CAPITA 37

Kuma banapande kunjimbwitika ndi?

Fundikeni mu cipalo mangana mumwese indi ebi biñanda binatako mukemwo bene indi keti mukemwo:

Muka-Kristu woshe banapande kumumbwitika.

□ Mukemwo

□ Keti Mukemwo

Cilengo cakama cibanapande kumimbwitikila cinapu kuminyungilila ku kulinga bubi.

□ Mukemwo

□ Keti Mukemwo

Cimbwitiko cimilingisa mukoboke.

□ Mukemwo

□ Keti Mukemwo

Nga kubamimbwitikile, co kumulitabela kuli Njambi mwafwa ya bilinga byeni.

□ Mukemwo

□ Keti Mukemwo

Nga babusamba beni banabambwitika, co neni bene banapande kumimbwitika.

□ Mukemwo

□ Keti Mukemwo

NGA muli na kuyoya mu kulitombola na mashiko a Njambi na kukanyamesa busamba bweni nendi na kulekako bakweni bya likulahelo lyeni, co munapande kusinganyeka bya kumimbwitika. Oloni mwasa kuzibuka bati indi mwalibwahesela kumimbwitika? Tucisimutwiyeni tahi ha biñanda bili helu bimunakumbulula ngweni mukemwo indi keti mukemwo mangana tukumbulule eci cihula.

● Muka-Kristu woshe banapande kumumbwitika.

Mukemwo. Yesu washikile ngwendi bandongesi bendi banapande kubambwitika. (Mateo 28:19, 20) Yesu nendi walyangwilile kumumbwitika. Nga mushaka kukabangeya Kristu, banapande kumimbwitika nga munete ha seteko hamwasa kulyangwila yeni babenya ngweni bamimbwitike, co lalo munapande kulinga ngoco kutundilila kwisi ya mbunge yeni.

● Cilengo cakama cibanapande kumimbwitikila cinapu kuminyungilila ku kulinga bubi.

Keti Mukemwo. Cimbwitiko capwa bukaleho buje bumwesa mbunga ngwabwo munalikundika kuli Yehova. Kulikundika kuli Yehova kukwapwile ngwe cikumiiyo cije cimyonowesa kulinga byuma bimushaka kulinga ku bushweke. Oloni, mulikundika kuli Yehova mwafwa mushaka kumwesa ngweni mushaka kuyoya mu kulitombola na mashiko endi.

● Cimbwitiko cimilingisa mukoboke.

Mukemwo. Mbimbiliya ngwayo cimbwitiko cinapu cuma ca seho manene cije cilingisa munu akoboke. (1 Petulu 3:21). Oloni oku kukulumbununa ngwabo tunapande kumona cimbwitiko kupwa ngila ya kwobokelamo lika embwe. Kuzema Yehova na kushaka kumupangela na mbunge yeni yoshe bikebyo binapande kumilingisa mulyangwile kumimbwitika.—Mako 12:29, 30.

● Nga kubamimbwitikile, co kumulitabela kuli Njambi mwafwa ya bilinga byeni.

Keti Mukemwo. Mukanda wa Yakomba 4:17 ngwawo: “Munu woshe uje azibuka kulinga mwamubwa oloni kalingimo, ali na mulonga wa bubi” nameme banamumbwitika nambe embwe. Ngeci, nga muzibuka byuma byabibwa, co lalo munete ha seteko hamwasa kulyangwila byakulinga mu kuyoya, co ikeyo bene simbu yaibwa ya kusimutwiya byei ñanda na bisemi beni nambe muka-Kristu wa kuhya. Nga mulinga ngoco, co muzibuka bimunapande kulinga mangana mwete ha kumimbwitika.

● Nga babusamba beni banabambwitika, co neni bene banapande kumimbwitika.

Keti Mukemwo. Yeni babenya munapande kulyangwila kumimbwitika. (Myaso 110:3) Munapande kulyangwila kumimbwitika munima ya kuzibuka mwamubwa byalibungila mu kupwa Mukaleho wa Yehova na kulibwahesela kulinga byalibungilamo.—Muka-kwambulula 5:4, 5.

Kumimbwitika Kutengulula Buyoye Bweni

Kumimbwitika kutengulula buyoye bweni na kumilingisa muwane bibezikiso byabingi. Co byuma bimulinga mu kuyoya kweni kwoshe binapande kumwesa ngwabyo mwalikundika kuli Yehova.

Kuma neni mushaka kulikundika kuli Njambi ndi? Nga mukemwo, co munapande kupwa ba kubwahelela. Mubezika manene nga mulyangwila kupangela Yehova na mbunge yeni yoshe na kuyoya mu ngila ije imwesa ngwayo mwalikundika kuli ikeye mu kuyoya kweni kwoshe.—Mateu 22:36, 37.

CISONEKA HANEMANA SIMPI

‘Aneni mibila yeni kupwa mulambu wa kuyoya, wa kujela, uje watambula Njambi, kulumbununa cipangi ca kujela cimupanga na nzili yeni ya kusinganyeka.’—Loma 12:1.

LINGENI EBI

Lekeni bisemi beni bamikwase kuwana ndolome nambe ndokazi uje asa kumikwasa kupwisamo bitondeka mangana bamimbwitike.—Vilinga 16:1-3.

MUZIBUKA NDI . . . ?

Cimbwitiko capwa mutamba wa seho manene wa “cizibukiso” ca kwoboka.—Ezekiyele 9:4-6.

BINJINAPANDE KULINGA

Ha kulinga mangana njikole ku sipilitu na kweta ha kunjimbwitika, njinapande kuzibisisa mwamubwa bilongesa bya mu Mbimbiliya binatako: ․․․․․

Binjishaka kwihula bisemi bange ha ñanda ei ․․․․․

MUMONA BATI?

