“MBASI yatha kuya, oloni ou mukwenje wa mu Chinese athale.” Alexandra wathzivile awa majwi te ali mu mbasi, ije yemanene ha nginga ya mafuti avali a ku South America. Washulukile mu mbasi mangana amone vika vili na kulingiwa kuli mukwenje wa mu Chinese uje kathzivukile mwamuvwa ndaka ya Spanish yapangethele mu kuleka kapokola wa ha nginga ya lifuti vya vukalu vwendi. Alexandra walyanene kulumbununa vyakele na kwendeka uje mukwenje mwafwa wakele mu chikungulukilo cha chi Chinese cha Vakaleho va Yehova.

Ou mukwenje wendekele ngwendi wathemukilile mu America, oloni mapwepwe vakevo vamwivilile mapapelo na vimbongo vyendi. Ha kulivanga uje kapokola katavele vyuma vyendekele uje mukwenje, na kuthinganyekela Alexandra ngwendi wapwa muka-kulandetha vanu. Mamanethelelo uje kapokola watavele vyendekele uje mukwenje, oloni wamufwetethele mwafwa ya kujeneka kukala na mapapelo akumutavetha kukovela mu lifuti. Alexandra wamukumwithile $20 mwafwa wajenekele vimbongo vya kufweta ku mulonga. Ou munalume wakandelelele manene na kukulahetha ngwendi akafweta Alexandra vimbongo vyavingi kutuvakana $20. Alexandra wakumbulwile ngwendi kavandamenene kumwakelaho kakondwetho, oloni washuvulukile ku mukwatha mwafwa chapwile chuma chachivwa kuli ikeye. Alexandra wanene uje mukwenje mavulu a kukundama ku Mbimbiliya na kumushongangeya akalilongethe na Vakaleho va Yehova.

Kukathzivitha kuvwaha kuthziva ngwavo kuli vanu vatha kumwetha ngothzi ku vanu veka. Vaka-kukulahela na vaka-kujeneka kukulahela vakamwetha ngothzi ya chifwa echi ku vakwavo vanu. Ngwe yeni va Alexandra ngwe mwathele kukwatha uje mukwenje ndi? Tunapande kulihula echi chihula mwafwa Yesu wendekele ngwendi: “Muli kujolela kwakama manene mu kwana kutuvakana mu kutambula.” (Vilinga 20:35) Na vaka-sayansi vanawana ngwavo kuli vuvwa vuli mu kwana. Tuchithimutwiyeni hali ovwo vuvwa vwalivungilamo.

Vaka-kutondethetha vanawana ngwavo kwana na kuvwahelela vikendelela. Kapositolo Paulu wathonekele ngwendi “Njambi athzema uje ana na kujolela.” Wendekele hali vaka-Kilisitu vaje vanene milambu mu kukwatha vakwavo vaka-kukulahela vaje vakele mu vukalu. (2 Kolinte 8:4; 9:7) Paulu kendekele ngwendi valambwile mwafwa ya kuvwahelela kwavo, oloni vapwile vakuvwahelela mwafwa ya kwana kwavo.

Chilongetha chimo chimwetha ngwavo kwana “kukanenethela munu apwe wa kushuvuluka mu vwongo na kulithzivathana mwamuvwa na vanu na kumukulahela na kupwa wa ‘ndthzandthzu.’” Chilongetha chikwavo chimwetha lalo ngwavo “kwana mukwetu vimbongo kukanene kuvwahelela kwakama kuhyana kuvipangetha lika yetu vavenya.”

Mwalithzivaho laja ngweni kumwatha kwana mwafwa ya katumbamethi keni ndi? Kwendeka lika vuthunga, munu woshe atha kuwana kuvwahelela kuje kukatundu mu kwana na “kujolela.” Kukwatha vakwetu kukulumbununa  ngwavo tunapande kuvana lika vyuma vyakama. Mukaleho wa Yehova umo watumine muthzimbu hamo lika na mulambu kuli vaka-kuthoneka eyi mangazini. Omu mu muthzimbu wendekele ngwendi: “Ha myaka yaingi ineti njinakala na kwana tu vimbongo twatundondo lika ku Njuvo ya Vumwene. Oloni Yehova Njambi nanjana vyuma vyavingi kutuvakana vije vinjinamwana. . . Njakandelelako manene ha kunjitavetha kwanako ovu vwana, mwafwa vukanjishuvulwitha.”

Kuli vyuma vyavingi vitunatha kwana, kethi vimbongo lika embwe. Twatha kwana mu vingila vya kulithethzathethza.

Mbimbiliya ngwayo: “Muka-ngothzi anyunga mwamuvwa mwonyo wendi, oloni munu wa kukaluka aliyandetha lika ikeye vavenya.” (Vithimo 11:17) Vaka-ngothzi vakathzituka kwana thimbu yavo na ndthzili yavo na vikwavo vyeka. Eyi futithi ikavakwatha mu vingila vyavingi, kwambatethelela na kulikangula ku mivila

Vilongetha vimwetha ngwavo vaje valyana kukwatha vakwavo vakatepulula ku mishongo imo na ku vishoti vyavo. Vakapu vakulikangulako ku mivila. Nameme vaje vaka-kuvinja mishongo yakama ya kufwa ngwe HIV na ikwavo yeka, vakalithziviko mwamuvwa nga vana. Vukaleho vukwavo vumwetha ngwavo vaje vanechela kunwa vwala vatha kutepulula ku vishoti nga vakwatha vakwavo, cho kuvakwatha lalo vajeneke kunwa manene vwala.

