Njasemukilile mu mbongi ya Acul ije yakala ku mutambela wa malundu, muyatangwa ya Guatemala. Baka-naanga yange bakendeka Ciixil, cije capwa imo ya bindaka bya muyati wa banu babatumbula ngwabo Bamaya. Co njinendeka Ciixil kushwa ku bwanike. Co lalo njikendeka Cisipanishi. Njasemukile ha simbu ikwakele nzita ya miyati mu Guatemala ije yambatele myaka 36. Ha simbu ei, Baixil babangi babatsiile.

Munjakele na myaka iwana, yayange wa munalume wa myaka 7 wakele na kweha na kambomba kakandondo, co katubikile. Calubinda, yayange watokele, yangeco njatsile mesho. Mu kwita kwa simbu, banjitwalele ha sikola ya tupuputwa mu nganda ya Guatemala kuje kunjakalilongesele bisona bya tupuputwa. Munjakele kuje, baka-kupanga haje ha sikola bakele na kunjibindika kusimutwiya na bakwetu banike, co bakwetu bana ba sikola kubakele na kulikwatasana nange. Oloni kunjazibukile bibalingilile ngoco. Njakele na kuziba buli simbu yoshe, co njakele na kushungwiya manene bingonde bibali mu mwaka bije binjakele na kuya ku njibo kukakala na banana baje bakele na kunjaka manene mbunge na kunjizibila ngozi. Oloni calubinda, banana batokele munjakele na myaka 10. Njakele na kuliziba manene kuzeya munjakele na kwanuka banana baje banjizemene manene.

Munjakele na myaka 11, njelukile kwimbo, co njakakele na yayange wa munalume injinaliwanena nendi kuli batate na naanga yendi. Bakele na kunjana byuma bya ku mubila binjatondele, oloni wahi wakele na kunjizembeleka. Simbu imo, njakele na kwihula Njambi oku njili na kulila ngwange: “Mwafwa bika banana banatoko? Bika binjinapwila kapuputwa?” Banu banjilekele ngwabo Njambi ikeye washakele ngwendi njiliwane nobu bukalu. Ngeci, njamwene ngwange Njambi kakele banu mbunge, co kesi kubalinga mwamubwa. Ngwe njawanene ngila ya kulitsiilamo, ngwe njalitsiile.

Kupwa kapuputwa kwanjilingisile njonowe kulinga byuma bimo, co lalo kwanjinenele bishoti. Ku bwanike, banu bamo balilalele nange ha bisimbu byabingi. Naumo wahi injalekele obu bukalu mwafwa njasinganyekele ngwange wahi anjitolilila. Banu babangi kubakele na kwendeka nange, co nange kunjakele na kwendeka na banu. Njakele na kukala kwa likalyange, co njakele na bishoti. Co lalo naumo wahi injakulahelele.

Munjakele na myaka 13, Bakaleho ba Yehova babali (munu na munakazi wendi) banjendelele te tuli na kweha bweho ha sikola. Mulongesi umo ha sikola uje wakele na kuzibisisa bukalu bwange wabalombele ngwendi banjendele. Banjilekele ngwabo Mbimbiliya inakulahesa ngwayo batsi bakasanguka, co tupuputwa bakamona lalo. (Isaya 35:5; Yowano 5:28, 29) Njashakele bibanjilekele, oloni kwanjikaluwilile kusimutwiya nabo mwafwa kunjezililile kusimutwiya na banu. Nameme kunjapwile wa kuzituka, batwaleleleleho kunjendela mangana banjilongese Mbimbiliya. Bakele na kwenda makilomita a kutubakana 10 na kukanduka munkinda asina bakwete mu mbongi munjakele.

Ndolome yange wakele na kunjileka ngwendi bakele na kusholoka mwamubwa nameme kubapwile ba kuliwanena. Bamwesele ngwabo banjakele mbunge omwo bakele na kunjinenela bwana nameme bwapwile bwabundondo. Njalizibile ngwange bapwile baka-Kilistu ba busunga mwafwa bakebo lika basa kulinga ngoco.

