Mbimbiliya Ikatengulula Buyoye Bwa Banu

“Njakele na bihula byabingi.”—RAUDEL RODRÍGUEZ RODRÍGUEZ

MWAKA WA KUSEMUKA: 1959

LIFUTI MWANASEMUKILA: CUBA

YOYESI YENDI YA LAJA: MUKA-KUTENGULUKILA FULUMENDE

BUYOYE BWANGE BWA KUNIMA: Njasemukilile mu Havana, mu Cuba. Njakolelele mu citingitingi muje mwakele buhutu, co lalo mwakele na kukala lwozi kushwakumo. Munjakele na kukola, njashangumukile kuzema manene bweho bwa lwozi bubatumbula ngwabo judo na bweho bukwabo bwa lwozi.

Njakele na kulinga mwamubwa mu bilongesa ku sikola, co bisemi bange bashakele ngwabo njiye ku yuniveziti. Munjakele ku yuniveziti, njashangumukile kuliziba ngwange byuma bimo bya kukundama ku bupolitiki mu lifuti lyetu byapandele kutenguluka. Ngeci, njayongwele kutengulukila fulumende. Nange na mukwetu injakele na kukobela nendi sikola twapupile kapokola na kumubulumuna mwafwa twashakele kumunyeka buta. Owo kapokola wabulumukile manene ku mutwe. Batwakele mu kamenga, co batusompelele kutsa. Ngwabo cibunga ca baka-mata citupilwila mata. Ha simbu oyo, njakele lika na myaka 20, oloni te njili muyehi na kutsa!

Munjakele mu mulili wa kamenga, njakele na kulibwahesela munjikalingila simbu kanda banjipilule. Kunjashakele kukamoneka ngwe njalishoshomwena. Nameme ngoco, njakele na bihula byabingi bije byanjekele mu bishoti. Njakele na kulihula ngwange: ‘Mwafwa bika banu kubesi na kulinga mwamubwa bakwabo mu kaye? Obu bukebwo lika buyoye buliko ndi?’

MBIMBILIYA MUYATENGULWILILE BUYOYE BWANGE: Mu kwita kwa simbu, batengwilile kashitiko kabatwanene na kutwakwila kukala myaka 30 mu kamenga. Hakeho hanjaliwanenene na Bakaleho ba Yehova baje babakutile mwafwa ya likulahelo lyabo. Njakasamene manene munjanangukile ngwange Bakaleho bapwa ba kusimpa, oloni bashaka kukala mu kwoloka na bakwabo. Nameme babakutile kwa kujeneka mulonga, kubalubalele nambe kukala na biyongola bya kuhenga.

Bakaleho banjilongesele ngwabo kuli bimo byatutangelele Njambi. Banjimwesele kutundilila mu Mbimbiliya ngwabo Njambi akatengulula kaye na kukapwisa paradaisi, co kukukakala bukenya nambe banu babakalinga mwamubi. Banjilongesele ngwabo mu kaye mukashula banu bababwa baje bakabezika kuyoya mwamubwa myaka yoshe.—Myaso 37:29.

Njakele na kulikuwa binjakele na kulilongesa kuli Bakaleho, oloni njasinganyekele ngwange kunjikaluwila kutenguluka na kuyoya ngwe bakebo. Njasinganyekele ngwange kunjasa kujeneka kulikobelesa mu byuma bya bupolitiki na kujeneka kwilwisila bubi. Ngeci, njayongwele kutanda Mbimbiliya yange babenya. Munjamanesele kuitanda, njanangukile ngwange Bakaleho ba Yehova lika bakebo bali na futisi ibakele nayo baka-Kristu bakulibanga.

Munjalilongesele Mbimbiliya, njanangukile ngwange njinapande kutengulula futisi yange. Cakumweneko, njapandele kwecela kukala na endekesi imo yaibi injakele nayo ya kufwa ngwe kupangesa majwi a kulisinga. Njapandele lalo kulikela kusipa, na kwecela kulikobelesa mu biñanda bya bupolitiki. Kutengulula futisi yange kukwapwile kwakwasi. Oloni mu kwita kwa simbu, Yehova wanjikwasele njitenguluke.

Cuma cimo canjikaluwilile manene kutengulula capwile kulubala bwasi. Njicikalombo Yehova anjikwase kukwata mbunge. Umo wa mikanda ya mu Mbimbiliya ije inanjikwasa manene unapu mukanda wa Visimo 16:32, uje wendeka ngwawo: “Muka-kujeneka kulubala-lubala wapwa wamubwa manene kutubakana muka-nzili, kulinyunga yobe babenya kwapwa kwakubwa kutubakana kuswana binganda byoshe.”

Mu 1991, banjimbwitikile na kupwa umo wa Bakaleho ba Yehova. Banjimbwitikilile mu mungomo wa mema, mu kamenga. Mwaka wateleko, nange na bakwetu binzinda bamo batupatwile na kututwala ku Spain mwafwa kwakele babushoko bwetu. Munjaketele lika mu Spain, njakakungulukile ku biwano bya Bakaleho ba Yehova. Bakaleho bakanjitambwile mwamubwa ngwe njabangele kukala nabo ha myaka yaingi. Banjikwasele kuwana na hakuliyoyesela.

BUBWA BUNATUNDUMO: Hano njinapu wa kubwahelela. Co njili na kupangela Njambi hamolika na mwebwange na bana betu ba bambanda babali. Njabezika kupangesa simbu yange yaingi mu kukwasa bakwetu balilongese Mbimbiliya. Bisimbu bimo munjikanuka ku bukwenje bwange te kwasala lika simbu yaindondo mangana njitse, njikakandelela manene mwafwa ya byuma binjinawana kutunda haje. Kunjesi na kuyoya lika, njili na lilabelelo. Njabandamena kuyoya mu Paradaisi. Ha simbu oyo, banu boshe bakabalinga mwamubwa, co lalo “kukukakala kutsa.”—Kujombolola 21:3, 4.