Kuvwahelela kutukathzivi nga twana kunatha kutulingitha “tukale na ngothzi na mema ku mbunge vije vinatha kutepulula ku vithinganyeka vyavivi.” Kwana kunatha kutepulula ku vishoti na mishongo ya mbunge. Vuthiwa vwa vanu vaje vanathsitha muka-njuvo yavo vukatepuluka omwo valyana kukwatha vakwavo.

Kwana kwapwa kwakuvwa mwafwa kumikwatha.

Yesu washongangeyeye vaka-kumukavangeya ngwendi: “Aneni vakweni, cho Njambi akamyana. Mwa vuthunga vene, mukatambula vyavingi, vukwathi vwa kushemutukwa, vakavwaka mu mavoko eni, vukwathi vuje vwoshe mwatha kukwata. Theteko ije mutheteka nayo vakweni, ikeyo yakamitheteka nayo Njambi.” (Luka 6:38) Nga mwana vakweni, cho vakandelela na kutembwinina mbunge yeni ya kwana. Kwana kukanene likwatathano na kulingitha vanu vamithzeme.

Vaka-kutondethetha vaje vakalilongetha vya vuthamba vwa vanu vanendeka ngwavo: “Vanu vaje vakala na mbunge ya kwana vakwavo vakalingitha vakwavo vavatembwinine.” Nameme “kutanda lika viñanda vya vanu vaje vakamwetha ngothzi ku vakwavo, kunatha kumishongangeya muvatembwinine.” Mukemwo chilongetha chimo chimwetha ngwavo munu umo muka-kwana natha kushongangeya vanu vavangi kupwa vaka-kwana nameme kavathzivuka.” Mu ngila ikwavo kwana kunatha kushongangeya vanu va mu chitingitingi kupwa va kulikwatathana. Mushaka kuyoya mu mwela wa chifwa echi ndi? Chili vene, nga vanu vavangi vapwa vaka-kwana, cho vyuma vyenda mwamuvwa.

Vyuma vyalingiwile ku Florida, U.S.A. vimwetha vuvwa vwalivungila mu kwana. Mbunga ya Vakaleho va Yehova valyanene kukakwatha ku mwela kuje kwetile  likankumba lyakama lije lyaviyithile vyuma. Ha thimbu ivavandamenene vyuma vya kupangetha ku njuvo ivakele na kuvwahetha, vamwene chivumbe chinathiwuka cha munalume uje watungile muyehi naije njuvo, cho valyanene kumuvwahethelacho. Omwo kwetile thimbu, uje munalume wathonekelele ku chikota cha Vakaleho va Yehova ngwendi: “Njikakandelela manene ku vyuma vivanjilingilile. Kanda njimoneho laja vanu va vimbunge vyavivwa ngwe ava.” Kukandelela kwamulingithile atume mulambu wa kupangetha ku chipangi chatumbwile ngwendi, chipangi cha kukathametha cha Vakaleho.

Vaka-sayansi vanawana ngwavo: “Vanu vavatangele na chashu cha kukwatha vakwavo.” Chilongetha chimo chimwetha ngwavo, “Vanike vakamwetha ngothzi thimbu kanda vashangumuke kwendeka.” Mwafwa vika? Mbimbiliya ya kumbulula mwamuvwa ngwavo vanu vavatangele mu “chifwa cha Njambi,” kulumbununa ngwavo vakala na vifwa vya vunjambi.—Kushangumuka 1:27.

Chifwa chikwavo cha kukathametha cha Ishamatanga yetu, Yehova Njambi chapwa kwana. Natwana kuyoya na vyuma vyavingi vya kulikwatha navyo vije vikatuthzivitha kuvwaha. (Vilinga 14:17; 17:26-28) Nga tulilongetha Lijwi lyendi Mbimbiliya, cho tuthzivuka mwamuvwa Tate yetu wa mwilu na vyuma vyavivwa vyanayongola kutulingila. Mbimbiliya inendeka lalo ha chuma chanatulingila Njambi chije chitwathiwitha kukalikuwa vyuma vyavivwa kulutwe. * (1 Yowano 4:9, 10) Kutwapandele kukathama omwo tumona vanu vana vakwavo vyuma, mwafwa vali na kutembwinina Yehova Njambi uje wapwa nthsina ya vyuma vyoshe vyavivwa, cho akalithzivi kuvwaha nga tumutembwinina.—Vahevelu 13:16.

Muchanuka Alexandra uje itunendeka ku maputukilo eyi ñanda ndi? Vuvwa muka vwatundile mu vyuma vyalingile? Nameme munu umo wakele muje mu mbasi wendekele ngwendi vije vimbongo vyanene Alexandra kuli uje mukwenje vyapwile vya kumbila lika mu mema, oloni uje mukwenje watuminine va vuthamba vaje vakele hayehi na haje ha yemanene ije mbasi, ngechi vamukwathele kufweta uje mukuli wendi wa $20. Cho lalo, uje mukwenje walingile vyuma vyamulekele Alexandra, cho washangumukile kulilongetha Mbimbiliya. Alexandra wavwahelelele manene kuliwana na uje mukwenje munina ya vingonde vitatu ku chiwano cha mutambela cha Vakaleho va Yehova cha mu ndaka ya chi Chinese, mu Peru. Ou mukwenje walanyele Alexandra na vanu vaje vaile navo ku chiwano cha mutambela ku chitanda chendi cha kulila mangana amwethe kukandelela ku vyuma vyoshe vyamulingilile.

Kwana na kukwatha vakwetu kukanene kuvwahelela kwakama. Maneneni nga mukwatha vanu vathzivuke Yehova Njambi uje wapwa Ishamatanga wa vyuma vyoshe vyavivwa. (Yakomba 1:17) Muli na kulikuwa vivethzikitho vitunda mu kwana ndi