CAPITA 35

Njasa Kupwa Bati Kabusamba ka Njambi?

Jeremy wamwene seho ya kulikuta busamba na Njambi munima ya kuliwana na bukalu bwakama. Wendekele ngwendi: “Munjakele na myaka 12, batate basezele naanga yetu. Co litangwa limo butsiki njalombelele. Njalombele Yehova ngwange alingise batate beluke.”

Nameme wakele na kuliziba busiwa, Jeremy washangumukile kutanda Mbimbiliya. Mwazibile biwendeka mukanda wa Myaso 10:14, wabwahelelele manene. Ou mukanda wendeka hali Yehova ngwawo: “Muka-kuzeya alita kuli yobe, omwo simbu yoshe u muka-kukwasa baka-kujeneka [bisiwa.]” Jeremy ngwendi: “Njalizibile ngwe Yehova ali na kusimutwiya nange na kunjileka ngwendi ikeye mukwasi wange na Tate. Co kukwesi cisemi wamubwa manene kumutubakana.”

NAMEME muli na kuliwana na bukalu bwaliwanene nabwo Jeremy nambe embwe, Mbimbiliya imwesa ngwayo Yehova ashaka ngwendi mulikute nendi busamba. Mbimbiliya ngwayo: ‘Shwenyeni kuyehi na Njambi, co na ikeye lalo ashwenya kuyehi neni.’ (Yakomba 4:8) Acisinganyekeni biwalumbununa awa majwi: Nameme kumwasa kumona Yehova Njambi, co lalo kalifu neni nambe kupwa hamo neni, oloni ali na kumilanya ngwendi mupwe kabusamba kendi.

Oloni kulikuta busamba na Njambi kutondeka kulifwita. Cakumwenako, nga munakunu nemo, kumubandamena ngweni ilikolela ikeyo ibenya. Munapande kuyaka mu mwela waubwa na kuishangelela simbu yoshe asina ikola mwamubwa. Mukemwo mubunafu na busamba bweni na Njambi. Co bika bimunapande kulinga mangana mukanyamese busamba bweni na Njambi?

Seho ya Kulilongesa Mbimbiliya

Babusamba bakasimutwiya, co lalo bakalitolilila. Mukemwo mubunapande kupwila na busamba bweni na Njambi. Tukatolilila kuli Njambi mutukatanda Mbimbiliya na kusinganyekesesa ha byuma bitunatanda.—Myaso 1:2, 3.

Hamo kumwashakele manene bya kutanda. Bakwenje na bambanda babangi kubashakele manene kutanda. Bashaka kukenga TV, kweha bweho bumo nambe kusikama na babusamba. Oloni nga mushaka kulikuta busamba na Njambi, co munapande kukabangeya byatonda. Munapande kulilongesa Lijwi lyendi mangana mutolilile kuli ikeye.

Keti mulishoshwomwene ngweni hamo kulilongesa Mbimbiliya citele. Mwasa kulikuwa kutanda Mbimbiliya nameme hamo kumwashakele manene bya kutanda. Cuma ca kulibanga cimikwasa cinapu kuwanako simbu ya kulilongesa Mbimbiliya. Mumbanda wa lizina lya Lais ngwendi: “Njakala na cinoneko. Njikatanda capita imo ya mu Mbimbiliya mutondo na mutondo.” Maria uje ali na myaka 15 ikeye ali na cinoneko ceka. Ngwendi: “Njikatanda Mbimbiliya butsiki simbu kanda njilale.”

Nga mushaka kulyakela cinoneko ca kutanda Mbimbiliya, taleni  cipalo cili ha liputa 292. Co kwisi, sonekeni simbu imulinga-linga ngoco ha minutu 30 nambe kutubakana.

․․․․․

Kukala na cinoneko akewo mashangumukilo. Nga mushangumuka kulilongesa Mbimbiliya, munasa kunanguka ngweni kutanda Mbimbiliya bisimbu bimo kunasa kukaluwa. Munasa kulitombola na Jezreel wa myaka 11 uje wendekele mu kubatula ngwendi: “Mitamba imo ya mu Mbimbiliya keti yayasi kuizibisisa, co kunjesi kulikuwa kuitanda.” Nga muliziba ngoco, keti muzeye. Simbu yoshe omwo mulilongesa Mbimbiliya munapande kwanuka ngweni muli na kutolilila kuli Yehova Njambi, uje wapwa kabusamba keni. Nga mulifwita kulilongesa Mbimbiliya, co mulikuwa kulilongesayo, co lalo kulinga ngoco kumikwasa manene.

