Thimbu imo, vanu vakatujolo nambe kutuluvalela nga twendeka navo vya Yehova. Nga kutukoletha, twatha kwonowa kwendeka vya Njambi. Nove wathzivileho ngechi kumbunge ndi?— Mbimbiliya ituleka vya mwanike umo wa munalume uje wathzemene Yehova. Oloni, washakele nawa kulikela kwendeka vya Yehova. Lithzina lyendi lyapwile Njelemiya. Vandamena tulilongethe vyendi.

Njelemiya mwapwile mwanike wamundondo, Yehova wamulekele ngwendi napandele kuleka vanu mangana valikele kulinga vyuma vyavyuvi. Echi chapwile chachikalu kuli Njelemiya cho wathzivile lyova. Walekele Yehova ngwendi: ‘Kunjithzivuka vinjinapande kwendeka’. Njichili njimwanike wamundondo.’ Oloni Yehova wamukumbulwile ngwendi: ‘Kethi uthzive lyova. Njikukwatha.’

 Njelemiya waputukile kuleka vanu ngwendi Njambi akavana chihitho nga kuvechela kulinga vyuma vyavyuvi. Uthinganyeka ngwove vanu valingile vyendekele Njelemiya ndi?— Embwe. Vamujolele na kumuluvalela manene. Vamo vashakele kumuthsiya! Walithzivile vati Njelemiya hathimbu ije?— Wathzivile lyova na kwendeka ngwendi: ‘Kunjikendekaho nawa vya Yehova.’ Cho vati, walikelele vene ndi?— Embwe, watwalele lutwe. Kuthzema manene Yehova kwamukanyamethele kutwalelelaho kwendeka vyendi. Kutwala lutwe kwa Njelemiya kwanenethele ngwavo Yehova amunyunge.

Chakumwenako, thimbu imo vanalume vamo vavavi vombilile Njelemiya mu vwina. Ovu vwina vwakele vwakulova manene cho nawa mwakele lindova lyalingi. Njelemiya wakelemo na njala na lihwila. Vaje vanalume vashakele ngwavo Njelemiya athsile muje muvwina. Oloni Yehova, wakwathele Njelemiya cho wovokele!

Vika watha kulilongetha kuli Njelemiya?— Nambe ngwavo ha thimbu imo Njelemiya wathzivile lyova, kechelele kwendeka vya Yehova. Nove nga wendeka vya Yehova, vanu vamo vanatha kukujola nambe kukuluvalela. Cho, hamo unatha kuthziva shwamwa na lyova. Oloni kethi ulikele kwendeka vya Yehova. Akukwatha thimbu yoshe ngwe mwakwathelelemo Njelemiya.