INOKE wayoyele myaka yaingi. Wayoyele myaka ya kweta ku 365. Myaka ivakayoyo vanu vaje tukamono ngwetu vanayoyo manene matangwa ano ikovelamo luwana. Kwakukalu kuthinganyeka ngwetu munu atha kuyoya thimbu ya kupwa oho. Kwetheketha na thimbu yayoyele, watsile te kanda akuluvale. Vanu va kuthañulu vakele na kuyoya myaka yaingi kutuvakana yetu ano matangwa. Munu wakulivanga kukala hano hathi, Andama wakele na myaka ya kutuvakana 600 ha thimbu yathemukile Inoke, cho wayoyele lalo myaka 300. Vatekulu va Andama vamo vayoyele myaka yaingi kutuvakana ikeye. Echi chimwetha ngwavo Inoke uje wathsile oku ali na myaka 365, wathsile te kanda akuluvale. Wapandele kutwalelelaho kuyoya, oloni wathsile.

Vuyoye vwa Inoke vwakele mu vushonde. Lingeni ngwe muli na kumumona ashatuka kutewa vanu vaje walekele muthzimbu wa kutunda kuli Njambi. Mu maholo avo mwakele minkanya ya vutenu. Ovo vanu vamuthzindile. Kuvashakele muthzimbu wavalekele, cho vathzindile na Njambi uje wamutumine. Kuvaathele kulwitha Yehova Njambi mwafwa kwahi kuvanethi kumuwana, ngechi valwithile Inoke. Mpamo Inoke wathinganyekele ngwendi kakatha kumona nanga yendi lalo. Mpamo wanukile munakathzi wendi na vana vendi va vambanda na munendi wa mukwenje Matusela na mutekulyendi Lameki. (Kushangumuka 5:21-23, 25) Oloni wathsile ndi?

Inoke kuvamwendekele manene mu Mbimbiliya. Vanendeka lika vyendi ha mitamba itatu mu Mbimbiliya. (Kushangumuka 5:21-24; Vahevelu 11:5; Yunda 14, 15) Oloni awa mavesi atukwatha kuthzivuka ngwetu ou munalume wakele na likulahelo lya kukanyama. Mwakala na nanga imuli na kulela ndi? Mwalifwita laja na mapaketho mwafwa ya kwimanena vuthunga ndi? Nga mukemwo, cho mulilongetha vyavingi ku likulahelo lya Inoke.

Vanu vakele na vilinga vyavivi ha thimbu yakele na kuyoya Inoke. Ovo vanu vapwile va chithemwa cha vu 7 kutunda kuli Andama. Ha thimbu ije vanu vavethzikile mwafwa mivila yavo te kanda ilumbuke. Kuthungama kwa muvila kuje kuvathzimbalethele va Andama na Eva te kanda kuhwililile. Mukemwo vakele na kuyoya myaka yaingi. Oloni vakele mu vukalu vwakama. Vukenya vwalithalele manene. Vwashangumukile vene ha thimbu ije Kaini wathsiile Ndolome yendi Avele. Mutekulwila umo wa Kaini wakenyukile manene. Vanu va mu chithemwa cha mu chitatu vashangumukile lalo kulinga vakwavo mwamuvi. Vanu valemethele Yehova mu ngila yaivi. Vakele na kupangetha lithzina lya Njambi lya kujela mu ngila ya shwamwa ya kumushaula.—Kushangumuka 4:8, 23-26.

Ovu vulombelo vwa mathzilo mpamo vwalithalele mu thimbu ya Inoke. Omwo Inoke wakele na kukola wapandele kwangula vyakulilga. Vati, walikwatathanene na vanu vavangi va mu matangwa endi, indi washakethzekele Yehova Njambi wa vuthunga, uje watangele melu na kaye? Mpamo wangwile kulilongetha vya Avele uje ivathsiile mwafwa ya kulemetha Yehova mu ngila yaivwa. Inoke washakele kutembwinina Avele. Ku mukanda wa Kushangumuka 5:22 ngwavo: “Inoke wendele na kulitombola na Njambi.” Awa majwi amwetha ngwavo Inoke wathingimikile Njambi, nameme wakele mukati ka vanu vavavi.  Ikeye munu wa kulivanga kutumbula mu Mbimbiliya mu ngila eyi.

