Cuma ca seho manene kuli Yesu capwile “kwambulula biñanda byabibwa bya Bumwene bwa Njambi.” (Luka 8:1) Wapangele na nzili na kwenda mangenzi amalaha mu Isalele mwoshe mangana alongese banu bya Bumwene bwa Njambi. Cipangi ca kwambulula calingile Yesu banacisoneka mu mikanda iwana ya Biñanda Byabibwa muje mubanendeka bya Bumwene bisimbu bya kutubakana 100. Co kakangi, eli lijwi lya Bumwene liwaniwa mu majwi endekele Yesu. Nameme ngoco, ebi keti bikebyo lika biñanda byendekele Yesu ha Bumwene bwa Njambi.—Yowano 21:25.

Mwafwa bika Yesu wamwene Bumwene bwa Njambi kupwa bwa seho manene? Cuma cimo capwile kuzibuka ngwendi Njambi namwangula kupwa Mwene wobu Bumwene. (Isaya 9:6; Luka 22:28-30) Oloni Yesu kakele manene mbunge ku kukala na moko nambe bumpau. (Mateo 11:29; Mako 10:17, 18) Kalekele banu bya Bumwene mangana alishakezekele lutsimo. Wakele manene mbunge ku Bumwene bwa Njambi, co anga bene wacibwaka mbunge a mwafwa azibuka bibukalinga kuli Ishe wa mwilu na bandongesi bendi ba kulongwa.

Yesu wazema manene Ishe wa mwilu. (Visimo 8:30; Yowano 14:31) Co lalo wazema manene bifwa bya Ishe bya kufwa ngwe cizemo, mema ku mbunge na kwakula mu kusungama. (Kwituluka mu Mashiko 32:4; Isaya 49:15; 1 Yowano 4:8) Ngeci, twakulahela ngwetu Yesu akalizibi kubihya ku mbunge mwakazibi banu bendeka makuli hali Ishe. Cakumwenako, banu bakendeka ngwabo Njambi kakele mbunge ku tuyando twa banu, co ashaka ngwendi banu bayande. Ebi bikebyo byalingisile Yesu ‘ambulule biñanda byabibwa bya Bumwene’ na ntwima. Wazibukile ngwendi mu kwita kwa simbu, Bumwene bukajelesa lizina lya Ishe. (Mateo 4:23; 6:9, 10) Bukalinga bati ngoco?

Yehova akapangesa Bumwene bwendi mu kutengulula byuma mangana akwase banu. “Akasikumuna misozi yoshe ku mesho” a banu ba kulongwa. Yehova akamanesa byuma byoshe byabibi bikalingisa banu basotole misozi. “Co kukukakala kutsa nambe busiwa nambe kulila nambe kukemanga.” (Kujombolola 21:3, 4) Ngeci, Njambi akapangesa Bumwene bwendi mu kumanesa tuyando twoshe tubali na kuliwana natwo banu. b

Yesu wazibukile ngwendi Bumwene bwa Njambi bukamwesa bukama na ngozi ya Ishe mukemwo wakele na kwambulwila banu byobu Bumwene na ntwima! (Yakomba 5:11) Yesu wazibukile lalo ngwendi obu Bumwene bukakwasa banu ba kulongwa baje bazema.

Simbu kanda Yesu aije hano hasi, wakele hamo na Ishe mwilu. Njambi wapangesele Munendi mu kutanga byuma byoshe. Ebi binambateselela melu a kukasamesa na byuma byakalamo bya kufwa ngwe bingongonosi na milalazibi hamolika na lifuti-libu lyalibwa na tusitu bakalaho. (Kolose 1:15, 16) Oloni ku byuma byoshe bya kutanga, Yesu ‘wabwahelelele’ manene na banu.—Visimo 8:31.

Yesu wamwesele banu cizemo ha simbu yoshe yalingile cipangi ca kwambulula. Kushwa ku mashangumukilo, walekele banu ngwendi wezile hano hasi mu ‘kwambulula biñanda byabibwa’ kuli baje bali mu bujene. (Luka 4:18) Oloni Yesu kakele na kwendeka lika bya kukwasa banu. Wakele na kulinga byuma bije byamwesele ngwabyo wazema banu. Cakumwenako, omwo mbunga ya banu yalikungulwile mangana batolilile kuli ikeye, “wabazibilile mema ku mbunge, co wakangwisile baje bakele na kubinja.” (Mateo 14:14) Omwo munalume umo uje wakele na kubinja mushongo wakama wamwesele likulahelo ngwendi Yesu asa kumukangwisa nga ashaka, Yesu wamumwesele cizemo. Wamukangwisile na kumuleka mu cizemo ngwendi: “Njishaka, jela!” (Luka 5:12, 13) Omwo wamwene kabusamba kendi Maliya oku alila mwafwa ya kutsa kwa ndolome yendi Lazalu, Yesu ‘wapokokele mbunge na kuziba busiwa,’ co “walilile.” (Yowano 11:32-36) Kutundaho, Yesu walingile cuma ca kukomokesa! Wasangwile Lazalu nameme watsile ha matangwa awana.—Yowano 11:38-44.

