CHILONGETHA 2
Lembeka Washakele Kuthzivitha Yehova Kuvwaha
Lembeka wapwile munakathzi wakuthzema Yehova. Lithzina lya munalume wendi ikeye Isake. Nendi wathzemene Yehova. Chethzile vati ngwavo Isake aliwane na Lembeka? Wamwethele vati ngwendi watondele kuthzivitha Yehova kuvwaha? Tulilongetha vyavingi kuli Lembeka.
Vithemi va Isake vapwile va Avilahama na Sala. Vakele mu lifuti lya Kanana, lije kukwakele vanu vakulombela Yehova. Oloni Avilahama watondele munendi ngwendi ambate munakathzi uje alombela Yehova. Watumine ngamba yendi wa lithzina lya Elyazale kuya nakutondela Isake munakathzi ku lifuti vathana Halane kuje vakele vavushoko vwa Avilahama.
Lembeka washatukilile kulithima mwaya-mweluka nakutekwila tumelu mema
Elyazale waile na vangamba vakwavo va Avilahama. Vendele vungendthzi vwavulaha. Valikwathethele tumelo vakupwa 10 kwambata vyakulya na mavwana. Elyazale nethi kuthzivuka vati munakathzi yaangwila Isake? Muvetele mu Halane, Elyazale na vakwavo vangamba vemanene ha lithima mwafwa Elyazale wathzivukile ngwendi vanu vanapande kwija na kutekula mema. Walombele kuli Yehova ngwendi: ‘Nga njilomba munakathzi mema akunwa cho anjana nakwanako na tumelo vange, oho njikathzivuka ngwange ou ikeye vene munakathzi yiunangula.’
Lembeka wethzile kulithima. Mbimbiliya yendeka ngwayo wakele wamuvwa manene. Elyazale wamulombele mema akunwa cho Lembeka ngwendi: ‘Eyo mwane. Njimyana mema awa cho njikatekwila lalo na tumelo tweni.’ Thinganyeka lika! Tumelo nga vanathsi lihwila, vakanu mema amangi, cho Lembeka washatukililile kulithima mwaya-mweluka. Kumani wamono mwalinakupangela na ndthzili omu muchikupulo ndi?— Elyazale wakomokele manene omwo Yehova wakumbulwilemo kulomba kwendi.
Elyazale wanene Lembeka mavwana amavwa amangi Lembeka walanyene Elyazale na vakwavo ku njuvo ya vaishe. Elyazale wamulekethele ovyo vyamushikile Avilahama kulinga nomu Yehova wakumbulwilemo lilombo lyendi. Vavushoko va Lembeka voshe vavwahelele manene ha kushomboka kuli Isake.
Lembeka waile na Elyazale ku Kanana nakukashomboka kuli Isake
Uthinganyeka ngwove Lembeka washakele kushomboka kuli Isake ndi?— Lembeka wathzivukile ngwendi Yehova ikeye watumine Elyazale. Omwo vavushoko vwa Lembeka vamwihwile ndi washakele kuya ku Kanana kukashomboka kuli Isake, wakumbulwile ngwendi. ‘Eyo, njishaka kuya’. Oho vene vaile na Elyazale. Omwo vaketele ku Kanana, wakashombokele kuli Isake.
Lembeka walingile vyoshe vije vyamushikile Yehova. Kulinga ngocho kwanenethele ngwavo Yehova amuvethzikithe. Hanima ya myaka yaingi, Yesu nendi wathemukilile mu nanga ya Lembeka! Nga ufwa ngwe Lembeka nakuthzivitha Yehova kuvwaha, cho nove akuvethzikitha.
