Njakolelele mu mbonge ya Warialda ije yakala mu New South Wales. Ku Warialda kwakala bipangi bya kuliseza-seza bya bundimi. Bamo bakalele bangombe na bimanga, co bakwabo bakalimi bimbuto bya binona na bimbuto byeka. Mbonge yaco yapwa ya kujela, co lalo kumwesi manene bukenya.

Munjakele na myaka 13 njashangumukile kupanga mangana njiwane byuma byakulikwasesa na baka-naanga yange mwafwa yange ntwatwa, co njili na bishongo bange ba kupwa 10. Njakele na kupanga mu mahya mwafwa kunjalilongesele manene. Munjakele na myaka 15, njashangumukile kunyunga tubalu na kulongesa tubalu ba mu shwata mangana bapwe bimuna ba hembo.

Kupanga mu mahya kwanjikwasele njibezike, co lalo kwanjilingisile njililongese futisi yaibi. Njakele na kulikuwa cipangi, co lalo mwela waco wapwile waubwa kukalako. Munjakele na kutumama ku coto butsiki njakele na kukenga mwilu oku njiyongola ngonde na bingongonosi, co lalo njakele na kuziba lwengo lwalubwa lwa miti ya mu bishwata bije byatuzengelekele. Simbu imo njasinganyekele ngwange kuli umo watangele ebi byuma byabibwa ngacije. Oloni banu banjakele na kuyoya nabo mu mahya bakele na bilinga byabibi. Kakangi njakele na kuziba banu balisinga, co lalo baka-kusipa balisalele. Ngeci, nange njashangumukile kusipa na kulisinga.

Munjakele na myaka 18, njajalukilile ku Sydney. Njashakele kukobela buswalale oloni banjibyanenene mwafwa kunjakele na mapapelo a ku sikola. Njawanene cipangi ceka, co njakele mu Sydney ha mwaka umo. Ha simbu ije bene hakeho hanjaliwanenene na Bakaleho ba Yehova. Njatambwile cilanyo cabo ca kukakunguluka ku biwano byabo, co munjaileko njakanangukile ngwange bilongesa byabo byemana ha busunga.

Oloni munima ya simbu yaindondo lika, njayongwele bya kwiluka lalo ku mahya. Njaile ku Goondiwindi mu Queensland. Njawanene cipangi, njambatele munakazi, co calubinda njashangumukile na kunwa bwala.

Twakele na bana babali. Munange wa munalume mwasemukile, njashangumukile kusinganyekesesa mubukafwila buyoye bwange kulutwe. Njanukile binjakazibile ku biwano bya Bakaleho ha simbu injakele mu Sydney, co njayongwele kupangesa binjakalilongese.

Njawanene Kaposhi ka Kukengela habasonekele keyala ya ofisi ya munango wa Australia ya Bakaleho ba Yehova. Njatumineko mukanda wa kulomba bukwasi. Banjituminine Mukaleho umo uje wa ngozi na cizemo uje wanjendelele. Munima ya simbu yaindondo washangumukile kulilongesa nange Mbimbiliya.

Munjashangumukile kulilongesa Mbimbilya njanangukile ngwange njapandele kutengululako bimo mu buyoye bwange. Majwi ali ku mukanda wa 2 Kolinte 7:1 anjetele manene ku mbunge. Ou mukanda utushongangeya ngwawo “tulijelese ku kujwala kwoshe kwa situ.”

Ngeci, njayongwele kwecela kusipa na kunwa manene bwala. Kwapwile kwakukalu kwecela mwafwa njasipile na kunwa manene bwala ha myaka yaingi. Oloni njalyangwilile kuyoya mu ngila ije izibisa Njambi kubwaha ku mbunge. Cuma canjikwasele manene capwile kupangesa cinangulo cili ku Loma 12:2. Ou mukanda ngwawo: “Keti mutabese katumameno ka myaka ino kamimunge, oloni tengululeni bisinganyeka byeni.” Njanangukile ngwange nga njishaka kutenguluka, co njapandele kutengulula bisinganyeka byange na kumona kusipa na kunwa manene bwala ngwe mwakabimwena Njambi kupwa byabibi. Ebi bene bikebyo byanjikwasele njecele kusipa na kunwa manene bwala.

Oloni cuma canjikaluwilile manene capwile kulikela kulisinga. Njazibukile cinangulo ca mu Mbimbiliya cije cili ku mukanda wa Efeso 4:29 ca kwendeka ngwabo: “Mu kanwa keni keti mutunde lijwi lya kubola.” Nameme ngoco, kwanjikaluwilile kwecela bwasi kulisinga. Oloni kusinganyekesesa ha mukanda wa Isaya 40:26 kwanjikwasele manene. Ou mukanda wendeka ha bingongonosi ngwawo: “Anduleni mesho eni kwilu! Iyajo watangele bingongonosi bije muli na kumona? Uje abitwamenena ngwe maswalale, ikeye azibuka bungi bwabyo, co abisana byoshe ha mazina abyo! Nzili yendi yapwa yakama manene, naimo ngongonosi yahi yazimbalaho.” Njamwene ngwange nga Njambi ali na nzili ya kutanga byuma byoshe bije bikanjizibisa mwamubwa nga njibitala, cili bene asa kunjana nzili ya kutengulula futisi yange mangana njimuzibise kubwaha. Munjalombelele manene na kulifwita, njashangumukile kwendeka mu ngila yaibwa.

Munjakele na kulinga cipangi ca kunyunga tubalu kunjakele na kusimutwiya menene na banu mwafwa ku mahya kunjakele na kupangela, banu babandondo. Oloni ku biwano bya Bakaleho ba Yehova njalilongesa kusimutwiya na banu. Byuma binjikalilongesa oku ku biwano byanjikwasa njase kulekako bakwetu muzimbu waubwa wa Bumwene bwa Njambi.—Mateu 6:9, 10; 24:14.

Njinapu mukulunu mu cikungulukilo ha myaka yaingi. Kunapu kubezika kwakama kulingako binjasa mu kukwasa bakwetu baka-kukulahela. Cuma cikanjizibisa manene kubwaha cinapu kupangela Yehova hamolika na naanga yange.

Njakandelela manene kuli Yehova uje natabesa yange munu wa kujeneka kulilongesa kukala mu munga yendi mangana anjilongese. (Isaya 54:13) Majwi ali ku mukanda wa Visimo 10:22 a busunga. Ou mukanda ngwawo: “Cibezikiso ca Shukulu Kalunga cikeco cikufukisa.” Yange na baka-naanga yange twashungwiya kukalilongesa byabingi hali Yehova na kukamupangela myaka yoshe.