Munjapwile mwanike, naanga yetu yayoyele kuyehi na nganda ya Leipzig, Muyatangwa ya Germany, kuyehi na binginga bya Czech na Poland. Munjakele na myaka 6, twajalukilile ku mafuti eka mwafwa kukekwo kubakapangelele batate. Ha kulibanga twaile ku Brazil, co twaya ku Ecuador.

Munjakele na myaka 14, banjitwalele ku sikola ku Germany. Bisemi bange bakele kulako ku South America. Ngeci, njakele na kulilela. Co njakele na kuliyoyela munjashakelele. Kunjakele mbunge mubakele na kulizibila bakwetu mwafwa ya bilinga byange.

Munjakele na myaka 17, bisemi bange belukile ku Germany. Ha kulibanga, njakele mu senge yabo. Oloni mwafwa ya kushaka kulilingila byuma munjashakelele, kwanjikaluwilile kukala na bisemi bange. Ngeci, munjakele na myaka 18, njatundile ha njibo.

Simbu yoshe njakele na kushakezeka byuma binjilingisa njipwe wa kubwahelela mu kuyoya. Munima ya kulikwatasana na banu na bibunga bya kuliseza-seza, njamwene ngwange cuma cacibwa manene cinjinapande kulinga cinapu kwendangana mu kaye koshe mangana njilimwene byuma byabibwa byakalamo simbu kanda banu bakabiise.

Njalandele honda, co njatundile mu Germany kuya ku Africa. Oloni munima ya simbu yaindondo lika, njelukile ku Europe mangana bakabwahese honda yange. Co munjetele ku ngenge ya kalunga-ndonga ku Portugal, njalikelele kwendela ha honda na kushangumuka kwenda kupangesa bwato.

Njalikwatasanene na cibunga ca bakwenje na bambanda baje bakele na kulibwahesela kujabuka Kalunga-ndonga wa Atlantic. Hakati kabo hakele Laurie uje wakupwile mwebwange. Ha kulibanga, twaile ku mañanda a Caribbean. Munima ya kukala simbu yaindondo mu Puerto Rico, twelukile ku Europe. Twasinganyekele ngwetu tukawanako bwato butwasa kupangesa mu kulizima buli. Oloni munima ya bingonde bitatu lika, kwalingiwile cuma cimo cije catanganesele biyongola byetu. Banjishikile kukobela buswalale mu Germany.

Njapangele eci cipangi ca buswalale ha bingonde 15. Ha simbu oyo hakeho ha twalyambatelele nange na Laurie, co twayongwele kutwalelelaho na biyongola byetu bya kupashala mu kaye. Simbu kanda njikobele buswalale, twalandeleko bwato bumo ngacije. Ha simbu injapwile liswalale, twabwahesele obwo bwato na kubupwisa mbapolo yaindondo mangana twase kujabuka-jabuka nayo. Co lalo twayongwele kuyoya omwo mu mbapolo na kuipangesa mu kupashala mu kaye. Njecelele buswalale. Oloni simbu kanda tumanese kubwahesa bwato bwetu na kushangumuka bungenzi bwetu, Bakaleho ba Yehova batwendelele na kushangumuka kulilongesa netu Mbimbiliya.

Ha kulibanga, njamwene ngwange kukwesi byuma byabingi binjapandele kutengulula mu kuyoya kwange mwafwa njambatele, co lalo te njalikele laja kusipa. (Efeso 5:5) Kutundaho, njamwene ngwange biyongola byetu bya kuya na kupashala mu kaye oku tukenga byuma byanatanga Njambi nabyo kubyabihile.

Oloni kwendeka lika busunga, njapandele kutengulula futisi yange. Njapwile wa kulyalesa. Njalikulahelele, co njakele manene mbunge ku cashu cange na byuma binjalingile. Njakele mbunge ku byange lika.

Litangwa limo, njatandele Ñanda ya Yesu ya ha Munkinda. (Mateo, capita 5-7) Ha kulibanga kunjazibisisile byuma byendekele Yesu ngwendi bikebyo byasa kulingisa munu apwe wa kubwahelela. Cakumwenako, wendekele ngwendi babwahelela baje banatsi njala na lihwila. (Mateo 5:6) Njalihwile ngwange: ‘Kukala mu bujene kwasa kulingisa bati munu abwahelele?’ Oloni omwo njatwaleleleleho kulilongesa, njanangukile ngwange tubaboshe twakala na bujene bwa ku sipilitu buje butunapande kunanguka asina twasa kubumanesa. Bikebyo byalumbunwine Yesu mwendekele ngwendi: ‘Banabwahelela baje bazibuka ngwabo batonda Njambi.’—Mateo 5:3.

Munima ya kushangumuka kulilongesa Mbimbiliya mu Germany, nange na Laurie twajalukilile ku France. Co mu kwita kwa simbu, twajalukila ku Italy. Oloni kwoshe kutwaile twawaneneko Bakaleho ba Yehova. Njabwahelelele manene kumona mubalizemena umo na mukwabo na kulikwatasana. Co njanangukile ngwange Bakaleho ba Yehova mu kaye koshe bapwa ngwe naanga imolika. (Yowano 13:34, 35) Mu kwita kwa simbu, nange na Laurie batumbwitikile, co twapwile Bakaleho ba Yehova.

Munima ya kunjimbwitika, njatwaleleleleho kutengulula futisi yange. Nange na Laurie twajabukile na kuya ku Africa, co twangwangwasanene Kalunga-ndonga wa Atlantic kuya ku United States. Mutwakele mu kabwato ketu hakati ka kalunga-ndonga, hakeho hanjanangukilile ngwange kumani njapwa wamundondo manene kunjesekesa na Njambi uje wapwa Ishamatanga yetu. Mutwakele haje hakati ka kalunga-ndonga, njakele na simbu yaingi mwafwa kunjakele na byabingi byakulinga. Ngeci, njatandele manene Mbimbiliya. Mizimbu ya Yesu mwakele hano hasi yanjetele manene ku mbunge. Wapwile munu wa kulumbunuka, co wakele na cashu ca kulinga byuma bya kukomokesa, oloni kalijundwile. Washakele kwana Ishe bumpau keti kulitsimanesa.

Kusinganyekesesa ha buyoye bwa Yesu kwanjilingisile njinanguke ngwange njapandele kwaka bya Bumwene bwa Njambi mu mutamba wa kulibanga mu kuyoya kwange, kutubakana kutwalelelaho kulinga byuma byabingi-bingi binjashakele kulinga. (Mateo 6:33) Omwo nange na Laurie twakatutikile ku United States, twayongwele kwecela bya kwendangana mangana tukale bene kuje na kwaka mbunge ku kulemesa Yehova.

Ha kulibanga munjalikulahelele, kakangi kunjakele na kwangula mwamubwa byakulinga. Oloni ha simbu ino, Mbimbiliya ili na kunjitwamenena mu byoshe binjili na kulinga. (Isaya 48:17, 18) Co lalo njinapu oni wa kubwahelela mwafwa njili na kulemesa Njambi na kukwasa bakwetu bamuzibuke.

Kupangesa binangulo bya mu Mbimbiliya kunakanyamesa manene bulo bwetu. Co lalo Yehova natubezikisa ha kutwana mwana wa munakazi uje wamuzema, co ali na kumupangela.

Nameme tunaliwana na bukalu mu kuyoya kwetu, twakulahela ngwetu Yehova atwalelelaho kutukwasa. Ngeci, twalyangwila kutwalelelaho kumukulahela.—Visimo 3:5, 6.