Mwanike umo mwamwene vwithi vutunda ku fakitoli na kukakumukila mwilu ngwe mashelwa, wathinganyekele ngwendi chipangi cheyi fakitoli chapwile cha kupanga mashelwa. Munatha kujola nga ou mwanike amileka vithinganyeka vyendi. Oloni, netu nga twonowa kuthzivithitha mwamuvwa vyuma vimo, twatha kukovela mu vukalu. Chakumwenako, nga twonowa kuthzivithitha mashiko mwakunwina vumbanda, twatha kukovela mu vukalu vwakama.

Kwonowa kuthzivithitha vyuma vya ku sipilitu kwatha kunena vukalu vwakama manene. Chakumwenako, vanu vamo kuvathzivithithile vyakele na kulongetha Yesu. (Yowano 6:48-68) Vavyanene kutolilila ku vyuma vije vyakele na kuvalongetha. Echi chapwile kuvindama.

Mukatanda Mbimbiliya mangana imikwathe ndi? Nga mukemwo, cho mukalingi mwamuvwa. Vati, thimbu imo mukalishoshomwena ngweni hamo kumuthzivithitha vije mutanda ndi? Echi chikalingiwa ku vanu vavangi. Tuchithimutwiyeni ha vingila vitatu evi.

• Vanu vamo kuvethi kuthzivithitha lishiko lya mu Mbimbiliya lije lyendeka ngwavo, “thzivileni lyova Njambi wa vuthunga.” Vakevo vakathinganyeka ngwavo vanu vanapande kutewa manene Njambi. (Muka-kwambulula 12:13 NWT) Oloni Njambi kethi kutonda ngwendi vaje vamulemetha vamutewe mu chifwa ocho. Ikeye nendeka ngwendi: “Kethi muthzive lyova, yange njili hamo neni, kethi mujaje, yange Njambi yeni! njikamitakametha na kumikwatha.” (Isaya 41:10) Kuthzivila Njambi lyova kulumbununa kumwana kathingimiko kaje kanamupande.

• Vanu vamo kuvethi kuthzivithitha awa majwi akuhwiminina endeka ngwavo: “Vyuma vyoshe vili hano hathi vili na thimbu yavyo, . . . kuli thimbu ya kuthemuka, na thimbu ya kuthsa.” Vakendeka ngwavo Njambi wanoneka laja thimbu yanapande kuthsa munu na munu. (Muka-Kwambulula 3:1, 2) Oloni awa majwi endeka ha kuyoya kwa vanu, omwo kuthsa chinatala munu woshe. Lijwi lya Njambi likalongetha lalo ngwalyo vitwangula kulinga vyatha kukundama ku kuyoya kwetu. Chakumwenako, likendeka ngwavo: “Nga wononoka Shukulu Kalunga, cho ukayoya thimbu yakama.” (Vithimo 10:27; Myatho 90:10; Isaya 55:3) Chatha kupwa vati ngocho? Chakumwenako, nga tuthingimika lijwi lya Njambi chitupwila chachathi kulihenga ku kupenda manene vwala na kulinga vupangala.—1 Kolinte 6:9, 10.

• Vanu vamo muvakatanda mukanda uje wendeka ngwavo lilu na kaye “vakavinyongetha ku tuhya,” vakathinganyeka ngwavo Njambi akanyongetha lino lifuti livu. (2 Petulu 3:7) Oloni Njambi natukulahetha ngwendi kakechelela chuma choshe choshe kunyongetha kano kaye. Njambi ikeye “wajalele luvula lwa kaye ngechi kaye kethi kashengenye.” (Myatho 104:5; Isaya 45:18) Vanu va vilinga vyavivi vakevo vakanyonga, kethi lifuti livu embwe. Lilu muje mwakala vingongonothi nambe ngwetu mwela wa Njambi kuukanyongo.

Ngechi mumunamwena ha myanja eyi ili helu, kakangi vanu kuvethi kuthzivithitha vivakatanda mu Mbimbiliya. Oloni vika Njambi nechelela evi vyuma kulingiwa? Vamo vatha kwendeka ngwavo: ‘Ngwe Njambi wapwa wakunyanyama na mana, ngwe natwana livulu lyakuthona mwamuvwa lije litwatha kuthzivithitha vwino. Cho vika kalingilemo?’ Tuchithimutwiyeni ha vingila vitatu vikanenetha vanu vajeneke kuthzivithitha Mbimbiliya.

