Lilongeseni Lijwi Lya Njambi
Bika Bikalingiwa ha Litangwa lya Kusompa?
Muno mu ñanda, tusimutwiya ha bihula bimunasa kukala nabyo nomu mumwasa kuwanena bikumbululo mu Mbimbiliya yeni. Bakaleho ba Yehova babwahelela manene kusimutwiya neni na kuwana bikumbululo.
1. Litangwa lya Kusompa lyapwa litangwa lya kufwa bati?
Ngwe mucimwesela cikupulo cili ku cilyo, banu babangi bakasinganyeka ngwabo ha Litangwa lya Kusompa, banu babangi-bangi bakabakungulwila kulutwe lwa litanda lya Njambi na kubasompa kwesekesa na bilinga byabo bya laja. Ngwabo bamo bakabana mwonyo wa kuyoya mwilu, bamoco bakabombila mu litende lya tuhya. Oloni Mbimbiliya imwesa ngwayo Litangwa lya Kusompa likobola banu ku byuma byabibi. (Myaso 96:13) Njambi nangula Yesu kupwa Lyako uje akalingisa banu bakabakule mu kusungama.—Tandeni Isaya 11:1-5; Vilinga 17:31.
2. Litangwa lya Kusompa likalingisa bati banu babasompe mu kusungama?
Munu wakulibanga Adama mwatengulukilile Njambi, watambwisile bana bendi bubi, kuyanda, na kutsa. (Loma 5:12) Mu kumanesa bubi butwatambwile kuli Adama, Yesu akasangula banu babangi baje banatsi. Mukanda wa Kujombolola unamwesa ngwawo ebi byuma bikalingiwa mu myaka 1,000 yakayula Yesu Kristu.—Tandeni Kujombolola 20:4, 11, 12.
Baje bakasanguka kubakabasompo kwesekesa na byuma bibalingile simbu kanda batse. Bakabasompa kwesekesa na byuma bibakalinga omwo byuma bije bili mu “mabulu a kuzenga” abanendeka ku mukanda wa Kujombolola capita 20 bikasholoka. (Loma 6:7) Kapositolo Paulu wendekele ha banu baje bakasanguka na kulilongesa bya Njambi ngwendi: “banu boshe bababwa naba bababi.”—Tandeni Vilinga 24:15.
3. Byuma Muka Byabibwa Bilikanena Litangwa lya Kusompa?
Baje batsile oku kanda bazibuke Yehova Njambi na kumupangela, bakabezika kuwana simbu ya kutenguluka na kulinga byabibwa. Nga bakalinga byabibwa, co kusanguka kwabo kukatenguluka kupwa ‘kusangukila ku mwonyo.’ Oloni bamo baje bakasanguka bakabyana kulilongesa bya Yehova. Co kusanguka kwabo kukapwa kwa ‘kusangukila ku cihiso.’—Tandeni Yowano 5:28, 29; Isaya 26:10; 65:20.
Mulikahwa Litangwa lya Kusompa lije likapwa myaka 1,000, Yehova co namanesa kwilwisila banu boshe ba kulongwa ku kulumbunuka ngwe mwatangelele banu bakulibanga. (1 Kolinte 15:24-28) Oku kukapwa kubezika kwakama manene kwa banu ba kulongwa! Ha ceseko camamaneselelo, Njambi akatundisa Satana Liyabolo mu mbulu ya kuloba mubakamukutila ha myaka 1,000. Satana akeseka lalo kulingisa banu batunde kuli Yehova. Oloni baje bakamubyanena bakalikuwa kuyoya myaka yoshe hano hasi.—Tandeni Isaya 25:8; Kujombolola 20:7-9.
4. Litangwa muka lalo lya kusompa lije likanenela banu bibezikiso?
Mbimbiliya inapangesa lalo endekesi ya “litangwa lya kusompa” kutalesa ku simbu ije ikapwa mamaneselelo a futisi ya kano kaye. Eli litangwa lya kusompa likaija mu kukasumuna ngwe mulyezilile Libazi lya mu simbu ya Nowa, lije lyanyongesele banu boshe bababi. Twabwahelela manene kuzibuka ngwetu kunyonga kwa “baka-bubi” kukalingisa kukakale kaye kakaha muje “mukakala busunga.”—Tandeni 2 Petulu 3:6, 7, 13.