Njalilongesele Mbimbiliya kupangesa mabulu a bisona bya tupuputwa. Nameme njakele na kuzibisisa binjakele na kulilongesa, kwanjikaluwilile kukulahela byuma bimo. Cakumwenako, kwanjikaluwilile kukulahela ngwange Njambi wanjaka mbunge na kukulahela ngwange bakwetu nabo basa kunjaka mbunge. Nameme njazibisisile binalingisa Yehova ecelele byuma byabibi bilingiwe ha simbu ino, oloni kwanjikaluwilile kumumona kupwa Tate wa cizemo. *

Mu kwita kwa simbu, binjakele na kulilongesa mu Mbimbiliya byanjilingisile njitengulule biyongola byange. Cakumwenako, njalilongesele ngwange Njambi akazibila baje bali na kuyanda mema ku mbunge. Banu bendi mubakele na kuyanda kusañulu, Njambi wendekele ngwendi: ‘Njinamono tuyando twa banu bange . . . Njamono tuyando twabo twoshe.’ (Kutuuka 3:7) Kuzibuka mwamubwa bifwa byakala nabyo Yehova kwanjilingisile njilikundike kuli ikeye. Mu 1998 banjimbwitikile, co njapwile Mukaleho wa Yehova.

Munima ya mwaka umo kutanda habanjimbwitikilile, njalilongesele bilongesa bimo bya tupuputwa kuyehi na nganda ya Escuintla. Mukulunu umo mu cikungulukilo wanangukile bukalu bunjakele na kuliwana nabwo munjakele na kuya ku biwano oku njitunda-tunda mu mbongi munjakele. Cikungulukilo cakele muyehi capwile cikungulukilo cije cakele ha minkinda habakele na kwita baje Bakaleho babali balilongesele nange Mbimbiliya, co kwakele na kunjikaluwila kuyako. Ou mukulunu wawanene naanga imo ya Bakaleho mu nganda ya Escuintla ije yashakele kukala nange na kunjikwasa mangana njikunguluke-kunguluke. Ei naanga icili na kunjinyunga mwamubwa ngwe nji kabushoko kabo ku mubila.

Bandolome na bandokazi mu cikungulukilo bananjimwesa cizemo mu bingila byabingi. Oku kunanjilingisa njilizibe ngwange ha kupwa umo wa Bakaleho ba Yehova, njili mukati ka baka-Kilistu ba busunga.—Yowano 13:34, 35.

Hano kunjesi na kuliziba ngwe njiwangoco, co njili na lilabelelo. Njazibukoni binjili na kuyoyela. Ha kupwa muka-kwambulula wa simbu yoshe wa muzimbu wa mu Mbimbiliya ubali na kwambulula Bakaleho ba Yehova, njikaka manene mbunge ku kulongesa bakwetu busunga bwa mu Mbimbiliya kutubakana kwaka mbunge ku buyanga bwange. Co lalo njabezika kupwa mukulunu mu cikungulukilo na kwendeka biñanda bya Mbimbiliya bya mbunga mu bikungulukilo bya mu mbongi munjakala. Njabezika lalo kwendeka biñanda bya Mbimbiliya ku biwano bya mutambela kuje kukakunguluka banu babangi.

Mu 2010, njakobelele Sikola ya Kulilongesa Bipangi bya mu Munga (ije inapu Sikola ya Baka-kwambulula bya Bumwene) mu El Salvador. Ei sikola yanjikwasa njipange mwamubwa bipangi mu cikungulukilo. Kuya oku ku sikola kwanjilingisile njilizibe ngwange Yehova Njambi uje asa kulingisa munu woshe-woshe apange cipangi cendi wanjizema, co lalo wanjaka mbunge.

Yesu wendekele ngwendi: ‘Muli kubwahelela kwakama mu kwana kutubakana mu kutambula.’ (Vilinga 20:35) Hano njinabwahelela nameme ha kulibanga kunjasinganyekele ngwange njasa kupwa wa kubwahelela. Co njiliziba ngwange njasa kukwasa bakwetu.