Cameron: Ba Jon, njalikuu manene kusimutwiya neni biñanda bya mu Mbimbiliya matangwawa. a Mutunasimutwiiye haje, munehwile cihula ha Bumwene bwa Njambi. Munehwile binalingisa yetu Bakaleho ba Yehova tukulahele ngwetu Bumwene bwa Njambi bwashangumukile kuyula mu 1914.

Jon: Eyo, njinakele na kutanda libulu lyeni limo ngacije limwesa ngwalyo Bumwene bwa Njambi bwashangumukile kuyula mu 1914. Njakomokele, mwafwa mukendeka ngweni bimwakulahela bitunda mu Mbimbiliya.

Cameron: Mukemwo bene mwane.

Jon: Njinatanda Mbimbiliya yoshe ya mutunu. Oloni kukwesi mukanda unjanuka wendeka bya mwaka wa 1914. Ngeci, njesekele kutonda mwaka wa “1914” mu Mbimbiliya ya ha intaneti. Oloni kunjauwanene.

Cameron: Ba Jon njishaka kumishangala ha byuma bibali. Cakulibanga munatanda Mbimbiliya yoshe. Njakulahela mwazema manene Lijwi lya Njambi.

Jon: Mukemwo bene. Lijwi lya Njambi lya seho mwane, lya kulitila.

Cameron: Mukemwo mwane. Camucibali njishaka kumishangala ha kutonda mu Mbimbiliya cikumbululo ku cihula cimunakala naco. Bimunalingi bikebyo biitushongangeya Mbimbiliya. Ngwayo: “Shakezeka” mana. b Co muli na kulifwita kulinga ngoco.

Jon: Njakandelela mwane. Njishaka kulilongesa byabingi. Njineseka kutondesesa omu mu libulu lituli na kupangesa mu kulilongesa, co kuli biñanda binjinawanamo byendeka ha mwaka wa 1914. Linendeka bya cilota ca mwene umo walotele bya muti wakama ubashinjile, co kukapwa muje wakolele lalo, indi bati muje.

Cameron: Munalumbununa mwamubwa. Obu bupolofweto banabwendeka ku mukanda wa Ndanyele capita 4. Bwendeka bya cilota calotele Mwene Nebukataneza wa Mbambilone.

Jon: Ewani, bukebwo bene. Njinelukila-elukila kutanda obu bupolofweto. Oloni kwendeka lika busunga, kunjimono mubunakundamena Bumwene bwa Njambi na mwaka wa 1914.

Cameron: Njizibisisa ba Jon, mwafwa nambe kapolofweto Ndanyele nendi kazibisisile mu kushula obu bupolofweto bwasonekele!

Jon: Kuma?

Cameron: Eyo. Ku mukanda wa Ndanyele capita 12:8, wendekele ngwendi: “Njazibile bije byendekele, oloni kunjabizibisisile.”

Jon: Kumani keti yange lika. Mwanjitakamesa mwane.

Cameron: Ndanyele kazibisisile mu kushula obu bupolofweto mwafwa simbu yangwile Njambi kwendi banu bazibisise bupolofweto bwoshe buli ku mukanda wa Ndanyele te kanda yete. Oloni hano, mu matangwa ano a kukotoka twasa kuzibisisa obu bupolofweto bwoshe mu kushula.

Jon: Mwafwa bika mwendeka ngoco?

Cameron: Njendeka ngoco mwafwa ya majwi anatako ali ha vesi 9 ya mukanda wa Ndanyele 12 Mbimbiliya ngwayo: ‘Majwi awa anapande kunyungiwa kweta na ha kukotoka.’ Ngeci obu bupolofweto buli ku mukanda wa Ndanyele bakabuzibisisa lika mu simbu ya ‘kukotoka.’ Co omwo tulilongesa ha simbu ya cilongesa cetu ca Mbimbiliya tumona ngwetu bukaleho bwoshe bumwesa ngwabwo tuli mu simbu ya matangwa a kukotoka. c

Jon: Mwamubwa mwane, yanini indi mwasa kunjikwasa kulumbununa obu bupolofweto?