Eyi vesi imwetha lalo ngwavo Inoke watwaleleleho kwenda na kulitombola na Yehova nameme munima ya kuthema munendi Matusela. Echi chimwetha ngwavo Inoke mwakele na myaka 65, wakele na nanga. Wakele na munakathzi uje kuvatumbwile lithzina mu Vithoneka na vana “va vanalume na ava va vanakathzi.” Ha kupwa chithemi wa munalume uje wendele na Njambi, twatha kwendeka ngwetu wanyungile nanga yendi mwaya chithzango cha Njambi. Inoke wathzivukile ngwendi Yehova washaka vanalume valikwatathane na vanakathzi vavo mu kulongwa. (Kushangumuka 2:24) Cho lalo walongethele vana vendi vya Yehova Njambi. Vuvwa muka vwatundile mu kulinga ngocho?

Mbimbiliya kuyendekale vyavingi ha ñanda eyi. Na vimo vyahi viinendeka kutaletha ku likulahelo lya Matusela muna Inoke uje ivanatumbula mu Mbimbiliya ngwavo ikeye wayoyele myaka yaingi manene kutuvakana vakwavo. Wayoyele kweta na ha thimbu ya Livathzi lyakama. Oloni Matusela wakitile lalo mwana wa lithzina lya Lameki. Lameki wayoyele myaka yaingi kutuvakana kuku yendi Inoke, cho lalo wakele na likulahelo. Yehova wahwimininine Lameki apolofwete vya munendi Nowa, cho vuje vupolofweto vwalishulithile munima ya livathzi. Nowa nendi vamutumbula ngwavo wendele na Njambi ngwe mwalingile kukulwila yendi Inoke. Nowa kalimwene na Inoke. Oloni Inoke wathethzele mwanja wauvwa. Nowa nethi kulilongethele kuli Ishe Lameki nambe kuli kuku yendi Matusela nambe kuli Njalende, ishe ya Inoke, uje wathsile te Nowa ali na myaka 366.—Kushangumuka 5:25-29; 6:9; 9:1.

Achithinganyekeni lika Inoke mwalithethzelele na Andama. Andama wapwile wa kuthungama oloni watengulukilile Yehova na kuthethzela vana vendi mwanja wauvi na kuvavindametha. Oloni nameme Inoke kapwile wa kuthungama, wendele na kulitombola na Njambi na kwakela vana vendi mwanja wauvwa wa kukala na likulahelo. Omwo Andama wathsile, Inoke te ali na myaka 308. Kuma nanga ya Andama yalilile uje chithemi chavo wa kulishaka ndi? Kututhzivuka. Oloni tuthzivuka lika ngwetu “Inoke wendele na kulitombola na Njambi.”—Kushangumuka 5:24.

Nga mwakala na nanga, mwatha kulilongethako vimo ku likulahelo lya Inoke. Nameme kwapwa kwa theho kunyunga nanga yeni ku muvila, oloni chuma cha theho manene chinapu kuinyunga ku sipilitu. (1 Timateo 5:8) Mwatha kulinga ngocho kwitila mu vyendeka na mu vilinga. Nga mushaka kwenda na Njambi ngwe mwalingile Inoke, cho tavetheni lijwi lya Njambi litwamenene kuyoya kweni. Nga mulingamo, cho muthethzela vana veni mwanja wauvwa uvanapande kutembwinina.

Inoke mpamo wathzivile vuli ha kupwa lika ikeye muka-kukulahela mu kaye muje mwashulile vanu vavavi. Vati, Njambi yendi Yehova wamwene kukulahela kwendi ndi? Eyo. Litangwa limo Yehova wathimutwiyiye nou ngamba yendi wa kulongwa. Njambi walekele Inoke muthzimbu wapandele kuleka vanu. Mu kulinga ngocho, walingithile Inoke apwe kapolofweto, cho vupolofweto vwendi vukevwo vwa kulivanga mu Mbimbiliya. Twendeka ngocho mwafwa munima ya viita vya myaka, Yunda ndolome ya  Yesu vamuhwiminine athoneke majwi apolofwetele Inoke. *

