Njathemukilile ku Paddington, mutambela umo wa ku London uje wakala na vanu vavangi, mu lifuti lya England. Njakele na kuyoya na vanana na vandokathzi vange vatatu va kukola. Vatate vapwile vaka-kunwa manene vwala, ngechi kuvawaniwile ha njuvo thimbu yaingi.

Te njichili njimwanike vanana vanjilongethele kulombelalombela vuthsiki. Njakele na Kambimbiliya kakandondo kaje kakele lika na mukanda wa Myatho, ngechi njashangumukile kwimba ije myatho. Njanuka munjatandele mukana wa majwi mu Iivulu limo lya mavulu aje njashakele manene, owo mukana wendekele ngwavo: “Tangwa limo lithathe kulikatuhuka.” Aje majwi anjonowethele kulala tulo vuthsiki vwoshe mwafwa ya kuthinganyeka lika ha vyuma vya kulutwe. Njalyendekethele mu mbunge yange ngwange: ‘Kuli vimo vituli na kuyoyela.’ ‘Vika njili na kuyoyela?’ Kunjashakele kuthsa.

Njashangumukile kushaka manene vyuma vya manthseno. Njethekele kwendeka na vathsi na kuya ku vihilo na vakwetu vaka-sikola, cho njakele na kuyongola vifilimu vya volothzi. Njamwene ngwange nambe vyakele na kutewetha, oloni vyapwile vyavivwa.

Vuyoye vwange vwashangumukile kulumbuka munjakele na myaka 10. Njashangumukile kuthipa makaya, cho njethzililile. Kutundoho, njashangumukile kuthipa lyamba. Munjapwile na myaka 11, njashangumukile kunwa vwala. Kunjakele na kuthziva kutovala vwala, oloni njakele na kuthziva kuvwaha nga njapende. Njashakele myatho na kukina. Njakele na kuya ku vilika na ku vitanda vya kunwila vwala. Njakele na kuvomboloka ha thimbu ya vuthsiki na kwiluka lalo ha mungulu ngengu. Nga linaki njakele na kwonowa kuya ku sikola mwafwa ya kujuka kwendangana vuthsiki. Njakele na kunwa vwala oku njili ku sikola.

Njafwelukile manene ku sikola. Echi chalingithile vanana vananguke ngwavo futithi yange yapwile yaivi, ngechi valuvalele manene. Cho njalyunukwile hembo omwo ya kulijokota na vanana na kukatumbama na lipangala lyange Tony, uje wapwile ka Rasta. Wawaniwile na milonga mwafwa wakele na kulandetha mambanda a kupendetha, cho lalo wapwile muka-lwothzi  manene. Njakele na chikute, cho munjapwithile myaka 16 njapapa mwana wa munalume.

Njaliwanene na Vakaleho va Yehova lwa mbangelo omwo njakele ku vinjuvo vya fulumende kuvakakala vanakathzi va vathzike vaje vali na vana vavandondo. Vaka-fulumende vanjaneneko mulili umo mwakukala. Vanakathzi vavali va Vakaleho vendelele kushwa kumo vanakathzi vamo vaje kuvashombokele. Tangwa limo nange njatolilile ku vije vathimutwiyiye. Njashakele kumwetha ngwe vivakendeka Vakaleho vyapwa vya makuli. Oloni vakumbulwile vwino vihula vyange vyoshe kupangetha Mbimbiliya. Vapwile vaka-ngothzi, cho lalo vakele na kwendeka mu kuwa mbunge, ngechi njavwahelelele manene. Njalyangwilile kulilongetha navo Mbimbiliya.

