Mbimbiliya Ikatengulula Buyoye Bwa Banu

“Njashungwiiye kukala na tate.”—MARCO ANTONIO ALVAREZ SOTO

MWAKA WA KUSEMUKA: 1977

LIFUTI MWANASEMUKILA: CHILE

YOYESI YENDI YA LAJA: MUKA-KWIMBA MYASO YA KALWA MU CIBUNGA CA BAKA-KWIMBA

BUYOYE BWANGE BWA KUNIMA: Njakolelele mu Punta Arenas, nganda yaibwa ili kuyehi na ndonga ya Magellan kuyehi na South America. Munjakele na myaka itanu, bisemi bange balitepele, co njalizibile bulika. Njashungwiiye kukala na tate.

Banana bakele na kulilongesa Mbimbiliya na Bakaleho ba Yehova, co bakele na kuya nange ku biwano bya ku Njibo ya Bumwene. Kunjashakele kuya ku biwano, ngeci njakele na kulubala mutwakele na kuyako. Munjakele na myaka 13, njalikelele kuya ku biwano.

Ha simbu ije, njashangumukile kuzema kwimba myaso, co njanangukile ngwange njakele na cashu ca kwimba. Munjakele na myaka 15, njashangumukile kwimba myaso ya kalwa ku bilika byakama, mu ma bar na ku tubilika twatundondo. Munjakele na kulikwatasana na baka-kwimba baje bazibuka kwimba, njashangumukile kuzema myaso yaibwa ibatumbula ngwabo classical music. Co njashangumukile kulilongesa kwimba ku sikola ya kulilongesela kwimba. Munjakele na myaka 20, njajalukilile ku Santiago mangana njikatwaleleleho na bilongesa byange. Co lalo njatwaleleleleho kwimba myaso ya kalwa.

Nameme njalingile byuma byoshe ebi, kunjapwile wa kubwahelela. Mu kushaka kupwa wa kubwahelela, njakele na kunwa manene bwala na kupangesa bumbanda bwa kupendesa hamolika na baje banjakele na kwimba nabo baje banjamwene kupwa ngwe naanga yange. Njakele na likamba, co sholwesi yange nayo yamwesele ngoco. Njakele na kuzala bizalo bya kuzibala, kulela minjezi na biñambu byabilaha bije byashakele kweta na ha mbunda.

Ha bisimbu byabingi futisi yange yanjilingisile njilwe na banu na kunjikwata ku tupokola. Litangwa limo munjapendele, njakalwisile cibunga ca baka-kulandesa bumbanda bwa kupendesa cije catwakele mu cikela na babusamba bange. Aba baka-kulandesa bumbanda bwa kupendesa banjipupile manene, co banjipokwele mbange.

Oloni byuma bibalingile babusamba bange bikebyo byanjizibisile manene kubabala ku mbunge. Litangwa limo njazibukile ngwange lipangala lyange wakele na kwenda na kabusamba kange wa ha mbunge ha myaka yaingi, co babusamba bange boshe banjishwekelele. Njazibile manene kubabala ku mbunge.

Njelukile ku Punta Arenas, co njakashangumukile kulongesa banu kwimba, co lalo njakele na kwimba muyati umo wa gita. Njatwaleleleleho lalo na cipangi ca kwimba myaso ya kalwa. Njaliwanene na mumbanda umo wamubwa wa lizina lya Sussan, co twashangumukile kukala hamo. Mu kwita simbu, Sussan wazibukile ngwendi baina bakulahelele Cilongesa ca Binjambi Batatu, oloni yange kunjacikulahelele. Ngeci wanjihwile ngwendi: “Busunga buli oni?” Njamukumbulwile ngwange njizibuka ngwange Cilongesa ca Binjambi Batatu capwa ca makuli, oloni kunjizibuka Bisoneka bimwesa ngoco. Nameme ngoco, njazibukile banu bazibuka obyo bisoneka. Njamulekele ngwange Bakaleho ba Yehova basa kumumwesa busunga kutundilila mu Mbimbiliya. Co njalingile cuma cije kunjalingile ha myaka yaingi, njalombelele kuli Njambi na kumulomba ngwange anjikwase.