Nameme ngoco, Yesu wazibukile ngwendi bukwasi bwanene banu ha simbu ije, bwapwile bwa simbu yaindondo. Wazibukile ngwendi, banu bakangwisile basele kubinja lalo, co baje basangwile nabo basele kutsa lalo. Oloni Yesu wazibukile lalo ngwendi Bumwene bwa Njambi bukamanesa bukalu bwoshe obu. Mukemwo kalingile lika bikomokeso, oloni “wambulwile biñanda byabibwa bya Bumwene” na ntwima. (Mateo 9:35) Bikomokeso byalingile byamwesele mu bundondo bibulinga Bumwene bwa Njambi ololo hano hasi hoshe. Tusimutwiyeni ha bikulaheso bimo bili mu Mbimbiliya bije bikalishulisilila ha simbu oyo.

• Banu boshe bakalikangula.

  ‘Tupuputwa bakamona, na tusinda-matwi bakaziba. Biyanga bakajombozoka na kukina, na baje boshe kubasele kwendeka bakatambeka na kujolela.’ Co lalo ‘naumo wahi . . . akalinyenga ha kubinja.’—Isaya 33:24; 35:5, 6.

• Kukukakala lalo kutsa.

  ‘Baka-busunga bakakala mu lifuti, co bakayoyamo myaka yoshe.’—Myaso 37:29.

  “Shukulu Kalunga wa Hakamwa ya Byoshe akanyongesa nzili ya kutsa na kusikumuna misozi ku mesho a munu na munu.”—Isaya 25:8.

• Batsi bakasanguka.

  ‘Boshe bali mu bimbumbo bya canukiso bakaziba lijwi lyendi, co bakatuhukamo.’—Yowano 5:28, 29.

  “Banu . . . bakasanguka ku batsi.”—Vilinga 24:15.

• Naumo wahi akajeneka njibo nambe cipangi.

  “Banu bange bakatunga binjubo byabo, co bakakuna bitungu bya mikolobozi ya bushuka bwa binyu na kulya bushuka bwakwo. Kubakatungila bakwabo beka binjubo, co lalo kubakakunina bakwabo beka bitungu bya mikolobozi ya bushuka bwa binyu ngeci balye. Banu bange banjangwile. . . . [bakajolela] na bipangi byabo.”—Isaya 65:21, 22.

• Kukukakala lalo binzita.

  “Ikeye amanesa binzita hano hasi hoshe.”—Myaso 46:9.

  “Miyati ya banu kubakalilwisa umo na mukwabo lalo na bimoko bya mikwale, co kubakalibwahesela lalo kulwa nzita embwe.”—Isaya 2:4.

• Kukukakala lalo njala.

  ‘Bimbuto bikamena, Njambi, uje wapwa Njambi yetu akatubezikisa.’—Myaso 67:6.

  “Tiliku ipwe yaingi mu lifuti, hakamwa ya malundu hashule na bimbuto.”—Myaso 72:16.

• Kukukakala lalo buhutu.

  “Muka-kujeneka na muka-kuhutwa kubakabebala ku myaka yoshe.”—Myaso 9:18.

  “Apatula tuhutu baje batambeka kuli ikeye, baje boshe banajeneka na baje babanayengula ikeye abapatula. Azibila mema ku mbunge baka-kuzeya na tuhutu, co amena boshe baje banajeneka.”—Myaso 72:12, 13.

Nga musinganyekesesa ha bikulaheso byoshe ebi bije bikalishulisilila mu Bumwene bwa Njambi, co mumona binalingisa Yesu amone obu Bumwene kupwa bwa seho. Mwakele hano hasi, Yesu wakele na kulinga mwoshe mwaselele kuleka munu woshe-woshe uje wamutolililile bya Bumwene bwa Njambi mwafwa wazibukile ngwendi obu Bumwene bukamanesa bukalu bwoshe bubali na kuliwana nabwo banu.

Kuma bikulaheso bili mu Mbimbiliya bije bikalishulisilila omu mu Bumwene binamizibisa kubwaha ku mbunge ndi? Nga mukemwo, mwasa kuzibuka bati byabingi ha Bumwene obu? Co bika bimunapande kulinga mangana mukalikuwe bibezikiso bibukanena obu Bumwene?