Njakolelele mu nganda ya Puerto Limón ije yakala ku ngenge ya mu ngangela ya Costa Rica. Vithemi vange vakele na vana 8, cho yange njapwa wa vu 7. Vatate vathsile te njili na myaka 8. Vanana vakevo vatulelele.

Njathzemene manene vweho vwa Baseball mu kuyoya kwange. Nambe ku vwanike njakele na kweha ovu vweho. Omwo njakele na myaka ya kukokela ku 20, njakovelele mu chivunga cha vanike cha vaka-kweha ovu vweho. Munjakele na myaka ya kutuvakana 20, mukulunu wa chivunga cheka wanjilekele ngwendi njikehe mu chivunga cha vitongwe ku Nicaragua. Oloni njavyanene kuya ku Nicaragua, mwafwa njakele na kuvinjitha vanana. Kutundoho, mukulunu mukwavo wanjilanyele kukeha mu chivunga chimanena lifuti lyoshe lya Costa Rica mu vweho vwa baseball. Vaka-kweha omu mu chivunga vapandele kupwa lika vitongwe. Ha thimbu oyo, njatavele kuya. Njehele omu mu chivunga kushwa mu 1949 kutwala mu 1952, cho twakehelele ku Cuba na ku Mexico na ku Nicaragua. Vanjikulahelele manene mu vweho, mwafwa njakele na kweha mwamuvwa ha vithimbu vyavingi, kujeneka kulimbenja. Njakele na kulithziva vwino kuthziva mbunga inatuthzengeleka itumbula lithzina lyange.

Oloni yoyethi yange yapwile ya mathzilo. Njakele na mapangala vavengi na kunwa manene vwala. Litangwa limo njapendele manene, cho kunjathzivukile nomwo munjelukilile ku njuvo. Njalikovelethele na mu vweho vwa linyanyamena.

Ha thimbu injakele na futithi ya chifwa echi, vanana vashangumukile kulikwatathana na Vakaleho va Yehova. Vethekele kunjishongangeya kulikwatathana navo, oloni kunjalingile ngocho, mwafwa njathzemene manene vweho vwange. Ha thimbu ya kweha kunjanukile nambe kulya. Vithinganyeka vyange vyoshe vyaile lika ku kweha. Njathzemene manene vweho vwa baseball kutuvaka vyuma vyoshe.

Oloni litangwa limo mutwakele na kweha, njavulumukile mwamuvi. Ha thimbu oyo, njakele na myaka 29. Omwo njakangukile, njalikelele kweha mu vivunga vyakama. Oloni njichinakele na kulongetha vivunga vya vanike vaje vakele na kweha ovu vweho kuyehi na limbo lyetu.

Mu 1957, vanjilanyele ku chiwano cha mutambela cha Vakaleho va Yehova chije chivalingilile mu sitendiyamu mutwakele na kwehela baseball, cho njaile. Munjaketele kuje, njakamwene ngwange Vakaleho vapwa va kulithingimika kutuvakana vanu vaje vakele na kulikungulwila ku vweho vwa baseball. Vinjakamwene kuje ku chiwano, vyanjishongangeyeye kulilongetha Mbimbiliya na Vakaleho na kukunguluka ku viwano vyavo vya chikungulukilo.

Viñanda vya mu Mbimbiliya vinjakalilongethele, vyanjithzivithile kuvwaha. Chakumwenako, Yesu wapolofwetele ngwendi mu matangwa a kukotoka vandongethi vendi vakambulula muthzimbu wauvwa wa Vumwene vwa Njambi mu kaye koshe. (Mateo 24:14) Njalilongethele lalo ngwange vaka-Kilisitu va vuthunga kuvethi kupanga chipangi chavo mu kushaka kuwanenaho nganyo. Yesu wendekele ngwendi: “Yeni munavitambula vyangocho kujeneka kufweta, ngechi vene, neni lalo aneni ngocho kujeneka kutambulaho chimo.”—Mateo 10:8.