Mukwetile matangwa amandondo, njamwene munalume umo uje wamonekele ngwe mundambo, co njamwihwile indi wapwile Mukaleho wa Yehova. Nameme sholwesi yange yamuzibisile lyoba, oloni wanjikumbulwile mwamubwa munjamwihwile bya matangwa na simbu ya kukunguluka ku Njibo ya Bumwene. Njalimwenene ngwange Njambi wakumbulwile lilombelo lyange. Njaile ku Njibo ya Bumwene, co njakatumamene ha citwamo ca kunima mangana banu keti banjizibuke. Oloni babangi banjizibukile, mwafwa bakele na kunjimona munjakele na kuya ku biwano te njicili nji mwanike. Banjitambwile mwamubwa na kunjibumbateya, co njalizibile manene kushubuluka. Njalizibile ngwe njineluka kwimbo. Munjamwene munalume uje wakele na kunjilongesa Mbimbiliya te njicili nji mwanike, njamulombele ngwange alilongese nange lalo.

MBIMBILIYA MUYATENGULWILILE BUYOYE BWANGE: Litangwa limo njatandele mukanda wa Visimo 27:11 uje wendeka ngwawo: “Munange, kala na mana, co njikabwahelela.” Njakasamene munjazibukile ngwange munu asa kuzibisa Ishamatanga kubwaha. Njanangukile ngwange Yehova ikeye Tate injashungwiiye kukala nendi mu kuyoya kwange kwoshe.

Njashakele kuzibisa Tate wa mwilu kubwaha ku mbunge na kulinga cizango cendi, oloni njapwile ndungo ku mambanda a kupendesa na bwala ha myaka yaingi. Njazibisisile byalongesele Yesu ku mukanda wa Mateo 6:24 uje wendeka ngwawo, “naumo wahi asa kupangela bashukulu babali.” Omwo njakele na kulifwita kutengulula futisi yange, cinangulo cili ku wa 1 Kolinte 15:33 canjetele ku mbunge. Ou mukanda ngwawo: “Kulikwatasana na banu bababi kubiisa bilinga byabibwa.” Njanangukile ngwange kunjasa kwecela futisi yange yaibi nga njitwalelelaho kuya ku myela kubakala banu ba futisi injishaka kwecela na kulikwatasana nabo. Cinangulo ca mu Mbimbiliya camwesele mwamubwa binjapandele kulinga: Njapandele kujenjuka ku kulinga byuma bije byanjilingisile njikale na futisi yaibi.—Mateu 5:30.

Mwafwa ya kushaka manene myaso, kwanjikaluwilile kwecela kwimba myaso ya kalwa. Co eci cikeco capwile cuma cacikalu manene ku byuma binjapandele kwecela. Oloni babusamba bange ba mu cikungulukilo banjikwasele. Njalikelele kunwa manene bwala na kupangesa mambanda a kupendesa. Njatehwile na biñambu binjakele nabyo hamolika na munjesi, co njecelele na kuzala lika bizalo bya kuzibala. Munjalekele mwebwange Sussan ngwange njitehula biñambu byange, washakele manene kuzibuka binjakele na kulinga ku Njibo ya Bumwene kunjakele na kuya. Wendekele ngwendi, “Njiya neni mangana njikamone bikalingiwa okwo ku Njibo ya Bumwene!” Washakele manene byakamweneko, co mu simbu yaindondo lika washangumukile kulilongesa Mbimbiliya. Mu kwita kwa simbu, nange na ba Sussan twalyambatele. Mu mwaka wa 2008, batumbwitikile na kupwa Bakaleho ba Yehova. Twabwahelela manene mwafwa nange na mwebwange twalikwatasana na banana mu kupangela Yehova.

BUBWA BUNATUNDUMO: Kunjongumukile na kubwahelela kwa makuli na babusamba bababi. Anga njazema myaso, oloni ano matangwa njikangula myaso injikatolilila nambe kwimba. Njikapangesa binjinaliwana nabyo mu kukwasa baka-naanga yange na bakwetu banjatunga nabo, maneneni bakwenje na bambanda. Njishaka kubakwasa kunanguka ngwabo nameme bwingi bwa byuma bili muno mu kaye binasa kusholoka ngwe byabibwa manene, oloni binapu lika “mazilo angoco.”—Filipu 3:8.

Njawana babusamba ba kulongwa mu cikungulukilo ca baka-Klistu, muje mwakala cizemo na kwoloka kwa busunga. Maneneni, kushwenya kuli Yehova kwanjilingisa njilimwene ngwange njinawana Tate.

[Majwi]

“Njinasa kwilukila kuli Yehova mwafwa ikeye nanjikoko”