Munjasemukile, bisemi bange bakele na lihya lyalindondo mwimbo limo mu mutambela wa Galicia, ku kunto ya muyatangwa ya Spain. Twasemukile tu ba 8, co yange wamuciwana. Twapwile ba kubwahelela. Ha simbu oyo mu Spain mwana umo mu naanga wakele na kuya kubakakala tupilistu na masisita ba Katolika. Co mu naanga yetu, mu butatu bwetu twaileko.

Munjakele na myaka 13, njakakele hamo na yayange wa munakazi ku njibo ya masisita mu nganda ya Madrid. Oloni kukwakele cizililo. Munu kasele kukala na babusamba. Kwakele lika mashiko, na malombelo, co lalo kutwakele na byuma bimo bitwatondele. Ha litangwa na litangwa mutondo-tondo, twakele na kuliwanena mu mwela umo ngwabo mangana tusinganyekesese. Nameme ngoco, yange nebi binjakele na kusinganyekesesa bene byahi. Kutundaho, twakele na kwimba myaso ya bulombelo na kulinga cilika ca Misa. Byoshe twakele na kubilinga mu Cilatini. Kunjakele na kuzibisisa, co njakele na kuliziba ngwe Njambi ali kulako nange. Njakele na kuliziba bulika. Nameme munjakele na kuliwana na ndokazi yange twakele na kwendeka lika ngwetu, “Ewani Maliya wa kujela manene.” Munima ya kulya, masisita bakele na kutwana lika minutu 30 ya kusimutwiya. Byuma byalisezelele kulako-lako nomu mubyafwililile ku njibo kuje kutwapwile ba kubwahelela. Njalizibile ngwe njazimbala, co kakangi njakele na kulila.

Nameme kunjakele na kuliziba kushwenya kuli Njambi, njapwile sisita munjakele na myaka 17. Njalingile ngoco mwafwa bikebyo bibabandamenene ngwabo njilinga. Oloni mu simbu yaindondo lika njashangumukile kulihula indi Njambi wanjangwile bene ngwendi njipange oco cipangi. Masisita bakele na kwendeka ngwabo boshe bauwasana bakenya mu litende lya tuhya! Nameme ngoco, njatwaleleleleho kuuwasana. Njazibukile ngwange Yesu Kilistu kakele lika ngoco, watwaleleleleho kuzezama mu cipangi ca kulongesa na kukwasa bakwabo. (Mateo 4:23-25) Munjakele na myaka 20, njamwene ngwange na seho ya kutwalelelaho kupwa sisita bene yahi. Njakasamene munjazibile sisita wa mukulunu anjileka ngwendi nga njili na kuuwasana cacibwa njiluke kwimbo bwasi-bwasi. Kumoneka wamwene ngwendi njasa kuzeyesa bakwetu banjakele nabo. Ngeci, njatundile omwo mu njibo ya masisita mutwakele na kukala.

Munjelukile kwimbo, bisemi bange bazibisisile. Oloni kukwakele bipangi. Ngeci, njaile ku Germany kuje kwakele ndolome yange umo. Wakele mu cibunga ca baka-Spain baje bakele na kulwila bibatonda banu babo. Njalizibile kushubuluka kukala mukati ka banu baje bakele na kulwila lisesa lya baka-kupanga na lisesa lya banakazi lya kupwisa hamo na banalume. Ngeci, nange njapwile umo wabo, co twalyambatele na umo mutwakelelele omwo mu cibunga. Njasinganyekele ngwange njakele na kulinga byuma binapande. Njakele na kwana banu mapapelo endeka bya kulwila lisesa lya banu na kulikwatasana na bakwetu mu kucaula kumwesa ngwetu kuli bimo bitwatondele.

Oloni mu kwita kwa simbu, njazeyele. Njalizibile ngwange baka-kulwila bibatonda banu kubakele na kukabangeya bibakele na kuleka banu. Mu 1971, bakwenje na bambanda bamo batwakele nabo mu cibunga benyekele ofisi ya Spain ije yakele mu nganda ya Frankfurt. Ngwabo balingile ngoco mu kumwesa ngwabo balubalele mwafwa ya fulumende ya Spain ije ibendekele ngwabo kuyakele na kwendesa mwamubwa byuma. Oloni njamwene ngwange ei kuyapwile ngila yaibwa ya kumweselamo kulubala.

Munetu wa ntwatwa mwasemukile, njalekele baka-limbo lyange ngwange njecela kukala-kala ku biwano bya cije cibunga ca kulwila bibatonda banu. Njazibile manene buli mwafwa kukwakele kabusamba nameme umo ku babusamba banjakele nabo wezile na kunjimona na munange. Kwanjikaluwilile kumona binjakele na kuyoyela. Co kunjamwene na seho ya kulifwita kubwahesa byuma mu citingitingi.

Mu 1976, Bakaleho babali ba ku Spain bakutotele ha cikolo ca njibo na kutwana mabulu amo ngacije a biñanda bya mu Mbimbiliya, co njawatambwile. Mubezile lalo, njabehwile bihula byabingi. Njabehwile bya tuyando, bya kujeneka kupwisa hamo kwa banu, hamolika na byuma byabibi bili na kulingiwa mu kaye. Njakasamene mubakumbulwile bihula byange kupangesa Mbimbiliya! Co njashangumukile kulilongesa Mbimbiliya.

Ha kulibanga njashakele lika kuzibuka byabingi. Oloni nange na baka-limbo lyange mutwashangumukile kukunguluka na Bakaleho ba Yehova ku Njibo ya Bumwene, byuma byatengulukile. Ha simbu oyo te tuli na bana babali. Bakaleho bakele na kutwitula na kuya hamo netu ku biwano, co lalo bakele na kutala bana betu ha simbu ya biwano. Njashangumukile kumona ngwange Bakaleho bapwa banu bababwa.

Nameme ngoco, kwacikele bilongesa bimo bya mu bulombelo binjakele na kuuwasana. Njayongwele kumenekela baka-naanga yange mu Spain. Banananu baje bapwile kapilistu bashakele kunjecelesa kulilongesa Mbimbiliya. Oloni Bakaleho banjakawanene banjikwasele. Bakumbulwile bihula binjakele nabyo kupangesa Mbimbiliya ngwe mubalingilile Bakaleho babangele kusimutwiya nange mu Germany. Co munjelukile ku Germany, njayongwele kushangumuka lalo kulilongesa Mbimbiliya. Nameme baka-limbo lyange becelele kulilongesa, yange njatwaleleleleho na biyongola byange. Mu 1978, banjimbwitikile, co njapwile umo wa Bakaleho ba Yehova.

Kuzibuka busunga buli mu Mbimbiliya kwanjikwasa kumona binjili na kuyoyela na kunjikwasa kunanguka byuma binjinapande kulinga. Cakumwenako, mukanda wa 1 Petulu 3:1-4 umwesa ngwawo banakazi banapande “kwononoka” banalume babo na kubamwesa “kasingimiko” na kuwa mbunge kuje kwapwa kwa seho manene kuli Njambi. Binangulo bya cifweci byanjikwasa kulinga mwamubwa binjinapande kulinga ha kupwa munakazi wa kushomboka na cisemi.

Kuneti myaka ya kweta ku 35 kutunda hanjapwililile Mukaleho wa Yehova. Njabwahelela manene kukala mu naanga ya banu ba Yehova! Co lalo njabwahelela mwafwa ku bana bange batanu, bawana nabo bali na kupangela Yehova.