Inoke wapolofwetele vika? Wapolofwetele ngwendi: “Kengeni, Mwene [wethzile, NWT] na makulukathzi a tungelo twendi, mu kuthompa voshe, mu kuhitha vanu voshe vanalingi vilinga vya kushaula Njambi na ha majwi avo oshe amavi a kushaula Njambi avamwendekele aje kuvapandele kuwendeka kuli ikeye.” (Yunda 14, 15) Mpamo munananguka ngweni, Inoke nendeka awa majwi mu ngila ije imwetha ngwe Njambi nashulithilila laja ovu vupolofweto. Eyi ikeyo ngila vapangethele tupolofweto vakavangeyeyeho. Mwafwa vupolofweto vukendeka chuma chije chikalingiwa kulutwe ngwe chalingiwa laja.—Isaya 46:10.

Inoke wambulwile vati uje muthzimbu mangana vanu voshe vauthzive? Wawambulwile na ndthzili. Wamwethele ngwendi, vilinga vya vaje vanu vyapwile vya vunyengwe omwo welukilile kwendeka ngwendi vilinga vya “kushaula Njambi.” Ovu vupolofweto vwamwethele ngwavo kushwa lika havatundilile vanu mu lihya lya Endeni, vatwaleleho kulinga vyuma vyavivi mu kaye mwoshe. Yehova watengulwile vyuma omwo wethzile na “makulukathzi a tungelo” va ndthzili mu kunyongetha vaje vanu. Inoke wambulwile uje muthzimbu mu kuthimpa lika lyendi. Mpamo Lameki wakomokele ha kumona kuthimpa kwa kuku yendi. Nga wakomokele, twatha kuthzivithitha vyuma vyamulingithile ngocho.

Likulahelo lya Inoke linapande kutushongangeya tulilule yetu vavenya mangana tumone indi tukamono kaye ngwe mwakakamwena Njambi. Kuthompa chije wambulwile Inoke mu kuthimpa hanga kuchichili. Netu twachivandamena ngwe muvachivandamenene vanu va mu matangwa a Inoke. Vyuma vyapolofwetele Inoke vyalishulithilile omwo Yehova wanenele livathzi lyakama lije lyanyongethele vanu vavavi va mu matangwa a Nowa. Oloni kunyongetha chije chemaneneneko kunyongetha chakama chije chikaija kulutwe. (Mateo 24:38, 39; 2 Petulu 2:4-6) Vanu matangwa ano hanga vachilinga vyuma vyavivi vije vikanenetha ngwavo Njambi akaije lalo na tungelo twendi na kuvanyongetha. Munu na munu napande kwaka majwi a Inoke ku mbunge na kulekako vakwavo. Vavushoko na vavuthamba vetu vanatha kutulwitha. Thimbu imo tunatha kulithziva vuli. Oloni Yehova kayengwile Inoke. Na vangamba vendi va matangwa ano kakavevala embwe.

Kuyoya cha Inoke chahwile vati? Kuyoya cha Inoke chachathi manene kuchithzivithitha kutuvakana kuthsa chendi. Ku mukanda wa Kushangumuka vanendeka lika ngwavo: “Inoke wendele na kulitombola na Njambi wa vuthunga thimbu yendi yoshe, cho kuvamumwene lalo, omwo Njambi wamwambatele.” (Kushangumuka 5:24, NWT) Njambi wamwambatele vati? Kapositolo Paulu walumbunwine ngwendi: “Ha kukulahela, Inoke vamunungulwile mangana kethi amone kuthsa, cho naumo wahi wamuwanene mwafwa Njambi wamunungulwile. Thimbu kanda vamunungulule, watambwile vukaleho vuje vwamwethele ngwavo wathzivithile Njambi kuvwaha.” (Vahevelu 11:5, NWT) Paulu walumbunwine vika ha kwendeka ngwendi, “vamunungulwile mangana kethi amone kuthsa”? Vimbimbiliya vimo vinendeka ngwavo Njambi watwalele Inoke mwilu. Oloni ovwo kethi vuthunga. Mbimbiliya imwetha ngwayo Yesu Kilisitu ikeye wa kulivanga kuthanguka na kuya mwilu.—Yowano 3:13.