● Mwafwa bika cimbwitiko capwa ca seho?

● Bika byasa kulingisa mukwenje nambe mumbanda alibange kulyangwila kumumbwitika?

● Bika byasa kulingisa mukwenje nambe mumbanda akwate-kwate ku masinde kulikundika kuli Yehova na kumumbwitika?

[Majwi]

Kwanuka ngwange bananjimbitika kukanjikwasa kwangula mwamubwa byakulinga na kujeneka kwangula byuma bije byasa kunjikobelesa mu bukalu.’’—Holly

[Cipalo/​Cikupulo]

Bihula Bibakehula Manene Banu ha Cimbwitiko

Cimbwitiko cimanena bika? Nga munu bamumbwitika mu mema na kumujabululamo, kulumbununa ngwabo ecela kuyoya yoyesi ya kulitondela byendi lika, co ayoyeloni kulinga cizango ca Yehova.

Kulikundika kuli Yehova kulumbununa bika? Nga munu alikundika kuli Yehova, alumbununa ngwendi ecela kulyendesa, co akulahesa ngwendi aka kulinga cizango ca Njambi mu mutamba wa kulibanga. (Mateo 16:24) Napande kulinga ngoco mu lilombelo simbu kanda litangwa lya kumumbwitika lyete.

Munu napande kuyoya bati simbu kanda bamumbwitike? Napande kuyoya mu kulitombola nebi bilyendeka Lijwi lya Njambi na kulekako bakwabo byuma byakulahela. Napande lalo kukanyamesa busamba bwendi na Njambi kwitila mu kulombela kuli ikeye na kulilongesa Lijwi lyendi. Yeni babenya munapande kulyangwila indi mupangela Yehova, bahi banapande kumisindiya.

Kuma kuli myaka yanapande kupwisamo munu asina basa kumumbwitika ndi? Kumbwitika munu kukwemanene ha myaka. Nameme ngoco, munu napande kweta ha seteko hanasa kuzibisisa bikulumbununa kulikundika kuli Njambi.

Bati nga munu ashaka kumumbwitika oloni bisemi bendi bamuleka ngwabo acibandamene? Hamo bisemi bendi bashaka ngwabo alizilise tahi yoyesi ya kupwa muka-Kristu. Ngeci, napande kumona cinangulo cabo kupwa ca seho na kupangesa oyo simbu mu kukanyamesa busamba bwendi na Yehova.—1 Samwele 2:26.

[Cipalo]

Worksheet

Kuma Muli na Kusinganyeka Bya Kumimbwitika Ndi?

Pangeseni bihula na biñanda binatako mu kumona indi mwalibwahesela kumimbwitika. Tandeni bisoneka bibanamwesa simbu kanda musoneke bikumbululo byeni.

Mu bingila muka mumuli na kumwesela ngweni mwakulahela Yehova?—Myaso 71:5. ․․․․․

Munamwesa bati ngweni mwasa kwangununa byuma byabibwa na byuma byabibi?—Vahevelu 5:14. ․․․․․

Mukalombela lungahi? ․․․․․

Kuma mukalombela kutundilila kwisi ya mbunge ndi? Malombelo eni akamwesa bati mumwazema Yehova?—Myaso 17:6. ․․․․․

Sonekeni bilengo bimushaka kulyakela kutalesa ku malombelo eni. ․․․․․

Kuma mukakala na cilongesa ca munu endilika simbu yoshe ndi?—Yoshwa 1:8. ․․․․․

Bika bimukalilongesa ha simbu ya cilongesa ca munu endilika? ․․․․․

Sonekeni bilengo bimushaka kulyakela kutalesa ku cilongesa ceni ca munu endilika. ․․․․․

Kuma muli na kupanga mwamubwa cipangi ca kwambulula ndi? (Byakumwenako: Kuma mwasa kulumbunwina bakweni bilongesa bya mashangumukilo bya mu Mbimbiliya ndi? Kuma mukelukila kusimutwiya na banu baje banatambwile mwamubwa muzimbu umunabambulwilile ndi? Kuma munalyakela cilengo ca kutwamenenako cilongesa ca Mbimbiliya ndi?)

□ Eyo □ Embwe

Kuma mukai mu lihya nameme bisemi beni kubailemo ndi?—Vilinga 5:42.

□ Eyo □ Embwe

Sonekeni bilengo bimushaka kulyakela kutalesa ku cipangi ca kwambulula.—2 Timateo 2:15. ․․․․․

Kuma mukakunguluka simbu yoshe, indi ha bisimbu bimo lika?—Vahevelu 10:25. ․․․․․

Mitamba muka imukakala nayo ku biwano? ․․․․․

Kuma mukakunguluka nameme bisemi beni kubakunguluka (nga bakebo bamitabesa kukunguluka) ndi?

□ Eyo □ Embwe

Kuma mushaka bene kulinga cizango ca Njambi ndi?—Myaso 40:8.

□ Eyo □ Embwe

Kuma mwasa kwendekako bisimbu bimo bimwabyanenene bakweni baje bashakele kumyungumuna ndi?—Loma 12:2. ․․․․․

Bika bimushaka kulinga mangana mutwaleleleho kukanyamesa busamba bweni na Yehova?—Yunda 20, 21. ․․․․․

Kuma mutwalelelaho kupangela Yehova nameme nga bisemi na babusamba beni becela kulinga ngoco ndi?—Mateo 10:36, 37.

□ Eyo □ Embwe

[Cikupulo]

Cimbwitiko capwa ca seho manene ngwe kukobela mu bulo, co munu kapandele kucombwanesa