Cameron: Tahi njimone indi njasa.

Cameron: Tahi njishangumuke kwendeka kamandondo byamwene Nebukataneza mu cilota calotele. Co tuziba bibilumbununa.

Jon: Mwane.

Cameron: Mu cilota, Nebukataneza wamwene muti wakama waulaha, uje waketele na mwilu. Co wazibile katumwa ka Njambi ashika ngwendi bashinje owo muti. Oloni Njambi wendekele ngwendi baseze nsina ya muti mu libu. Munima ya “Bisimbu 7,” uje muti wakolele lalo. d Obu bupolofweto bwabangele tahi kulishulisilila kuli Mwene Nebukataneza. Nameme watsimanene, oloni ngeci lika mwauje muti wakolele na kuketa mwilu, nendi bamushinjile mu cifwisa ha “Bisimbu 7.” Ngwetu mwanuka byalingiwile?

Jon: Kunjanuka mwane.

Cameron: Tubaboshe tukebala mwane. Mbimbiliya imwesa ngwayo Nebukataneza wazalukile ha myaka 7. Ha simbu oyo, kasele kupwa mwene, co kayulile. Oloni munima ya myaka 7, Nebukataneza wakele lalo na mana, co washangumukile lalo kuyula. e

Jon: Hano twendeleloni mwane. Nameme kunjimono mubinalikwatasanena na Bumwene bwa Njambi na mwaka wa 1914?

Cameron: Mu bwihi, obu bupolofweto bwalishulisilila mu mitamba ibali. Bwalishulisilile lwakulibanga omwo Mwene Nebukataneza wecelele kuyula. Bwalishulisilile lwamucibali omwo ciyulo ca Njambi cemanene. Ngeci, kulishulisilila kwabo lwamucibali kukekwo kunakundama Bumwene bwa Njambi.

Jon: Muzibuka bati ngweni kulishulisilila kwabwo lwamucibali kukekwo kunakundama Bumwene bwa Njambi?

Cameron: Bukaleho bumo tubuwana bene omu mu bupolofweto. Kwesekesa na mukanda wa Ndanyele 4:17, obu bupolofweto bwakeleko mangana “banu boshe bazibuke ngwabo Njambi wa Hakamwa ya Hakamwa ali na nzili ha bumwene bwoshe bwa banu, co asa kwana bumwene buje kuli woshe uje yashaka.” Kuma munananguka awa majwi endeka ngwawo “bumwene bwoshe bwa banu”?

Jon: Emwane, ngwabo “wa Hakamwa ya Hakamwa ali na nzili ha bumwene bwoshe bwa banu.”

Cameron: Mukemwo bene mwane. Co iya bene ou ibanendeka ngwabo wa Hakamwa ya Hakamwa?

Jon: Hamo balumbununa Njambi.

Cameron: Ikeye bene mwane. Ebi bimwesa ngwabyo obu bupolofweto kubwendeka lika bya Nebukataneza. Unendeka lalo bya bumwene bwoshe bwa banu, kulumbununa ciyulo ca Njambi ha banu boshe. Byuma bibwendeka obu bupolofweto bitukwasa kuzibisisa mukunafwila ngoco.

Jon: Mulumbununa bika?

Cameron: Mu mukanda wa Ndanyele, kuli cuma cimo cibanelukila-elukila kwendeka. Banelukila-elukila kwendeka bya kushimbika Bumwene bwa Njambi buje mwene yabwo napu Munendi Yesu. Cakumwenako, hamo tutandeko majwi amo ali mu capita yamucibali. Basa kutandako Ndanyele 2:44?

Jon: Bukalu bwahi mwane. Ngwayo: ‘Ha simbu ya baka-kuswana baje, Njambi wa mwilu akaka bumwene buje kubukahu. Naumo wahi akabufungulula, co bukanyongesa bumwene bwoshe, oloni bukebwo bukakalako myaka yoshe.’

Cameron: Twakandelelako mwane. Kuma mwasa kwendeka ngweni ou mukanda unendeka bya Bumwene bwa Njambi?