Kulombela Kwapwa kwa Seho

Kulombela kunapu kusimutwiya na Njambi. Lilombelo lyapwa bwana bwa kulitila! Mwasa kulombela kuli Yehova Njambi simbu yoshe-yoshe, ipwe mutanya nambe butsiki. Nalibwahesela kutolilila simbu yoshe. Ashaka kuziba bimwendeka. Mukemwo Mbimbiliya itushongangeya ngwayo: “Lombeni Njambi ha bije munajeneka, simbu yoshe mulombeni na mbunge ya kukandelela.”—Filipu 4:6.

Ngwe muumwesela ou mukanda, kuli byuma byabingi bimwasa kuleka Yehova. Ebi binasa kupwa bukalu na bishoti byeni nambe byuma bimushaka kukandelela kuli ikeye. Acisinganyekeni ha ñanda ei: Nga mukakandelela kuli babusamba beni mwafwa ya byuma byabibwa bibakamilingila, kuma kumwapandele kukandelela kuli Yehova uje namilingila byuma byabingi kutubakana babusamba beni boshe?—Myaso 106:1.

Sonekeni byuma bimo bimushaka kukandelela kuli Yehova.

․․․․․

Bisimbu bimo, hamo mukakala na bishoti. Mukanda wa Myaso 55:22 ngwawo: “Kundika tuyando twobe kuli Shukulu Kalunga, co ikeye akakukwasa, ikeye kakataba muka-busunga ngeci bamufungulule embwe.”

Ha mifunda inatako, sonekeni byuma byoshe-byoshe bili na kuminenela bishoti bimushaka kuleka Yehova mu lilombelo.

․․․․․

Byakuliwana Nabyo

Kuli cuma cikwabo casa kukanyamesa busamba bweni na Njambi cije kumwapandele kwombwanesa. Ndabiti wembile ngwendi: ‘Makeleni mumone ngweni Yehova wapwa wamubwa.’ (Myaso 34:8) Ndabiti wasonekele mukanda wa Myaso 34 munima ya kuliwana na byuma bimo bya kutewesa. Ha simbu ei, wakele na kutewa Mwene Saulu uje washakele kumutsiya. Obu bwapwile bukalu bwakama. Co Ndabiti wakalishwekele mukati ka bitozi bendi Bafilisitiya. Omwo wamwene ngwendi basele kumutsiya, Ndabiti walikwisile kuzaluka, co wobokele.—1 Samwele 21:10-15.

Ndabiti kalizibile ngwendi kunyanyama kwendi kukekwo kwamulingisile obokele ha cala. Co washangazalele Yehova. Ku maputukilo a mukanda wa Myaso 34, Ndabiti wasonekele ngwendi: ‘Njalombelele kuli Yehova, co wanjikumbulwile. Wanjipatwile ku byuma byoshe bije byanjizibisile lyoba.’ (Myaso 34:4) Byuma byaliwanene nabyo Ndabiti bikebyo byamulingisile ashongangeye bakwabo ngwendi ‘bamakele na kumona ngwabo Yehova wapwa wamubwa.’ *

Kuma kuli byuma bimo bimunaliwana nabyo mu kuyoya bije byamilingisa mukulahele ngweni Yehova wamyaka mbunge ndi? Nga kubili, bisonekeni kwisi. Anukeni ngweni: Byakuliwana nabyo bimusoneka kubyapandele kupwa bya kukomokesa manene. Singanyekeseseni ha byuma byabibwa byakamilingila Yehova ha litangwa na litangwa, nameme bije bibanasa kwombwanesa banu.

․․․․․

Hamo bisemi beni banamilongesa Mbimbiliya. Nga mukemwo, co mwabezika. Nameme ngoco, yeni babenya munapande kulikuta busamba na Njambi. Nga kanda mulinge ngoco, biñanda bili omu mu capita byasa kumikwasa kulinga ngoco. Yehova abezikisa kulifwita kweni. Mbimbiliya ngwayo: ‘Twaleleleniho kulomba, co bakamyana, twaleleleniho kutonda, co mukawana.’—Mateo 7:7.

TANDENI BYABINGI HA ÑANDA EI MU VOLYUMU 1, CAPITA 38 NA 39

MU CAPITA INATAKO

Kuma kukamikaluwila kulekako bakweni bya Njambi ndi? Moneni mumwasa kwimanena bimwakulahela.

[Majwi a kwinikila]

CISONEKA HANEMANA SIMPI

‘Banabwahelela baje bazibuka ngwabo batonda Njambi.’—Mateo 5:3.

ANUKENI NGWENI

Nga mutanda maputa awana mu Mbimbiliya ha litangwa na litangwa, mwasa kumanesa kuitanda mu mwaka umo.

MUZIBUKA NDI . . . ?

Yehova wamyaka mbunge, mukemwo namileke binangulo byendi bije bili omu mu libulu. Mulinga mwamubwa nga mutanda ebi binangulo bitunda mu Mbimbiliya na kubyononoka.—Yowano 6:44.

