• MWAKA WA KUSEMUKA: 1963

• LIFUTI MWANASEMUKILA: BRITAIN

• YOYESI YENDI YA LAJA: WAKELE NA KUPANGA BIPANGI BYA BULEMU

BUYOYE BWANGE BWA KUNIMA:

Njasemukilile mu Croydon ku South London. Twasemukile tu ba 9, co yange wa bu 6. Bisemi bange batundile ha liñanda lya Caribbean mu St. Vincent. Banana bakele na kuya ku ceci ya Methodist. Njashakele manene bya kulilongesa, oloni kunjashakele kulilongesa bya Njambi. Sikola muyakele na kushoka, njakele na kukala manene ku ngenge ya lishali oku njitanda mabulu amangi anjakele na kulomba ku laibrali.

Mukwetile myaka yaindondo kutunda hanjamaneselele sikola, njayongwele ngwange njikwase baje kubakele nou wa kubakwasa. Ngeci, njashangumukile kukwasa baje kubakele noku kwakukala na biyanga. Co njaile ku yuniveziti kukalilongesa bya kusaka. Munjamanesele, njakobelele bipangi bya bulemu bya kuliseza-seza, co njakele na kuyoya mwamubwa manene na kulanda byuma bya ndando ya helu. Ha kuwana ngwe njakele na kupanga cipangi ca kutondesesa na kunangula, njakele na kupangesa lika laputopu na Intaneti. Ngeci, njakele na kuya na fulai ku mafuti a kuliseza-seza ha byalumingo bya kupwamo, co njakele na kulikuwa kukala mu mahotela anjashakele, kukamona myela yaibwa na kuya ku myela kwa kulingila bweho bwa kukanyamesa mubila. Njalizibile ngwange njakele na kuyoya mwamubwa manene. Oloni kunjecelele kuzibila ngozi baka-kuyanda.

MBIMBILIYA MUYATENGULWILILE BUYOYE BWANGE:

Ha myaka yaingi, njakele na kulihula ngwange, ‘Bika bituli na kuyoyela?’ Oloni kunjesekele kutonda cikumbululo mu Mbimbiliya. Litangwa limo, mu 1999, shongo yange Margaret na kabusamba kendi baje bapwile Bakaleho ba Yehova banjendelele, co kabusamba kendi wamwesele ngwendi wanjakele mbunge. Njatabele kulilongesa Mbimbiliya nowo kabusamba kendi, oloni kutwakele na kulilongesa simbu yoshe mwafwa njazezamene manene.

Mu 2002, ha simbu ya ntondwe, njajalukilile ku southwest England. Munjaketele kuje, njaile ku yuniveziti kukatwalelelaho na bilongesa byange bya kutondesesa mangana njikale na digiri ya helu manene (doctorate.) Njashangumukile kuya ku biwano kushwa kumo na munange wa mukwenje. Nameme njakele na kulikuwa bilongesa bya ku yuniveziti, kulilongesa Mbimbiliya kwanjikwasele njizibisise mwamubwa bili na kulingisa banu baliwane na bukalu nebi bikabumanesa. Njalimwenenene busunga bwa majwi ali ku mukanda wa Mateo 6:24 uje umwesa ngwawo munu kasa kupangela bashukulu babali. Njapandele kwangula indi njipangela Njambi nambe kushakezeka bufuko. Njanangukile ngwange njapandele kwangula binjaka mu mutamba wakulibanga mu kuyoya.

Mu mwaka wa 2001, njakele na kuwaniwa kushwa kumo ku cibunga kuje kubakele na kulilongesela Mbimbiliya Bakaleho mu libulu lya Is There a Creator Who Cares About You? a Njalimwenenene ngwange Ishamatanga yetu Yehova lika ikeye asa kumanesa bukalu bubali na kuliwana nabwo banu. Oloni ku yuniveziti kukekwo bakele na kutulongesa ngwabo banu basa kuliyoyela kwa kujeneka Ishamatanga. Njalubalele manene. Ngeci, munima ya bingonde bibali, njatundile ha yuniveziti mangana njiwane simbu yaingi ya kulilongesa bya Njambi.

Mukanda wa Visimo 3:5, 6 ukewo wanjilingisile njitengulule buyoye bwange. Ou mukanda ngwawo: “Kulahela kuli Shukulu Kalunga na mbunge yobe yoshe. Keti ujendamene ku mana obe babenya. Simbu yoshe taba Shukulu Kalunga ngeci akutwamenene, co akakumwesa bingila bya busunga.” Kulilongesa bya Njambi yetu wa cizemo kwanjilingisile njipwe wa kubwahelela kutubakana bufuko na lutsimo lunjinesi kukala nalwo mwafwa ya kukala na digiri ya helu manene (doctorate.) Kutwalelelaho kulilongesa biyongola bya Yehova ha lifuti-libu nebi byalingile Yesu omwo wanene mwonyo wendi hali yetu kwanjilingisile njilikundike kuli Ishamatanga yetu. Mu April 2003, banjimbwitikile. Kutundaho, njasiwisile buyoye bwange kamandondo-kamandondo.

BUBWA BUNATUNDUMO:

Kukwesi cuma citubakana busamba bwange na Yehova. Kumuzibuka kunanjilingisa njikale mu kwoloka na kupwa wa kubwahelela. Co lalo njabwahelela mwafwa njili na babusamba baje bazema Yehova.

Njicili na lihwila lya kushaka kuzibuka byabingi, oloni lili na kuhwa omwo njili na kulilongesa Mbimbiliya na kukunguluka. Njikalikuu kulekako bakwetu binjakulahela. Eci cikeconi cipangi cange, co cili na kunjilingisa njikwase banu bakale na buyoye bwabubwa ha simbu ino na kukala na lilabelelo lya kukayoya mwamubwa mu kaye kakaha. Kushwa mu June 2008, njili na kupanga cipangi ca simbu yoshe, co njinapu wa kubwahelela na kushubuluka manene kutubakana kunima. Njazibukoni binjili na kuyoyela, co njakandelelako manene kuli Yehova ha kunjikwasa.