BIBAKEHULA BAKA-KUTANDA  . . .

Iya Watangele Njambi?

Lingeni ngwe muli na kuziba cisemi wa munalume ali na kusimutwiya na munendi wa myaka 7. Ou cisemi aleka munendi ngwendi, “Kusañulu, Njambi watangele lifuti-libu na byuma byoshe biliho, co lalo watangele litangwa, ngonde na bingongonosi.” Ou mwanike asinganyekesesaho, co ehula baishe ngwendi, “Tate, iyoni watangele Njambi?”

Baishe bamukumbulula ngwabo, “Wahi wamutangele. Njambi kwanakala simbu yoshe.” Co ou mwanike ataba bibamuleka baishe. Oloni omwo ali na kukola, atwalelelaho kulihula eci cihula. Kwamukaluwila kuzibisisa mwanasa kukelako munu nambe cuma kwa kujeneka maputukilo. Co alihula ngwendi, ‘Nga lilu na kaye na byuma byoshe bilimo byakele na mashangumukilo, co Njambi ikeye watundile kuli?’

Mbimbiliya inakumbulula bati eci cihula? Inakumbulula bene ngwe mubakumbulwilile baishe ya uje mwanike mu cakumwenako cili helu. Mosesa wasonekele ngwendi: “Shukulu Kalunga, . . . simbu kanda utange malundu, simbu kanda utange kaye, yobe wapwa u Njambi ku myaka yoshe.” (Myaso 90:1, 2) Kapolofweto Isaya nendi wasonekele ngwendi: “Kuma kumuzibuka ndi? Kuma kubamilekele ndi? Shukulu Kalunga ikeye Njambi wa ku myaka yoshe.” (Isaya 40:28) Co lalo mukanda wa Yunda ngwawo Njambi natwalelelaho kukalako “kutunda ku myaka ya kusañulu.”​—Yunda 25.

Ebi bisoneka bimwesa ngwabyo Njambi wapwa “Mwene wa myaka yoshe” ngwe mwendekelele kapositolo Paulu. (1 Timateo 1:17) Obu bukaleho bumwesa ngwabwo Njambi natwalelelaho kukalako simbu yoshe. Co atwalelelaho kukalako. (Kujombolola 1:8) Kutwalelelaho kukalako kwa Njambi kumwesa ngwabo wapwa Muka-nzili Yoshe.

Mwafwa bika kunasa kutukaluwila kuzibisisa ngwetu Njambi kwanakala simbu yoshe? Mwafwa yetu banu tukayoyo simbu yaindondo, co mutukamwena simbu kunaliseze nomu mwakaimwena Yehova. Njambi wakalako simbu yoshe, co kuli ikeye myaka 1000 inapu ngwe litangwa limo. (2 Petulu 3:8) Cakumwenako, kuma mbimba uje akayoyo lika matangwa a kweta ku 50 asa kuzibisisa ngwendi yetu banu twasa kuyoya myaka 70 nambe 80 ndi? Kunasa kumukaluwila. Mukemwo Mbimbiliya imwesa ngwayo yetu banu twapwa ngwe bimbimba nga tulyesekesa kuli Ishamatanga. Co mutunasa kuzibisisila byuma kunalisezela kulako nomu mwakamwena byuma Njambi. (Isaya 40:22; 55:8, 9) Ngeci, kukukasamesa nga yetu banu twonowa kuzibisisa byuma bimo bimwesa mwafwila Yehova.

Nameme kunasa kutukaluwila kuzibisisa ngwetu Njambi kwanakala simbu yoshe, oloni twalimwena ngwetu mukemwo bene. Ngwe kwakele umo watangele Njambi, ngwe ikeye Ishamatanga. Oloni ngwe muimwesela Mbimbiliya, Yehova ikeye “watangele byuma byoshe.” (Kujombolola 4:11) Co lalo tuzibuka ngwetu simbu imo, lilu na kaye kubyakeleko. (Kushangumuka 1:1, 2) Co byatundile kuli? Owo wabitangele wapandele kukalako simbu kanda bikaleko. Co lalo wakeleko simbu kanda Yesu na tungelo bakaleko. (Yombi 38:4, 7; Kolose 1:15) Ebi byoshe bimwesa ngwabyo kwakele simbu yakele likalyendi. Ngeci, wahi watangele Njambi mwafwa kukwakele munu nambe cuma cimo.

Kukalako kwetu banu, hamolika na lilu na kaye na byuma byoshe byakalamo kumwesa ngwabo Njambi kwanakala myaka yoshe. Uje walingisile byuma bili mu bukambwila byase kwenda na kwakako mashiko aje abyendesa napande kupwa munu uje nakalako myaka yoshe. Co ikeye nalingisa byuma byoshe biyoye.​—Yombi 33:4.