MUTWE WAKAMA | VAKA-KULONDA TUVALU VAWANA VANAMIKUNDAMA VATI?
Muvanamikundamena Vaka-Kulonda Tuvalu Vawana
Tuvalu vali na kushatuka mu kukathametha. Tuvalu va ndthzili vawana na vanu vaje vanalondoho, vanavalumbununa mwamuvwa mu Mbimbiliya. Kavalu wa kulivanga napu wa kutoka, uje ivanalondo kuli mwene wamuha ivanashwanetha. Munima yendi mukavangeya kavalu wa kuvenga, cho uje nalondoho, napu muka-kunena vindthzita mu kaye. Kunatakana lalo kavalu wa kuthzivala vwi, ngwe lithuthulungu, cho uje namulondoho nakwata vipetheletho vije vimanena kuhwa kwa vyakulya. Kavalu wa mu chiwana napu wa kutokoloka, cho uje nalondoho napu muka-kunena mishongo na vyuma vyeka vya vushonde vije vikathsiyi vanu. Vimbumbo vimukavangeya munima na kunyongetha myonyo ya vanu.—Kujombolola 6:1-8.
“Njathzivile manene lyova omwo njatandele vya tuvalu vawana na vanu vaje valondeleho. Njathinganyekele ngwange Litangwa lya Kuthompa lili muyehi, cho njalithzivile ngwange kunjovoka mwafwa kunjalivwahethelele.”—Crystal.
“Njakathamene omwo njatandele vya tuvalu vawana va vifwa vya kulithethzathethza na vanu vaje valondeleho. Oloni njalithzivile mwamuvwa hanima ya kuthzivithitha chimona cha vaje tuvalu na vaje valondeleho.”—Ed.
Neni mukalithzivi ngwe mwalithzivilile Crystal omwo mutanda vya vanu vaje vanalondo ha tuvalu vawana vaje vamwetha kukotoka kwa kaye ndi? Indi hamo mukalithzivi ngwe mwalithzivilile Ed? Ava tuvalu vawana na vanu vaje vanalondoho, vanavalumbununa mwamuvwa mu livulu lya Kujombolola, lije lyapwa lya mamanethelelo mu Mbimbiliya. Muwana vukwathi nga muthzivithitha echi chimona cha tuvalu vawana. Mu ngila muka? Njambi nendeka ngwendi tupwa va kuvwahelela nga tutanda na kulilongetha na kupangetha vyuma vivanathoneka muje mu livulu lya vupolofweto.—Kujombolola 1:1-3.
Vamo vanatha kuthziva lyova omwo vatanda vya chimona cha vanu vaje vanalondo ha tuvalu vawana, oloni kuchapandele kumitewetha. Vanu vavangi vanendeka ngwavo likulahelo na lilavelelo lyavo lya vyuma vyavivwa vya kulutwe likakanyama omwo vatanda vya vanu vaje vanalondo ha tuvalu vawana. Echi chimona neni chatha kukanyametha likulahelo lyeni. Twaleleleniho kutanda.