Kutunda kuvwanike vwendi, Samwele wayoyele na kupangela ku mbalaka, ku mwela uje vanu vavangi vakele nakuliwanena kukalombela Yehova. Uthzivuka vyuma vyanenethele ngwavo Samwele akakale ku mbalaka ndi? Chakulivanga, tuchililongethe vya vaina ya Samwele va Hana

Hamyaka yaingi yetile, Hana washakele kukala na mwana, oloni naumo wayi yakele nendi. Cho walombele manene kuli Yehova mangana amukwathe kukala na mwana. Hana wakulahethele ngwendi nga akakala na mwana, cho akamutwala ku mbalaka mangana akakaleko na kukapangelako. Yehova wakumbulwile lilombo lya Hana, cho chili vene wakele na mwana wa munalume. Wamulukile lithzina lya Samwele. Samwele mwakele na myaka itatu nameme iwana, vaina va Hana vamutwalele ku mbalaka na kukapangela Njambi, mwafwa mukemwo muvakulahethelele.

Eli wapwile muka-kukombelela wakama ku mbalaka. Cho na vana vendi vavali navo vakele nakupangelako kupwa vaka-kukombelela. Anuka ngwove mbalaka yapwile njuvo ya Njambi ya kulombelela, cho vanu vakeleko vapandele kupwa va vilinga vyavivwa. Oloni vana va Eli, vakele na kulinga vyuma vyavyuvi. Samwele walimwenenene vivakele na kulinga. Vati, Samwele walingile vyuma vyavyuvi ngwe vana va Eli ndi?— Embwe, oloni watwaleleleho lika kulinga vyavivwa ngwe muva mulongethele vithemi vendi.

Uthinganyeka ngwove vika vyanapandele kulinga Eli kuli vana vendi vavali?— Eli napandele kuvanyanyametha cho nawa kapandele ku vechelela vatwaleleho kupangela ku njuvo ya Njambi. Oloni Eli kathinganyekele kulinga ngocho, cho Yehova wa muluvalelele hamolika na vana vendi vaje vavali. Yehova wavanene chihitho.

Litangwa limo Samwele mwa lalele vuthsiki, wathzivile umo amuthana ngwendi: ‘Samwele!’ washatukilile kuli Eli oloni wamukumbulwile ngwendi ‘kethi yange njakuthana.’ Vamuthanene lalo luvali. Oloni omu wathzivile vamuthana nawa lwamuchitatu, Eli walekethele  Samwele ngwendi nga athziva lijwi limutambeka nawa, cho napande kwendeka ngwendi: ‘Endeka Yehova ,njilinakutolilila.’ Samwele walingile viva mulekethele. Cho Yehova wendekele kuli Samwele ngwendi: ‘Leka Eli ngwove njikanyanyametha nanga yendi ha vyuma vyavyuvi vivalinakulinga.’ Uthinganyeka ngwove chapwile chachathi kuli Samwele kwendeka ou muthzimbu kuli Eli ndi?— Embwe, chapwile chachikalu. Oloni nambe ngwavo Samwele wathzivile lyova hakulivanga, wendekele majwi amulekele Yehova. Majwi endekele Yehova apwile a vusunga mwafwa vana va Eli vavali vathsile. Cho na Eli nendi wathsile.

Samwele napu mwanja wauvwa kuli yetu. Wakele na vilinga vyavivwa nambe ngwavo wamwene vakwavo valinga vyavyuvi. Yove cho? Watha kupwa ngwe Samwele na kutwalelaho lutwe kulinga vyuma vyavivwa ndi? Nga ulinga ngocho, cho uthzivitha Yehova na vithemi vove kuvwaha.