VICHACHI vili mu kaye, vya kufwa ngwe, vya Katolika na Orthodox na Buddhism na vikwavo vyeka, vyashaka ngwavo vantwama vavo vapwe vathzike. Mu ngila ikwavo, vwingi vwa vanu vakalithzivi ngwavo echi kutenguluka chethzile mwafwa ya kushaka kulitenga ku vilinga vya vupangala mukati ka vulombelo vwa kulithethzathethza.

Ngechi, kunapu kwa theho kwihula ngwetu: Kuma Vithoneka vimwetha ngwavo vakulunu va vaka-Kilisitu vanapandele kupwa lika vathzike ndi? Tuchithimutwiyeni muyashangumukilile eyi ñanda nomwo mwakayimwenamo Njambi mangana tuwane chikumbululo ku chihula echi.

Livulu lya Encyclopædia Britannica lyalumbununa vuthzike kupwa “chifwa cha kujeneka kushomboka nambe kwambata nambe kujeneka kulilala na munu, mwafwa ya vipangi vimo vya mu vulombelo.” Mu 2006 Pope Benedict XVI wendekele eyi ñanda ya vuthzike mu ndthzango ya Valoma ngwendi chapwile “chithemwa chije chakeleko mu thimbu ya Tupositolo.”

Oloni vuthzike kuvwapwile chithemwa cha mu vulombelo vwa vaka-Kilisitu va mu chita cha myaka cha kulivanga. Kapositolo Paulu wanyanyamethele vaka-kukulahela va mu chita cha myaka cha kulivanga ngwendi valitenge ku vanu vaje vakendeka “makuli” na kuvindika “kwambata.”—1 Timateo 4:1-3.

Vaka-vichachi vya “vaka-Kilisitu” va mu mafuti a ku kangombe ka yambi navo vashangumukile kulinga chilika cha vuthzike. Livulu lya Celibacy and Religious Traditions, ngwalyo, echi chilika cha vuthzike “chatwaleleho, cho Chiyulo cha Valoma chakeleko mashiko amaha a kuvindika vanu kulilala.”

 Mu vita vya kavangeyeyeho, vantwama va vichachi vashangumukile kukundwiya echi chithemwa cha vuthzike. Vathinganyekele ngwavo nga ntwama wa vulombelo alilala na munu woshe woshe, cho ajwala. Oloni livulu lya Encyclopædia Britannica ngwalyo, “kushangumuka mu chita cha myaka cha vu 10 vwingi vwa tupilisitu na va mbishopu vakele na vanakathzi.”

Ha chiwano cha Lateran Councils chije chivalingilile mu Loma mu 1123 na 1139, valithzivathanene ngwavo vaje vakele na vitwamo mu vulombelo vwa Katolika vakevo lika vapandele kupwa vathzike. Vakeleko eli lishiko mwafwa vamwene ngwavo nga ntwama wa chachi ambata na kukala na vana, cho vimbongo na vyuma vya chachi vishandoka.

Njambi nalumbununa mwamuvwa mwakamwenamo vuthzike mu Lijwi lyendi, Mbimbiliya. Yesu wendekele ngwendi vamo vanalyangwila kupwa vathzike “omwo Vumwene vwa mwilu.” (Mateo 19:12) Mu ngila imo lika, kapositolo Paulu wendekele hali vaka-Kilisitu vaje valyangwilile kukavangeya mwanja wendi wa kupwa vathzike “omwo muthzimbu wauvwa.”—1 Kolinte 7:37, 38; 9:23.

Oloni, Yesu na Paulu kuvashikile ngwavo vakulunu va vulombelo vanapande kupwa vathzike. Yesu walumbunwine ngwendi vuthzike vwapwa ‘vwana’ vuje vuvakele navwo vamo vaka-kumukavangeya. Omwo Paulu wathonekele hali “vathzike” wendekele ngwendi: “Kunjethi na lishiko lya kutunda kuli Mwene, oloni njimyana viyongola vyange.”—Mateo 19:11; 1 Kolinte 7:25.

Mbimbiliya imwetha lalo ngwavo vwingi vwa vakulunu va vaka-Kilisitu va mu vithimbu vya tupositolo vakele na vanakathzi. Umo wavo wapwile Petulu. (Mateo 8:14; Mako 1:29-31; 1 Kolinte 9:5) Kulinga vupangala kwalithalele manene mu Loma ha thimbu ije, mukemwo Paulu wathonekele ngwendi nga mukulunu muka-Kilisitu ambata, cho wapandele “kupwa munalume wa munakathzi umo lika,” cho lalo na “vana vendi vapwe vaka-kumwononoka.”—1 Timateo 3:2, 4.

Ava vaka-kulyambata kuvavavindikile kulimona na muka-njuvo yavo, mwafwa Mbimbiliya ngwayo: “Munalume alinge na munakathzi wendi vije vyamupande,” cho lalo inendeka ngwavo vaje vanalyambata kuvapandele ‘kulikanangana’ ha ñanda ya kulilala. (1 Kolinte 7:3-5) Ngechi Njambi kashikile ngwendi vanu voshe vapwe vathzike, kwambatethelela na vantwama va vaka-Kilisitu.

Nga vanu voshe kuvavashikile kupwa vathzike, cho vika vyalingithile Yesu na Paulu vathzumbangeye vuthzike? Mwafwa vuthzike vwatha kukwatha munu akale na thimbu yaingi ya kwambulula muthzimbu wauvwa. Vathzike vakalyana kulinga vyavingi, mwafwa kuvethi mu vishoti vivakaliwana navyo vaje vali mu malo.—1 Kolinte 7:32-35.

Achithinganyekeni ha mwanja wa David, uje walikelele chipangi chije chakele na kumuwanetha vimbongo vyavingi na kujalukila ku Costa Rica mu kulongetha vakwavo Mbimbiliya. Kuma David walithzivile ngwendi vuthzike vwamukwathele kulinga ngocho ndi? Nendeka ngwendi: “Kwapwile kwakukalu kwithzilila vithemwa vyaviha na yoyethi yaiha, oloni ha kuwana ngwavo njakele likalyange, chapwile chachathi kwithzilila.”

Claudia, muka-Kilisitu wa muthzike, uje najalukila ku mutambela kuje kuli vujene vwa vaka-kwambulula, ngwendi: “Njikalikuwu kupangela Njambi. Likulahelo na vuthamba vwange na Njambi vukakanyama ha kumona omwo ali na kunjinyungilamo.”

Vuthzike kuvwapandele kupwa chitele. Claudia nendeka lalo ngwendi: “Nambe munu wapwa muthzike nambe ali mu vulo, apwa wa kuvwahelela nga apangela Yehova Njambi na mbunge yendi yoshe.”—Myatho 119:1, 2.