BAKA-KILISTU babangi banalyangwila kujeneka kulinga cilika ca Kilisimasi. Bakalizibi bati mwafwa ya byuma bibanangula? Kuma bakalizibi ngwabo kuli bimo bili na kubeta ndi? Kuma bana babo bakalizibi ngwe kuli bimo bibanabomina ndi? Tandeni biñanda binatako bibanendeka Bakaleho ba Yehova mu kaye koshe kutalesa ku cilika ca Kilisimasi.

Kwanuka Yesu Kilistu: “Simbu kanda njipwe umo wa Bakaleho ba Yehova, kunjakele na kuya manene ku ceci. Nga ngwabo tangwa olyo njinaiko, co kubanga ha Kilisimasi nambe ha Isita. Nameme ngoco, kunjakele na kusinganyeka bya Yesu Kilistu. Njalikele kulinga cilika ca Kilisimasi, oloni ha simbu ino njikai ku biwano bya baka-Kilistu lubali mu calumingo na kulongesa banu biyendeka Mbimbiliya hali Yesu!”—EVE, WA KU AUSTRALIA.

Kubwahelela kukatundu mu kwana: “Njikabwahelela manene munjikatambula bwana buje kunjasinganyekele. Njashaka bwana bwa kukasumuna! Co lalo njazema kupangela banu macadi na kubasonena bikupulo mwafwa kukabazibisa kubwaha, co nange njikapu wa kubwahelela.”—REUBEN, WA KU NORTHERN IRELAND.

Kukwasa baje bali mu bujene: “Tukalikuu kutekelela babezi byakulya. Simbu imo tukabatwalela bintemo, keki, nambe bwana bumo bwabundondo mangana tubazibiseko kubwaha. Tukalikuu kulinga byoshe ebi mwafwa twasa kubamenekela simbu yoshe-yoshe.”—EMILY, WA KU AUSTRALIA.

Likwatasano mu naanga: “Binaanga byetu mubikaliwana, bana betu bakazibuka bainanu, bateñazi yabo, bakuku yabo, na bashonyabo oku banalibandeka. Ha kuwana ngwe twasa kwendela baka-naanga yetu simbu yoshe-yoshe, twazituka, co binaanga byetu bizibuka ngwabyo tukabendela mwafwa twabazema.”—WENDY, WA KU CAYMAN ISLANDS.

Kwoloka: “Ha simbu ya Kilisimasi banu bakazezama manene, kubesi kuwana nambe simbu ya kusinganyekesesa ha kwoloka. Njinalilongesa biinatukulahesa Mbimbiliya, ngeci njashubuluka. Njizibuka ngwange bana bange bakalikuwa kuyoya mu kubwahelela kulutwe.”—SANDRA, WA KU SPAIN.