Cho Inoke “vamunungulwile” vati mangana kethi “amone kuthsa”? Mpamo Yehova wanungulwile Inoke kamandondo kamandondo kutunda ku kuyoya kuya ku kuthsa, mangana kethi athzive kayando ka vuthsi. Oloni ha kulivanga Inoke “watambwile vukaleho vuje vwamwethele ngwavo wathzivithile Njambi kuvwaha.”  Mu ngila muka? Thimbu kanda athse, Inoke mpamo wamwene vimona vije vyatundile kuli Njambi vije vyamwethele ngwe kaye kanapu palandaisi. Omwo wamwene ovyo vimona vyavivwa, Inoke walalele tulo twa vuthsi. Paulu mwathonekele kutaletha kuli Inoke na kuli vanalume na vanakathzi vakwavo va kulongwa, wendekele ngwendi: “Vanu voshe ava vathsile mu kukulahela.” (Vahevelu 11:13) Kutundoho, mpamo vitothzi vendi vashakethzekele chivimbi, oloni ‘naumo wahi wachiwanene.’ Mpamo Yehova wachishwekele mangana kethi vachiviyithe nambe kuchipangetha mu vulombelo vwa makuli. *

Kwetheketha nomu muvanalumbunwinamo Vithoneka helu, tumoneni muvyatha kutukwathelamo mangana tuthzivithithe vuthsi vwa Inoke. Lingeni ngwe muli na kumona vije vyalingiwile, cho lalo anukeni ngweni ikeyo lika ngila yanethi kwovokelamo. Omwo Inoke washatukile nunda yakama wajukile. Vitothzi vendi vakele na kumuyomba, mwafwa ya kuvaleka uje muthzimbu wa kuthompa. Cho Inoke wawanene mutamba mwa kuvanda na kuhwimako kamandondo, oloni wathzivukile ngwendi vatha kumuwana. Ha thimbu ije vuthsi vwakele muyehi nendi. Omwo wakele na kuhwima, walombelele kuli Njambi. Kutundoho lyova lyamuhwile. Cho wamwene chimona chije chamwethele ngwe Inoke vamutwala ku mutambela wa kulyala.

Thinganyekeni ngweni vamumwethele lifuti lije lyalithethzele kulako na lije lyathzivukile. Wamwene ngwe lyalifwile na lihya lya Endeni, oloni kumwakele vakelumbi va kuvindika vanu kukovelamo. Cho mwakele vanalume na vanakathzi vavangi va kulikangula vaje vakele na mivila ya vukwenje. Voshe vakele mu kwoloka. Vyuma vyathzivukile Inoke vya kufwa ngwe chithzindo na mapaketho kuvyakelemo. Evi vimona vyalingithile Inoke alithzive ngwendi Yehova ali hamo nendi, cho lalo wamuthzema. Walithzivile ngwendi nendi nakundama ku mutambela uje, cho mukemwo mwimbo lyendi. Omwo lyova lyamuhwile, Inoke walithzimine ku mesho na kulala tulo twa kujeneka kulota.

Okwo vene kukekwo kwali na lelo lino nalala tulo twa vuthsi, cho Yehova Njambi kakamwivala. Yesu wakulahethele ngwendi, vanu voshe vaje vali mu vithinganyeka vya Njambi vakathziva lijwi lya Kilisitu, cho vakatuhuka mu vimbumbo na kumona kaye kakaha kakavwa.—Yowano 5:28, 29.

Neni mushaka kukakala mu kaye ka chifwa echi ndi? Thinganyekeni mumwatha kukalithzivila ha kukalimona na Inoke. Thinganyekeni lalo vyuma vyavivwa vitunatha kukalilongetha kuli ikeye. Akatuleka indi vyuma vitunathinganyeka ngwetu vikevyo vyalingiwile ku mamanethelelo a kuyoya kwendi vyapwile vya vuthunga. Oloni kuli vyuma vitunapande kulilongetha kuli ikeye hano vene. Omwo wamanethele kwendeka vya Inoke, Paulu wendekele lalo ngwendi: ‘Na umo wahi atha kuthzivitha Njambi kuvwaha kwa kujeneka kukulahela.’ (Vahevelu 11:6) Ngechi, munu na munu napande kutembwinina kukulahela kwa Inoke.