Ukalingi vati nga unathzivi lyova?— Hamo ukatewela kuli vanoko na vaisho mangana vakukwathe. Oloni kuli munu mukwavo nawa atha kukukwatha. Ali na ndthzili kutuvakana vanu voshe. Umuthzivuka ndi?— Ngocho vene, ikeye Yehova Njambi. Vandamena tuthimutwiye vya mukwenje umo wamu Mbimbiliya wa lithzina lya Ndaviti. Kakele na lyova mwafwa wathzivukile ngwendi Yehova atha kumukwatha thimbu yoshe.

Vithemi vendi vaputukile kumulongetha kuthzema Yehova te achili mwanike wamundondo. Echi chamukwathele kuthimpa nakujeneka kuthziva lyova, nameme waliwanene na vyuma vyakutewetha. Wathzivukile ngwendi, Yehova wapwile Kavuthamba kendi. Cho nawa Atha kumukwatha. Thimbu yimo Ndaviti te alinakunyunga vimanga, wamwene ndumba wakama alinakwija na kukwata manga na kanwa! Uthzivuka vyalingile Ndaviti ndi? wamushatukithile na kumuthsiya oho vene na mavoko endi! Cho thimbu imo nawa, mbeya wakwatele manga umo, Ndaviti wamuthsiile nawa. Uthinganyeka ngwove iya wakwathele Ndaviti?— Ngocho vene, wapwile Yehova.

Kuli thimbu imo nawa ije Ndaviti wamwethele manene kujeneka lyova. VaIsalele vakele nakulwa ndthzita na vaFilisitiya. Cho mukati ka vaFilisitiya, mwakele liswalale wa mulaha manene, wa kutunuka! Lithzina lyendi wapwile Ngolyata. Ou munalume, washawile manene maswalale va vaIsalele na Yehova. Washongangeyele maswalale va vaIsalele mangana alwe navo ndthzita. Oloni, vaIsalele voshe vathzivile lyova kulwa nendi. Omwo Ndaviti wathzivile ou muthzimbu, walekele Ngolyata ngwendi: ‘Njikulwitha! Yehova anjikwatha, cho njikuwithila hathi!’ Uthinganyeka ngwove Ndaviti wathimpile ndi?— Ngocho vene, wapwile wakuthimpa. Ushaka kuthzivuka vyuma vikwavo vyalingiwile ndi?

Ndaviti wambatele chipapa chendi na mamanya amavwa atanu, cho waile na kukalwitha ou munalume. Omwo Ngolyata wamwene Ndaviti amoneka vwanike, wa mushawile manene! Oloni Ndaviti wamulekele ngwendi: ‘Ulinakwija kuli yange na mukwale, oloni yange njilinakwija kuli yove mulithzina lya Yehova!’ Cho Ndaviti waakele limanya mu chipapa chendi na kushwenya kuyehi na Ngolyata athinoni amwashe. Lije limanya lyakwatele Ngolyata muluholo! Haje vene, wawililile hathi cho wathsile! VaFilisitiya  muvamwene ngechi, vathzivile lyova manene cho voshe vatewele lumbithi. Mwafwa vika Ndaviti ha kupwa mwanike wa mundondo walwithile Ngolyata?— Yehova wakwathele Ndaviti cho Yehova lalo wakele na ndthzili manene kutuvakana Ngolyata!

Vika ulilongetha ku ñanda ya Ndaviti?— Yehova wakala na ndthzili manene kutuvakana vanu voshe. Cho lalo, wapwa Kavuthamba kove. Wapande kwanuka Yehova nga unathzivi lyova, mwafwa ikeye atha kukukwatha mangana uthimpe mbunge!