Jon: Hmm. Kunjizibuka bwino mwane.

Cameron: Njikulahela mwananguka majwi endeka ngwawo obu Bumwene ‘bukakalako myaka yoshe.’ Bumwene bwa Njambi lika bwasa kukalako myaka yoshe, indi ngweni na bifulumende bya banu?

Jon: Hmm, kunjikulahela ngoco.

Cameron: Mu mukanda wa Ndanyele, kuli bupolofweto bukwabo lalo bunatalesa ku Bumwene bwa Njambi. Obu bupolofweto buli ku Ndanyele 7:13, 14. Kutalesa kuli muka-kuyula omu mu Bumwene, obu bupolofweto ngwabo: “Bamwanene moko na kasingimiko na nzili ya bumwene, ngeci bene, banu ba ku mafuti oshe na miyati yoshe ya banu na banu baka-kwendeka mu bindaka byeka bamupangele. Moko yendi ikakala ku myaka yoshe, co bumwene bwendi kubukahu embwe.” Mu mikanda ei ibali itunatanda, bika bimunananguka bibanelukila-elukila kwendeka?

Jon: Njimona bumwene mwane.

Cameron: Mwakumbulula mwamubwa mwane. Co lalo keti bumwene-mwene lika. Nangukeni ngweni Mbimbiliya inamwesa ngwayo obu Bumwene bukakala na moko ha ‘banu ba ku mafuti oshe na miyati yoshe ya banu na bindaka.’ Kulumbununa ngwabo obu Bumwene bukayula kaye koshe.

Jon: Mukemwo bene mwane. Yangeni te bwi mwane.

Cameron: Co lalo obu bupolofweto ngwabwo: “Moko yendi ikakala ku myaka yoshe, co bumwene bwendi kubukahu embwe.” Obu bupolofweto bunalifu na bupolofweto butunatanda ku mukanda wa Ndanyele 2:44, indi keti mukemwo?

Jon: Mukemwo mwane, bunalifu.

Cameron: Hamo tucituluke mu bwihi mu byuma bitunasimutwiya. Bupolofweto buli ku mukanda wa Ndanyele capita 4 babusonekele mangana banu bazibuke ngwabo “wa Hakamwa ya Hakamwa ali na nzili ha bumwene bwoshe bwa banu.” Awa majwi amwesa ngwawo obu bupolofweto bunapande kulishulisilila mu ngila yakama, kubwakundamene lika Nebukataneza. Ku mukanda woshe wa Ndanyele banendekako bya kushimbika Bumwene bwa Njambi, buje mwene wabwo napu Yesu. Mumona bati, kuma obu bupolofweto buli ku mukanda wa Ndanyele capita 4 kubwakundamene Bumwene bwa Njambi ndi?

Jon: Bunabukundama mwane. Oloni kunjimono mubunalikwatasanena na mwaka wa 1914.

Cameron: Tusimutwiyeni lalo bya Mwene Nebukataneza. Njikulahela mwanuka ngweni obu bupolofweto mubwalishulisilile lwakulibanga, muti wemanenene Nebukataneza. Wecelele kuyula omwo ou muti baushinjile ha bisimbu 7. Wazalukile, co kwetile simbu oku nacizaluka. Bisimbu 7 byahwile omwo Nebukataneza wakele lalo na mana na kushangumuka kuyula. Obu bupolofweto mubwalishulisilile lwamucibali, Bumwene bwa Njambi babwimikile ha simbu yaindondo. Oloni eci kucilumbununa ngwabo Njambi wonowele kuyula.

Jon: Mulumbununa bika?

Cameron: Kusañulu, bimyene ba Baisalele baje bakele na kuyulila mu Yelusalema babatumbwile ngwabo bakele ha ‘litanda lya Yehova.’ f Bemanenene Njambi mu kuyula banu bendi. Ngeci, aba bimyene mubakele na kuyula, kwapwile lika ngwe Njambi ikeye ali na kuyula. Oloni mu kwita kwa simbu, bwingi bwaba bimyene kubononokele Njambi, co na bwingi bwa banu babakele na kuyula nabo babatembwininine. Mwafwa ya kujeneka kwononoka, Njambi watabesele Bambambilone bafungulule Baisalele mu 607 B.C.E. Kutundoho bene, kukwakele mwene wa munu nemanena Yehova mu Yelusalema. Mu endekesi ikwabo twasa kwendeka ngwetu Bumwene bwa Njambi babwimikile. Tuli na kwendelela, indi ngweni?