Vyuma vinjalilongethele mu Mbimbiliya vyanjilingithile njitengulule kuyoya kwange. Kushwa lika ku vwanike njatewele kuthsa. Njalilongethele ngwange Yesu wendekele vya kuthanguka. (Yowano 5:28, 29) Cho lalo njathzivukile ngwange Njambi wanjaka mbunge. (1 Petulu 5:7) Majwi ali ku mukanda wa Njelemiya 29:11, anjetele ku mbunge, aje endeka ngwavo: ‘Yange lika Njathzivuka matumbe njilinawo hali yeni, matumbe akuminenela vivethzikitho, kethi a kuminenela tuyando twakama embwe, matumbe a kuyoya kulutwe kuje kunashulu na lilavelelo.’ Njashangumukile kukulahela ngwange njatha kukayoya myaka yoshe mu Palandaisi hano ha lifuti livu.—Myatho 37:29.

Vakaleho va Yehova vamwethele chithzemo cha vuthunga kuli yange. Munjaile lwa mbangelo ku viwano vyavo vakanjitambwile mwamuvwa—voshe vapwile vakuvwahelela. (Yowano 13:34, 35) Echi chalithethzele na ku vulombelo kunjakele na kukovela. Vakaleho vanjitambwile mwamuvwa, vakevo kuvakelele mbunge ku futithi yange yayivi. Vakele na kutolilila ku vije njendeka, cho vanjilekele munjatha kupangethela vinjililongetha. Njalithzivile kupwa mukati ka vanu vaje valithzema umo na mukwavo.

Kulilongetha Mbimbiliya kwanjikwathele njitengulule yoyethi yange na kukavangeya vinangulo vyavivwa vya Njambi. Kwakaluwile manene kwechela kuthipa makaya. Vithimbu vimo njanangukile ngwange myatho imo yakele na kuvwethzelela lika lishungu lyange lya kushaka kuthipa lyamba, ngechi njangwile myatho ya kutolilila. Kulikela kuya ku vitanda vya vwala kwanjikwathele njechele kunwa. Njalyangwilile kukala na vavuthamba va vilinga vyavivwa vije njayongwele ngwange vatha kutengulula futithi yange.—Vithimo 13:20.

Tony nendi washangumukile kulilongetha Mbimbiliya na Vakaleho va Yehova. Omwo Vakaleho vakumbulwile vihula vyendi kupangetha Mbimbiliya, wamwene ngwendi vyakele na kulilongetha vyapwile vya vuthunga. Watengulwile futithi yendi: walikelele kulikwatathana na vanu va vilinga vyavivi na kwechela kulikoveletha mu vilinga vya kuhenga na kulikela kuthipa lyamba. Twatengulwile futithi yetu mangana tuthzivithe Yehova kuvwaha ku mbunge na kulela munetu mu ngila yaivwa. Twalyambatele mu 1982.

Nange njashakele kutengulula yoyethi yange, ngechi lika muvalingilile vanu vaje njatandele thimbu imo mu Kaposhi ka Kukengela na Toneni! * Myanja yavo yanjitakamethele. Vanjikwathele kutwalelela kulifwita, kujeneka kwechelela hakati. Njakele na kulomba Yehova ngwange atwaleleho kunjikwatha. Nange na Tony vatumbwitikile mu July 1982, na kupwa Vakaleho va Yehova.

Kulikuta vuthamba na Yehova Njambi kwanjovola. Nange na Tony twalimwena mwakakwathelamo Yehova mu thimbu ya vukalu. Twalilongetha ku kulahela Njambi mu vithimbu vyavikalu, cho twamono ngwetu natwalelelaho kukwatha nanga yetu.—Myatho 55:22.

Njinakele na kulongetha vana vetu te va chili vavandondo kuthzivuka Yehova. Cho navo lalo mu vanakolo vali na kulinga ngocho ku vana vavo. Ngechi njavwahelela manene.

Matangwa ano njili na kulikuwa kulala tulo, kujeneka kuthziva lalo lyova lya kuthsa nambe kulishoshomwena vya kulutwe. Nange na Tony tukendela vikungulukilo vya kulithethzathethza vya Vakaleho va Yehova chalumingo na chalumingo na kuvatakametha. Twalikwatathana hamo lika navo mu kulongetha vanu ngwetu nga vakulahela Yesu, cho vakawana mwonyo wa myaka yoshe.