marasta anjakele na kuwana. Amo awa mabulu akele na biñanda bya mu Mbimbiliya, oloni kunjakele na kubizibisisa. Ngeci njashangumukile kulitandela Mbimbiliya yange babenya.

Mu kwita kwa simbu, kabusamba kange uje nendi wakele na rasta wanjanene libulu lya Bakaleho ba Yehova libakapangesa mu kulongesa Mbimbiliya. Njashangumukile kulilongesa Mbimbiliya yange babenya kupangesa eli libulu. Mu kwita kwa simbu, njaliwanene na Bakaleho ba Yehova, co njatwaleleleleho kulilongesa nabo.

Njalifwitile mangana njecele kusipa makaya na kunwa manene bwala. (2 Kolinte 7:1) Njatehwile rasta yange, njalikelele kuyongola bikupulo bya bukwizi na mafilimu a lwozi na kupangesa majwi amabi. (Efeso 5:3, 4) Mu kwita kwa simbu, na kangu kanjakele nako ku bindele kahwile. (Vilinga 10:34, 35) Njecele kutolilila ku myaso ije yanjishongeyeye njikale na kangu na kulikela kulikwatasana na babusamba bange ba laja baje bakele na kunjishongangeya kwilukila ku yoyesi yange ya kunima. Oku kwanjikwasele njitenguluke.

Munima ya kwecela kulinga ebi byuma, njatondele Njibo ya Bumwene ya Bakaleho ba Yehova, co njabalombele ngwange njilikwatasane nabo. Bashangumukile kunjilongesa Mbimbiliya. Munjalyangwilile ngwange kunjimbwitika na kupwa Mukaleho wa Yehova, baka-naanga yange kubabwahelelele. Banana banjilekele ngwabo njanguleko bulombelo bweka keti bwa Bakaleho ba Yehova. Banananu baje bakele na citwamo mu fulumende banjilwisile manene mwafwa ya kulikwatasana na Bakaleho.

Oloni kulilongesa bya Yesu, mwayoyelele na banu na kubangeya binangulo byendi kwanjikwasele njikolese mubanjilwisile na kunjishendumuna. Munjesekesele bibakalongesa Bakaleho nebi biyendeka Mbimbiliya, njakulahelele ngwange njinawana bulombelo bwa busunga. Cakumwenako, bakakabangeya lishiko lya mu Mbimbiliya lya kwambulwila bakwabo. (Mateo 28:19, 20; Vilinga 15:14) Co kubesi kulikobelesa mu bupolitiki.—Myaso 146:3, 4; Yowano 15:17, 18.

BUBWA BUNATUNDUMO: Kwononoka mashiko a mu Mbimbiliya kunanjikwasa manene. Cakumwenako, kwecela kusipa lyamba kunanjikwasa njitulike bimbongo binjakele na kubiisila ku lyamba. Njinecela kuyabangela, co lalo njinalikangula mu bwongo na ku mubila.

Ha simbu ino njizibuka binjili na kuyoyela nebi binjinapande kulinga, co ebi bikebyo binjatondele kushwa ku bwanike. Co cuma ca seho manene eci, hano njili na kuliziba kukala muyehi na Njambi.—Yakomba 4:8.