Jon: Emwane.

Cameron: Ngeci, bisimbu 7 byashangumukile mu mwaka wa 607 B.C.E omwo Bumwene bwa Njambi babwimikile. Munima ya bisimbu 7, Njambi wangwile muka-kuyula wamuha amwimaneneko. Ou mwene wapandele kuyulila mwilu. Co ha simbu ei hakeho habwapandele kulishulisilila bupolofweto bukwabo buli ku mukanda wa Ndanyele. Cihula eci: “Ebi bisimbu 7 byahwile mwaka uka?” Cikumbululo ku cihula eci citukwasa kuzibuka habwashangumukilile kuyula Bumwene bwa Njambi.

Jon: Cili? Tahi njeseke. Byahwile mu 1914. Indi hamo njalimbenje?

Cameron: Embwe mwane, kumwalimbenjele. Munakumbulula mwamubwa.

Jon: Bukaleho mukoni bumwesa ngoco?

Cameron: Ha simbu yakele hano hasi, Yesu wendekele ngwendi ebi bisimbu 7 te kanda bihwe. g Ngeci, ei simbu yapwile yailaha. Ebi bisimbu byashangumukile myaka yaingi simbu kanda Yesu aije hano hasi, co byatwaleleleleho nameme mwelukile mwilu. Oloni mu kwita kwa simbu byahwile. Anukeni lalo ngweni banu kubasele kuzibisisa mwamubwa bupolofweto buli ku mukanda wa Ndanyele kubanga mu ‘simbu ya kukotoka.’ h Ku mamaneselelo a myaka ya ma 1800, baka-kulilongesa Mbimbiliya baje bashakele kuzibuka busunga bashangumukile kutondesesa mwamubwa bupolofweto obu na bukwabo. Co banangukile ngwabo bisimbu 7 bihwa mu mwaka wa 1914. Byuma binalingiwa kushwa omu mu mwaka bimwesa ngwabyo hakeho habwashangumukilile kuyula Bumwene bwa Njambi mwilu. Hakeho hayashangumukilile simbu ya kukotoka kwa kaye. Njikulahela mwananguka ngweni biñanda bitunasimutwiya ha bupolofweto obu byabingi . . .

Jon: Mukemwo mwane. Njimona kubanga njiwane simbu ya kwituluka lalo mu biñanda ebi mangana njibizibisise mwamubwa.

Cameron: Bukalu bwahi mwane. Nange kwanjambatelele simbu kuzibisisa ebi biñanda. Yanini indi biñanda bitunasimutwiya bimwesa ngwabyo byuma bibakulahela Bakaleho ba Yehova kutalesa ku Bumwene bwa Njambi byemana ha Mbimbiliya?

Jon: Emwane. Njashaka manene bulombelo bweni mwafwa byuma byoshe bimwakulahela byemana ha Mbimbiliya.

Cameron: Njimona neni mushaka ngweni bimwakulahela bimane ha Mbimbiliya. Co ngeci lika munjinendekelele, ebi biñanda byoshe munu kasa kubizibisisa ha simbu imolika. Njikulahela mucili na bihula bimo. Cakumwenako, tunendeka ngwetu bisimbu 7 binakundama Bumwene bwa Njambi, co byashangumukile mu mwaka wa 607 B.C.E. Oloni tuzibuka bati ngwetu ebi bisimbu byahwile mu 1914? i

Jon: Nange njinakala na kulihula oco cihula.

Cameron: Mbimbiliya ikeyo yasa kutukwasa kuzibuka hainapu ei simbu. Kuma mushaka ngweni twakutwaleleleho kusimutwiya byei ñanda simbu ikwabo munjikaija ndi?

Jon: Muzimbu waubwa owo.