Njasemukilile mu nganda ya Santo Domingo mu lifuti lya Dominican Republic, co yange wamuciwana. Bisemi bange bapwile ba kulilongesa, co batondele ngwabo tukole mwamubwa, mukati ka banu bababwa. Myaka iwana simbu kanda njisemuke, bisemi bange baliwanene na bamishinali ba bulombelo bwa Mormon. Mubamwene mubasholokelele mwamubwa bakwenje babendelele na kumona ngwabo bakele na futisi yaibwa, bisemi betu bayongwele ngwabo naanga yetu ipwe imo ya binaanga byakulibanga oho ha liñanda kulikwatasana na Ceci ya Yesu Kristu ya Matangwa Ano nambe ngwetu ceci ya Mormon.

Munjakele na kukola, njakele na kulikuwa bitwakele na kulingila hamo na bakwetu ku ceci. Njamwene ngwange ceci ya Mormon yakele mbunge ku kukala mwamubwa kwa naanga na kushongangeya banu bakale na futisi yaibwa. Njashakele manene kupwa Kamormon, co njashakele kupwa kamishinali.

Munjakele na myaka 18, naanga yetu yajalukilile ku America mwafwa yashakele ngwayo njikaye ku yuniveziti yaibwa. Mukwetile mwaka, banana bashongo ya banana na batate yetu baje bapwile Bakaleho ba Yehova batumenekelele mu Florida. Batulanyele ku ciwano cimo. Njakasamene munjamwene banu boshe bakele muyehi nange bafukula Bimbimbiliya byabo na kusoneka bisimpi. Co nange njalombele lipapelo na cisonekeso mwafwa njashakele kubatembwinina.

Ciwano mucahwile, obo banana na batate banjilekele ngwabo ha kuwana ngwe njishaka kupwa kamishinali, basa kunjikwasa kulilongesako bimo kutalesa ku Mbimbiliya. Co nange njamwene ngwange obyo byapwile biyongola byabibwa. Njakele na kutanda manene Libulu lya Ceci ya Mormon, oloni kunjazibukile mwamubwa Mbimbiliya.

Simbu yoshe mutwakele na kusimutwiya bya Mbimbiliya ha foni, obo banana na batate bakele na kunjishongangeya kwesekesa byuma binjakulahelele nebi biyendeka Mbimbiliya. Bashakele ngwabo njilimwene busunga yange babenya.

Kuli byuma byabingi bya mu bulombelo bwa Mormon binjakulahelele. Oloni kunjamwene mubyalitombwelele nebi biyendeka Mbimbiliya. Banana ba banike banjituminine Toneni! ya November 8, 1995 ibatuhwile Bakaleho ba Yehova. Omwo mu Toneni! mwakele biñanda bimo byendekele ha byuma bibakulahela mu bulombelo bwa Mormon. Njalikasamenene munjanangukile ngwange kwakele bilongesa byabingi bya bulombelo bwa Mormon bije kunjazibukile. Ebi byanjilingisile njiye na ha webusaiti ya bulombelo bwa Mormon mwafwa njashakele kulimwena indi bibendekele omwo mu Toneni! byapwile bya busunga. Njalimwenenene ngwange mukemwo bene. Co munjaile ku mamiziyamu a bulombelo bwa Mormon aje ali mu mutambela wa Utah mu America, njakalimwenenene bukaleho bukwabo.

Njakele na kusinganyeka ngwange biñanda bili mu Libulu lya Ceci ya Mormon byalitombola nebi biyendeka Mbimbiliya. Oloni munjashangumukile kwaka mbunge ku kutanda Mbimbiliya, njashangumukile kunanguka bilongesa bya bulombelo bwa Mormon bije kubilitombola nebi biyendeka Mbimbiliya. Cakumwenako, ku mukanda wa Ezekiyele 18:4, Mbimbiliya ngwayo mwonyo ukatsi. Oloni Libulu lya Ceci ya Mormon ku mukanda wa Alma 42:9 ngwalyo: “Mwonyo kuwasa kutsa.”

Byuma bibakulahela mu bulombelo bwa Mormon keti bikebyo lika kubyakele na kunjizibisa bwino ku mbunge. Omu mu bulombelo bakakundwiya biyongola bya kushaka manene lifuti lyendi munu. Cakumwenako, mu bulombelo bwa Mormon bakalongesa ngwabo citungu ca Edeni cakele mu mutambela wa Jackson County mu Missouri, ku America. Co lalo tupolofweto bei ceci ngwabo “Bumwene bwa Njambi mubukashangumuka kuyula, Njambi akapangesa fulumende ya America, co pandela ya America ikalihwinga mu kwimanena lisesa lya banu na kupatuka kwabo.”

Njakele na kulihula ebi byuma mubyakundamenene lifuti kunjasemukilile hamolika na mafuti akwabo. Litangwa limo mangwezi njakatwile ei ñanda omwo Kamormon umo wa mukwenje ibakele na kulongesa bumishinali wanjituminine foni. Njamwihile indi asa kulwa na mukwabo Kamormon nga kwakatukile nzita mukati ka lifuti lyendi na lifuti lyowo mukwabo. Njakasamene mwakumbulwile ngwendi asa kulinga ngoco. Njatwaleleleleho kutondesesa byuma binjakulahelele, co njehwile na bantwama ba ceci ya Mormon bihula bimo. Banjilekele ngwabo kukwesi bwino bikumbululo bibasa kuwana banu kubanga nga ceke cilibwezelela.

Bikumbululo byabo byanjizeyesele, co njasinganyekeseseleho na kwilula binjatondelele kupwa kamishinali wa bulombelo bwa Mormon. Njamwene ngwange cumo cimo canjilingisile njishake kulinga ngoco capwile kushaka kukwasa bakwetu. Cuma cikwabo capwile kushaka kasingimiko kakama. Oloni kunjazibukile mwamubwa bya Njambi. Co lalo nameme bisimbu bimo kunima njakele na kutanda Mbimbiliya, kunjamwene seho yayo. Kunjanangukile biyongola byakele nabyo Njambi omwo watangele lifuti-libu na banu.

Kulilongesa Mbimbiliya na Bakaleho ba Yehova kwanjikwasa kuzibuka lizina lya Njambi, bikalingiwa ku munu nga atsa, cipangi ca Yesu mu kushulisilila cizango ca Njambi hamolika na byuma bikwabo binjinazibuka. Njashangumukile kuzibisisa mwamubwa Mbimbiliya, co njakele na kulikuwa kulekako bakwetu busunga bunjakele na kulilongesa. Njazibukile ngwange Njambi kwakala, oloni ha simbu oyo njasele na kusimutwiya nendi kwitila mu lilombelo ha kupwa Kabusamba kange wakama manene. Banjimbwitikile lya July 12, 2004, co njapwile umo wa Bakaleho ba Yehova. Munima ya bingonde 6, njashangumukile cipangi ca simbu yoshe ca kwambulula.

Njapangelele ku cikota ca Bakaleho ba Yehova ku Brooklyn mu New York ha myaka itanu. Njalikuwile manene kukwasa mu kutuhula Bimbimbiliya na mabulu aje anemana ha Mbimbiliya bije bili na kukwasa banu babangi-bangi mu kaye. Co njicili na kutwalelelaho kukwasa bakwetu balilongese bya Njambi.