Omwo njalilongethele Mbimbiliya, njethekethele vinjalilongethele ku vyuma vinjamwene kuli Vakaleho va Yehova. Njanangukile vya kufwitangana kwavo mu chipangi cha kwambulula muthzimbu wauvwa wa Vumwene vwa Njambi mu kaye mwoshe. Njamwene ngwange vali na kwononoka lishiko lya Yesu uje washikile vaka-Kilisitu voshe ngwendi vapwe vaka-kwana. Ngechi, omwo njatandele mukanda wa Mako 10:21 kuje Yesu wendekele ngwendi: “Wije unjikave,” njashakele kupwa Mukaleho.

Oloni njeshwalele kwechela ovu vweho. Chakumwenako, njatwaleleleho kweha chalumingo na chalumingo mu chivunga cha lifuti ha nambala yange ya “sande” nambe ngwetu ya kuvethzika Njalilongethele mu Mbimbiliya ngwavo Njambi wathzinda vaka-kulemetha “vinjambi va sande” na vaka-chipululu. (Isaya 65:11; Kolose 3:5) Ngechi, njechelele vweho vwa linyanyamena. Mulyetele litangwa lya Chalumingo kutunda hanjechelelele kweha, vanu vatondele lalo ngwavo njikehe ha nambala yange ya “sande.” Vanjijolele omwo kunjaileko chije chalumingo na kunjithindiya kuyako thimbu ikwavo, oloni njavyanene. Kunjelukile ku vweho vwa linyanyamena lalo.

Ha litangwa livanjimbwitikile ku chiwano cha mutambela cha Vakaleho va Yehova, njaliwanene na chetheko chije chashakele kunjonowetha kuthzala “vunu vwavuha.” (Efeso 4:24) Ha litangwa lije vene mangwethzi munjakele na kwiluka ku njuvo ya kwetela vangendthzi, njakawanene mumbanda uje wapwile lipangala lyange nanjivandamena ku chikolo. Wanjilekele ngwendi: “Sammy, njineja twakulithzimeko vuli.” Oloni njamukumbulwile vwathivwathi ngwange: “Shange.” Njamulekele ngwange njashangumuka kupangetha vinangulo vya mu Mbimbiliya. (1 Kolinte 6:18) Cho wanjihwile ngwendi: “Ngwove vati?” Cho wanjilekele ngwendi, vinangulo vya mu Mbimbiliya vije vivindika kulilala vyapwa vya ngocho, yetu twapandele lika kutwalelelaho mu vuthamba vwetu. Oloni njakovelele lika mu mulili wange na kupata ku chikolo. Lelo lino, njavwahelela kumileka ngwange, kushwa hanjapwililile Mukaleho mu 1958, kunjelukilile lalo ku futithi yange ya laja.

Njilithziva lika ngwe njithoneke livulu lya vyuma vyavivwa vinjinawana mu kukavangeya vinangulo vya mu Mbimbiliya. Njendekako lika vyavindondo. Njawana vavuthamba vavangi va vuthunga na vuyoye vwa kulumbunuka, cho lalo njawana kuvwahelela kwa vuthunga.

Njikehe baseball, oloni njathzivuka vyuma vya theho manene. Mu vweho vwa baseball, njathsimanene na kuwana vimbongo vyavingi, oloni vyapwile vya kathimbu kakandondo lika. Oloni vuthamba vwange na Njambi na vakwetu vaka-kukulahela vutwalelelaho. Mbimbiliya ngwayo: “Kaye na vyuma vyoshe vilimo vije vanu vashungwiya vili na kwita, oloni vaje valinga chithzango cha Njambi vakayoya myaka yoshe.” (1 Yowano 2:17) Hano oni, njathzema manene Yehova Njambi na vanu vendi kutuvakana vyuma vyoshe.