BINJINAPANDE KULINGA

Nga njishaka ngwange biñanda binjitanda mu Mbimbiliya binjikwase, njinapande ․․․․․

Nga njishaka ngwange njilombele-lombele kushwa kumo, njinapande ․․․․․

Binjishaka kwihula bisemi bange ha ñanda ei ․․․․․

MUMONA BATI?

● Bika bimikwasa mulikuwe kutanda Mbimbiliya na kusinganyekesesa ha byuma bimutanda?

● Mwafwa bika Yehova washaka kutolilila ku malombelo a banu ba kujeneka kulumbunuka?

● Bika bimunapande kulinga mangana malombelo eni apwe amabwa manene?

[Majwi]

Munjapwile mwanike, njakele na kulombela byuma bimo simbu yoshe. Oloni ha simbu ino, njikalombela ha byuma byabibwa na byuma byabibi binjikaliwana nabyo ha litangwa na litangwa. Njikaliwana na byuma bya kuliseza-seza. Ngeci, kunjesi kulombela byuma bimo simbu yoshe.’’—Eve

[Cipalo/​Cikupulo]

 zibukeni mwamubwa Mbimbiliya yeni

1. Anguleni muzimbu umo wa mu Mbimbiliya umushaka kutanda. Lombeni Yehova amikwase kuzibisisa bimutanda.

2. Tandeni mwamubwa owo muzimbu. Keti mutande bwasi-bwasi. Omwo mutanda, lingeni ngwe neni kumwakele ha simbu ibyalingiwile byuma bimuli na kutanda. Lingeni ngwe muli na kumona bili na kulingiwa, kuziba banu babali na kusimutwiya, kuziba bweko bwa mpunzi, kumakela byakulya na byuma byeka. Esekeni mwoshe mumwasela kulinga ngwe neni kumwakele omwo byuma bimuli na kutanda byakele na kulingiwa

3. Singanyekeseseni ha biñanda bimunatanda. Lihuleni bihula bya kufwa ngwe:

● Mwafwa bika Yehova watabesele ou muzimbu bausoneke mu Mbimbiliya?

● Beya babanendeka omu mu muzimbu banjinapande kutembwinina, co beya kunjapandele kutembwinina?

● Biñanda muka binjinatanda omu mu muzimbu binjasa kupangesa mu kuyoya kwange?

● Ou muzimbu unjilongesa bika hali Yehova nomu mwakalingila byuma?

4. Lombeleni kuli Yehova mu bwihi. Mulekeni bimunalilongesa mu muzimbu wa mu Mbimbiliya umunatanda nomu mumushaka kupangesela bimunalilongesa. Simbu yoshe kandeleleni Yehova mwafwa ya bwana bwanamyana bwa Lijwi lyendi Mbimbiliya

[Cikupulo]

“Lijwi lyobe likelyo ndeya ku myanja yange, na ceke mu ngila yange.”—Myaso 119:105.

[Cipalo/​Cikupulo]

Lingeni tahi byuma bya seho manene

Kuma mukalizibi ngweni kumwesi na simbu ya kulombela nambe kutanda Mbimbiliya ndi? Nga mukemwo, co hamo munapande kwilula mumunanonekela byuma.

Esekeni kulinga byuma binatako: Waneniko cingongolo, co akenimo mamanya akama a kupwamo. Kutundaho, itilenimo mushekesheke kweta noho hacishulila. Muwana ngweni mamanya na mushekesheke byoshe bifwamo.

Tundiseni mushekesheke na mamanya mu cingongolo, oloni keti mubyumbile. Ilukileni kulinga lalo bimunalingile ha kulibanga, oloni ha simbu ino shangumukeni tahi kwaka mushekesheke, co mwakamoni mamanya. Hamo mwananguka ngweni mamanya kuwafumo. Mwafwa bika? Mwafwa munabanga tahi kwaka mushekesheke mu cingongolo.

Bika bitulilongesako? Mbimbiliya ngwayo: ‘Nangukeni byuma bije binapu bya seho manene.’ (Filipu 1:10) Nga mutwameka byuma byabindondo bya kufwa ngwe kulizima buli, co kumukala na simbu yaingi ya kulinga byuma bya seho manene, kulumbununa byuma bya ku sipilitu. Oloni nga mukabangeya eci cinangulo ca mu Mbimbiliya, co mukala na simbu yaingi ya kulinga byuma bya ku sipilitu na simbu ya kupwamo ya kulizima buli. Mwasa kulinga byuma byoshe ebi nga mutwameka byuma bya seho manene

[Cikupulo]

Ngwe mwa nemo, busamba bwetu na Njambi nabwo butondeka kubunyunga asina bukanyama