1. Mbimbiliya ikakwatha vaje vapwa vaka-kulikehetha na vaje vashaka kulilongetha. Yesu  wendekele kuli Ishe ngwendi: “Njikukandelela yove Tate, Mwene wa lilu na hano hathi! Omwo vyuma evi wavishwekele kuli vaka-mana na kuli vaka-kulilongetha, cho unavisholola kuli vaka-kujeneka mana.” (Luka 10:21) Mbimbiliya vanaithoneka mu ngila ije ikwatha vaje vashaka kulilongetha. Vaka-kulijundula kuvethi kuithzivithitha mwafwa vakalimono kupwa “vaka-mana” manene. Oloni vaje valikehetha ngwe vanike vavandondo vakathzivithitha vwino lijwi lya Njambi. Mbimbiliya vaithonekele mwamuvwa manene.

2. Mbimbiliya vaithonekela vanu vaje vashaka ngwavo Njambi avakwathe kuithzivithitha. Yesu wamwethele ngwendi vanu vanapandele kuvakwatha mangana vathzivithithe mwamuvwa vyakele na kulongetha. Vanethi kuthzivithitha vati? Yesu wendekele ngwendi: “Oloni mukwathi, ikeye mundthzindthzime wa kujela, uje yakatuma tate mu lithzina lyange, akamilongetha vyuma vyoshe.” (Yowano 14:26) Ngechi, Njambi akana sipilitu yendi ya kujela ku vanu mangana ivakwathe kuthzivithitha vivali na kutanda. Oloni, Njambi kethi kwana sipilitu yendi ku vanu vaje kuvajendamenene hali ikeye, ngechi vakamono Mbimbiliya kupwa yaikalu kuithzivithitha. Sipilitu ya kujela ikatwamenena vaka-Kilisitu kuthzivuka muvatha kukwathela vanu vaje vatonda kuthzivithitha Mbimbiliya mwamuvwa.—Vilinga 8:26-35.

3. Vanu vatha kuthzivithitha viñanda vimo vya mu Mbimbiliya ha thimbu inapande. Chakumwenako, kapolofweto Ndanyele vamulekele kuthoneka muthzimbu uje wendekele ha vyuma vya kulutwe. Kangelo wamulekele ngwendi: “Ndanyele thzenga lipapelo na kwakaho chithatetho noho thimbu ya kaye ikahwa.” Ha myaka yaingi vanu vanatanda mukanda wa Ndanyele oloni kuvauthzivithithile mwamuvwa. Nameme Ndanyele vene kathzivithithile viñanda vimo vyathonekele. Walitavelele ngwendi: “Njathzivile vije wendekele, oloni kunjavithzivithithile.” Vanu vanathzivithitha mwamuvwa vupolofweto vwa Ndanyele ha thimbu yanangula Njambi. Kangelo wendekele ngwendi: “Ndanyele ololo watha kuya omwo majwi awa unapande kuwanyunga na kuwashweka mu mbunge yove noho akukotoka.” Veya vakathzivithitha muthzimbu wa Njambi? “Vaje vaka-kupengapenga kuvakathzivithitha vyuma evi, hanga vakalinga vene vuvi, kuvanga lika vaje vali na mana vakevo vakathzivithitha.” (Ndanyele 12:4, 8-10) Ngechi Njambi kethi kulumbununa viñanda vimo vya mu Mbimbiliya kuvanga noho thimbu yaivwa inete.

Vithimbu vinatanganetha Vakaleho va Yehova vajeneke kuthzivithitha Mbimbiliya ndi? Eyo. Oloni muyetele thimbu, Vakaleho vatengulwile kuthzivithitha kwavo. Vakulahela ngwavo kulinga ngocho kunapu kutembwinina mwanja wa tupositolo va Yesu Kilisitu vaje vatengulwile kuthzivithitha kwavo omwo Yesu wavanangwile.—Vilinga 1:6, 7.

Vithinganyeka vya uje mwanike kwetheketha nevi vikanene mashelwa vimwetha ngwavo kathzivithithile mwamuvwa. Oloni vyuma viyikalongetha Mbimbiliya vinapu vya theho manene kuli yeni. Viñanda vya mu Mbimbiliya vyatha kukwatha munu woshe woshe uje ashaka kuvithzivithitha omwo avitanda. Shakethzekeni vukwathi mangana muthzivithithe vimuli na kutanda. Tondeni vukwathi ku vanu vaje vashaka ngwavo sipilitu ya Njambi ivakwathe kuthzivithitha Mbimbiliya, vakulikehetha ngwe vanike, cho lalo vathzivuka ngwavo tuli na kuyoya mu thimbu ije Njambi atonda ngwendi tuthzivithithe manene Mbimbiliya. Endekeni na Vakaleho va Yehova hano vene nambe kutanda vyavo ha wembusaiti ya jw.org. Mbimbiliya yakulahetha ngwavo: ‘Lambelela kuthzivuka vyuma . . , cho ukawana lalo mana akuthzivuka Njambi.’—Vithimo 2:3-5.